《小傳日記》人仔谷底絕地大反擊，魚缸Ｖ彈成交破千億！

　　花旗國魚缸承受三重打擊，巨挈季績唔省鏡，歐美貿易戰，同埋侵侵（特朗普
）批評聯儲局加息，搞到道指噚晚（１９日）收跌１３４點收２５０６４，終止五連升。再加上
，人仔弱過藥煲，今朝（２０日）人仔兌一美金中間價急插６０５點子七連跌，報６﹒７６７１
，係舊年７月１４號以來最弱，更是「８１１匯改」以來最大跌幅。
　　香江魚缸嚇到腳都軟埋，中資佬更加唔使講，齊齊成為捱沽一族，所以今朝魚缸走高幾十１點後就急急調頭向下碌，仲試過最多唔見２６５點報２７７４５，創九個月低位添。點知，中午之後，人仔突然嚟個谷底大翻身，離岸價收復返６﹒８！中港魚缸齊齊趁機大反擊，Ａ場收漲２巴仙報２８２９，香江都Ｖ型反彈２１３點或０﹒８個巴仙，報２８２２４；國指就衝前１５９點或１﹒５巴仙，報１０６８２。全日成交上返千億銀，錄得１００３﹒４億，比噚日多咗近三成添。
　　一班中資佬即刻一洗頹勢，工行（０１３９８）、建行（００９３９）仲受到傳出資管新規即將出台，或者畀銀莊自主整改，齊齊拗腰倒升逾２巴仙，收５﹒５６銀及６﹒８６銀；平保
（０２３１８）都衝高近２巴仙報７１﹒５５銀；就連碧桂園（０２００７）都反擊近３巴仙。重磅大隻佬ＱＱ（００７００）同ＡＩＡ（０１２９９）就象徵式行前ＤＤ，各報３７６﹒６銀及６７﹒７５銀。
　　
＊人仔低位行內房無力彈，鐵鳥急起航齊齊跳彈床＊

　　侵侵噚日又再發表驚世言論，質疑聯儲局嘅獨立性，話對佢地嘅加息政策相當唔滿意，因為咁樣會搞到花旗國嘅生產力同競爭力帶嚟負面影響，呢番言論即時令美金插一插水，人仔亦稍為跳吓彈床，但僅此於次。人仔今朝延續呢幾日跌勢繼續深潛，人仔離岸價（ＣＮＨ）同在岸價
（ＣＮＹ）孖住上失守主要關口，亦有分析話，係人行放任人仔跳水，似乎係反擊貿易戰其中一個手段，而中美喺貿易戰上面依然冇計傾，人仔短期內都好難真正有反彈。
　　魚缸咁多個板塊入面，神州磚頭同鐵鳥由於持有唔少外債，但收入就以人仔計算，即係話人仔貶值嘅話要用更多嘅人仔先兌換到同等金額嘅外幣，所以磚頭同鐵島呢排都冇乜運行。即使今日下晝神州金融佬全線跳彈床，大部分磚頭依然潛水，潤地（０１１０９）同「四條三」恒大
（０３３３３）碌低近１巴仙報，分別收２６﹒６５銀及１９﹒８銀。萬科（０２２０２）硬淨
，幾乎冇乜點跌過，更彈起近２巴仙報２５﹒０５銀。碧桂園（０２００７）更彈近３巴仙收
１２﹒６６銀。
　　鐵鳥早段仲做緊潛艇，但好快就突然畀油起飛，南航（０１０５５）最勁揪，飛高超過４巴仙，報５﹒３３銀。東航（００６７０）同國航（００７５３）都彈起超過３巴仙，報４﹒９７銀同６﹒８６銀。

＊花旗讚油佬缸友跟住掃，電訊炒合併前路更暢通＊

　　花旗今日咁讚石油佬，讚到佢哋齊齊起飛。講起中石油（００８５７），花旗話佢上半年會繼續保持至少４５巴仙派息率，仲有機會有特別股息。個勢咁好，緊係衝曬過去啦！中石油收報５﹒６５銀飆高逾２巴仙；花旗亦預計中石化（００３８６）嘅利潤同比增長近四成，中期派息率達５０巴仙，中石化都開心收報７﹒１５銀漲近２巴仙。至於中海油（００８８３），花旗就話油價上漲，佢上半年每股純利可能同比高逾８０巴仙，有機會發盈喜，但缸友無咩反應，只收升ＤＤ報１２﹒３４銀。
　　中電信（００７２８）劉愛力辭咗執董、總裁兼首席運營官職務，富瑞喺呢個時候就話中美貿易戰，有機會令到中國合併中電信及中聯通（００７６２）。因為合併會減低三大電信商建設５Ｇ嘅資本開支同投資成本，令５Ｇ服務更平同及加快市場應用。如果合併，對中電信及中聯通畀強烈「買入」評級。中電信同中聯通收工都升近１巴仙，分別收３﹒６銀及９﹒３６銀。

＊魚缸咁鬼亂缸友囉囉攣，煤氣又新高燃氣佬叫好＊

　　呢排個魚缸咁亂，缸友都囉囉攣，湧晒去搵煤氣佬避一避。煤氣（００００３）急漲近３巴仙，報１６﹒２２銀，連續第三日創上市新高，勁；其他收息股都好搶手，被缸友起勢追捧，領展（００８２３）仲獲交銀國際維持買入，續望７７﹒７銀，收市就開心飛起逾２巴仙，報
７５﹒２銀。
　　大陸有風吹話未來中俄天然氣貿易量會增加，一班燃氣佬今日表現都好突出！新奧能源
（０２６８８）就被野村維持佢買入評級，「他屐」價都係９３蚊，結果收工袋８８銀，高咗２巴仙，順便創上市新高見９２﹒３５銀。鄰居中國燃氣（００３８４）就跟勢彈起近３巴仙，報
３４﹒８５銀。

＊瑞聲好黑仔一度失紅底，小米碌落山慘失廿蚊關＊

　　唔少手機設備股佬今年唔少時間都相當運滯，做蘋果生意嘅瑞聲（０２０１８）再次被里昂唱衰，「他屐」睇１００蚊。唔止里昂，野村都踩多一腳，調低瑞聲全年銷售預測６個百分點同純利增長１３個百分點，主要由於「唉瘋」聲學及觸控產品競爭加劇，「他屐」由１４１蚊下調至１１８蚊，評級降到去中性。兩間大行同時發功，瑞聲朝早即刻守唔住紅底，全日最低見
９８﹒６銀，創一年新低，尾市勉強上返百元關，報１００蚊。其他街坊同樣被缸友掟貨，舜宇（０２３８２）逆市插咗近３巴仙，報１３６蚊，全日一直喺所有藍戰士入面墊底。
　　香江同神州前日就北水可唔可以買同股唔同權股份暫時傾得掂數，小米（０１８１０）即時彈高至２２﹒２銀兼破埋頂，但就同時有唔少缸友食胡散水，噚日急插近７巴仙後，今日再碌低１巴仙，報１９﹒８８銀。中興（００７６３）獲花旗國放生，本周初頭兩日累升咗兩成後連跌三日，今日跣低近４巴仙，報１４﹒６４銀，三日加埋就插咗超過１１巴仙。周末愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。