《小傳日記》五窮月「威力」認真驚人，就算好友意圖反擊，但都好難穩穩陣陣收高於十天
線之上。咁又難怪嘅，自從有「權威人士」話祖國經濟將會係「Ｌ」型之後，缸友都無晒信心，
加上呢排花旗「鷹派」唱加息，大家寧作壁上觀。耶倫今個星期五（２６日）將出席大學研討會
，睇下到時有無再露蛛絲馬跡。
至於Ａ場，又等緊月底入唔入到ＭＳＣＩ，今日（２３日）收升０﹒６巴仙報２８４３。前
景未明之下，香江缸友都步步為營。今早恆指低開６４點後，就喺１９８００水平窄幅上落，雖
然一度倒升約百點，但下半場就回吐全部升幅，最終又要碌低４３點收１９８０９，國指頑強踢
高４點報８３０８。不過成交靜到烏蠅飛過都聽到，大跌１７巴仙，得番近４３８億銀，係自
２０１５年１２月２９日以來新低呀！
＊成交今年低小傳心閉翳，唔上又唔落內銀不算曳＊
匯證發表行業報告，推介中行（０３９８８）同建行（００９３９），將兩者評級列為「掃
貨」級別，而另一間賓架野村就指，預計未來幾個月繼續有內地錢莊發行不良資產支持證券，不
過無阻間行對內地錢莊嘅睇法。佢地推薦工行（０１３９８）同建行。有賓架護航，中行、建行
都應聲飛起約１巴仙。工行僅微微踢高唔夠１巴仙，僅算跑贏大市。
市場吹風話中銀香港（０２３８８）出售集友銀行，公司雖然唔評論，但缸友都追入支持，
股價飆上約２巴仙，報２２銀。至於大阿哥大象（００００５）同渣打（０２８８８）就分別跌
低約１巴仙同近１巴仙。
＊逆市好靚仔中銀賣集友？大象與渣打今天鬥快走＊
正當谷歌打算同Ｌｅｖｉｓ合作整智能牛仔褸嘅時候，股王ＱＱ（００７００）據報打算推
出首部智能手機。各科技巨挈都努力開拓收入，難怪ＱＱ一度向上衝高近２巴仙；可惜午後市況
轉弱，最終收市踢高唔夠半個巴仙，收報１５９﹒１銀。
科通芯城（００４００）打算溢價１４巴仙配股畀大成國際，涉及１５﹒６億至２３﹒４億
銀。另外富瑞估硬蛋下半年開始有收入，重申「買貨」評級，「他屐」１２﹒５銀，股價有３巴
仙進帳，收報１１﹒３銀。
將會喺禮拜四（２６日）派成績表嘅聯想（００９９２）股價低處未算低，法巴再踩多腳，
大削目標價至４﹒３銀，全日唔見近２巴仙，收報４﹒８８銀。
＊科通引大成踢高來慶祝，聯想再尋底法巴踩多腳＊
中金有報告出爐，話上個月神州砵砵車產量達３﹒１萬架，按年增加逾２倍！純電動用車產
量達１﹒５１萬架，按年多咗１﹒８倍，純電動客車仲犀利，產量達到８７４６架，按年計多咗
５﹒８倍。獲得純電動乘用車生產資質批文嘅五龍（００７２９），將喺第四季正式向孖屐發售
第一款量產小型ＳＵＶ純電動車型「逸酷」，但就跌低約１仙，報０﹒４５銀。
街坊又點呢？比亞迪（０１２１１）、長汽（０２３３３）分別倒跌唔夠１巴仙同踢高近３
巴仙，報４１﹒９５銀同５﹒５４銀。克強總理今日考察湖北十堰東風汽車公司，東風
（００４８９）衝前近４巴仙，報７﹒８６銀，勁！
＊總理在考察東風即飆車，息魔走近了地主腳軟軟＊
聯儲局多位官員今個星期將會陸續有嘢講，長實地產（０１１１３）腳軟軟唔見超過１巴仙
，收報４５﹒２５銀；街坊新地（０００１６）就跌近１巴仙，報８６﹒９５銀；恆地
（０００１２）向法庭申請禁制令收馬屎埔村塊地，亦唔見近１巴仙，收報４４﹒４５銀。
磚頭以外，賭仔今日亦無運行，有傳馬交貴賓廳中介人數高位回落超過三成，有業界人士就
估穿累積壞帳高達４００億，銀娛（０００２７）跣低２巴仙，收報２３﹒８銀，係第二渣藍戰
士；金沙（０１９２８）亦跌近１巴仙，埋單２７﹒３銀。澳博（００８８０）好勁，仍然有近
１巴仙進帳，報４﹒８３銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
