《小傳日記》壽仔縱力撐，魚缸無力挽！

　　上周五（２０日）道指破頂，加上壽仔（０２６２８）發盈喜今日一開波就抽升，呢邊魚缸亦跟隨高開７０點，但已經係全日高位。大隻佬ＡＩＡ（０１２９９）繼續捱沽，加上內地錢莊又腳軟無力，魚缸開市無耐已經開始倒跌，仲試過最多唔見２３３低見２８２５３點添。最終恒指唔見１８１點，收報２８３０５點，十天線（２８４８７點）得而復失。
　　聽日（２４日）十九大將閉幕，今日Ａ場嗰邊微升２點，收報３３８０點；國貨佬就趴低
６７點，報１１４９１點。全日主板成交有大約９１４億銀，少過上周五（２０日）約６個巴仙
。
　　雖然個市表現麻麻，但有恒地（０００１２）四叔塞錢入大家袋。四叔破天荒推出個人網頁
，分享佢嘅營商處事六字真言，「止、定、靜、安、慮、得」，有意志力同耐性似乎真係成功重要一環，實在獲益良多！
　
＊壽仔發盈喜粉絲好歡喜，內銀遇沽壓大市麻麻地＊
　
　　壽仔今日好強勢，逆市踢高超過３巴仙，報２５﹒４５銀，除咗係今日最叻仔藍戰士，隻股成交額仲係最多。點解咁勁，因為發盈喜囉。壽仔預報首三季多賺９５巴仙，受惠投資收益增加
。多間大行亦唱好壽仔，花旗直頭話佢盈利同派息進入上升周期，重申「買貨」評級咁話。
　　其他內險佬表現都唔錯，平保（０２３１８）試過高見６８﹒０５銀破頂，但最終腳軟唔夠半個巴仙，報６７﹒０５銀；街坊太保（０２６０１）就踢高近２巴仙，報３７﹒５銀。
　　ＡＩＡ走勢就繼續比較弱，自從早前公布第三季新業務價值增長兩成略遜預期之後持續腳軟
，野村就話增長放緩反映咗資本管制措施限制香江業務表現，結果ＡＩＡ瞓低近２巴仙，報
５９﹒２銀。
　
＊四叔推網頁六字獲益多，邱鈦夠鑊氣可惜我無貨＊
　
　　大隻佬祖國移動（００９４１）頭三季多賺近半成去到９２１億人仔，ＡＲＰＵ仲升近１巴仙，幾間大行都話佢份成績表唔錯，花旗更加讚佢係行業首選添。中移收市腳軟半個巴仙，報
７８﹒９銀，但已經係「跑贏」今日個市！
　　華為首三季手機出貨量增１９巴仙突破１億台，丘鈦科技（０１４７８）隨即飆前１８巴仙
，報１８﹒３６銀；舜宇（０２３８２）亦都湊熱鬧跳高２巴仙，報１１７﹒２銀；藍戰士瑞聲（０２０１８）就有唔夠半個巴仙進帳，報１４０﹒６銀。
　　由股王ＱＱ（００７００）分拆嘅網上文學平台閱文（００７７２）今日舉行投資者推介會
，另外將會喺禮拜四（２６日）起招股，勢掀起眾安（０６０６０）之後另一次熱潮。結果ＱＱ略為後退唔夠半個巴仙，報３４８﹒６銀。
　
＊閱文將招股勢掀起熱潮，瑞信畀個讚北汽缸邊飆＊
　
　　砵砵車今日表現都幾兩極，有人歡喜有人愁。北汽（０１９５８）今日認真架勢啦！先係戴姆勒公布咗應佔北京奔馳嘅季度業績，按年增長咗逾４１個巴仙，再有瑞信畀Ｌｉｋｅ，將「他屐」由７銀升到８﹒６銀，刺激股價今日飛起近９巴仙，盤中高見９﹒２４銀創近兩年半高位，最終報９銀。街坊廣汽（０２２３８）都好厲害，獲交銀國際升目標價，踢高逾２巴仙，仲創過上市新高添，報２０﹒６銀。
　　不過，唔係架架砵砵車都咁好表現啦，阿爺話要著手排查新能源砵砵車產能，睇下有無過剩喎，嚇到吉利（００１７５）手軟腳軟，跣低２巴仙報２５﹒７５銀；比亞迪（０１２１１）都瞓低近４巴仙報７３銀。
　
＊十三搞供股復牌急插水，中興放榜前緣何太憔悴＊
　
　　中車時代（０３８９８）公布咗今年頭９個月嘅業績，純利比起上年同期足足少咗兩成，仲被高盛同野村等削佢目標價，難怪佢今日咁大沽壓啦！全日急瀉咗７巴仙，報４４﹒４５銀，係是日最差表現國貨佬。
　　十三集團（００５７７）話要做股本重組，想將股份十合一，仲打算按一供十進行供股，大家都齊齊散水，復牌後插咗近４９巴仙，報０﹒４６５銀，係最大跌幅魚仔。
　　至於金利通（０８２５６）都唔好得好多，被聯交所通知要開始取消上市地位，全日蒸發咗近４０巴仙，報０﹒０５銀。
　　中興通訊（００７６３）星期四（２６日）就會放榜啦，不過就被中金畀個「沽售」評級，績前跌低近６巴仙，報２５﹒３５銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。