按盤價 
《魚缸博客》花旗國孖屐上個禮拜五（２０日）造好，再創收市新高添，道指收漲１６５點
至２３３２８點，但香江呢邊魚缸今朝（２３日）就唔太爭氣喇，雖然一開閘先行高開７０點，
但過咗一陣就碌但，最低見２８２５３，跌２３３點。但博客認為，暫時唔使怕，只係技術調整
，再試多次２８０９５個底，可以有望反彈。事實上，雖然花旗同香江嘅息差差距仲有半厘或以
上，若果資金仍然停泊喺香江孖屐嘅話，各位缸友就有望繼續喺魚缸搵食喇。
若各位鄉親父老認同博客呢個睇法，即係話現階段魚缸只是純粹健康調整，加上十九大會期
直至明日（２４日），預料個魚缸仲以維穩格局為主，依個勢頭來睇，仲可以借勢炒埋呢轉嘅。
博客留意到今日個孖屐跌咗咁多，藍籌股入邊仲可以錄得升幅嘅暫時都不超過１０隻，其中
呢隻神州保險佬壽仔（０２６２８）仲可以獨領風騷添，唔通其他股仔都「只識彎弓射大鵰」？
觀乎壽仔，佢上個禮拜五（２０日）收市之後發盈利預喜，受惠投資收益增加，預料頭嗰三
季純利會按年大增９５個巴仙；唔怪得連野村都重申畀佢「買入」評級，「他屐」就維持
３３﹒１３銀。
喜訊陸續有來添丫。中保監明確償二代監管指標標準，其中包括綜合償付能力充足率達標標
準有成１００個巴仙添，有望可提振大型險企嘅士氣。
睇番公仔圖，佢今日一開市就裂口高開，仲飛咗上去２５﹒６５銀添；１４日ＲＳＩ就喺約
６７呢Ｄ水平，未算超買；但博客現階段偏向保守部署，建議等個價回番至２５銀水平吸納，有
望挑戰２６﹒２銀，約兩個半月嘅高位。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】本港主要銀行跟隨美聯儲減息，你對樓市前景有否信心？► 立即投票
