《小傳日記》季檢結果聽日揭，新東方竟然係大熱？

　　《小傳日記》新年新豬肉！魚缸一「兔」污氣，噚日低開轉升紅盤高收，今日繼續有得升，
不過得幾十點，但成交連５００億銀都唔夠！往時就算無北水都做到７００幾億，如今竟然得正
常嘅半日成交總額，講得衰啲真係連沽都無人想沽。
　　新年就確係有新豬肉，聽日收市後就輪到恒指公布季檢，距離百大藍籌嘅目標仲有１８個位
，不過上兩次季檢開始，恒指公司明顯減慢咗染藍速度，全個２０２３年得三次，全年夾埋都係
多咗七隻成份股，兼踢走咗隻碧桂園（０２００７），睇落恒指公司都唔係咁急住搵夠１００隻
。
　　臨近公布結果，中金繼續係最積極「ｔｉｐ題」嘅大行，除咗有長期膽拖快手
（０１０２４）之外，今次仲搭咗六隻腳，包括４０年前曾經係藍籌嘅太地（０１９７２），仲
有京東物流（０２６１８）、小鵬（０９８６８）、新東方（０９９０１）、百濟神州
（０６１６０）同埋信達（０１８０１）。
　　中金估嘅七隻入面，唔計長期名落孫山嘅快手，最大市值就係新東方，有成１２２６億。其
實新東方過去年半以來一直修復股價，由個位數一路攀升，期間一直無受魚缸嘅風吹雨打，慢慢
升到上今日最高見７２﹒４５銀，再創兩年半新高。每日升幅唔勁，但係可以話係呢段期間最默
默耕耘嘅股份。如今市值大兼成交多，而且藍籌入面仲未有一隻教育股，要染藍真係合情合理，
好有可能係快手之後最大機會嘅染藍黑馬！
　　至於其他嗰五隻，分別屬於醫藥、汽車以及運輸板塊，其中醫藥板塊，計埋兩隻網醫都已經
８隻藍籌，所以百濟神州市值過千億，已經係好幾次嘅黑馬，好有可能都未必會再納入成份股，
機會相對較新東方低啲。而且上述呢三個板塊都面對緊自己嘅挑戰，呢個時候來染藍好有可能只
會令「染藍魔咒」繼續見效！
　　相反物流運輸板塊入面，國泰（００２９３）對魚缸以至係香港嘅象徵意義更加高，而藍籌
入面又只係得港鐵（０００６６）同東方海外（００３１６）算係運輸板塊，所以國泰都唔係完
全無機會翻「染」。另外，恒指公司通過容許外國公司染藍以來都仲未用過，所以目前市值有成
１３０８億嘅Ｐｒａｄａ（０１９１３）都仲係大機會叫胡㗎，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。