《小傳日記》深港通車冷清清，港所跌到滿天星！

　　《小傳日記》缸友早就有晒心理準備，今日深港正式通車，都唔會掀起大炒風。果然，今朝
（５日）香江魚缸開市只係象徵式高開１５點報２２５８０；但斷估唔到生發發（００３８８）
同其他券商股、深ＡＨ股等，低開之後齊齊瞓低晒，慘！Ａ場都無晒癮，滬綜指同深成指齊齊收
跌逾１巴仙；而香江恆指最多唔見１８９點至２２３７５。好彩嘅係，埋單跌少好多，最終只唔
見５９點報２２５０５點，國指就挫６９點報９７１１。
　　「深股通」首日額度只用２７億人仔，未爆額，「港股通」暫用７﹒５億人仔，靜！香江魚
缸全日都只得６８８億銀左右。
　　至於地球另一邊，意粉國修憲改革公投都一如預期被否決，總理倫齊下台；孖屐都擔心將來
會發生另一場「脫歐」風暴，嚇到歐元急跌。睇嚟大家想等魚缸轉勢衝高，都要畀Ｄ耐性了。

＊意公投失敗深港通開通，魚缸無嘢炒好友即失踪＊
　　
　　「深港通」雖然敲起鑼鼓，不過魚缸響應彈起歡迎嘅為數唔多。生發發一度低見１９６蚊，
散場仍跌２﹒７％，報１９７﹒４銀。其他券商佬都唔係太畀面，隻隻散水格；中國光大
（００１６５）、第一上海（００２２７）同海通證券（０６８３７）齊齊唔見逾２巴仙至近４
巴仙，真係慘豬豬！
　　軟件股走個別。中軟國際（００３５４）今日就有近１巴仙落袋，報３﹒９７銀，都叫做對
缸友有所交代。佢同時亦係「深港通」概念股嘅金蝶（００２６８）今日唔見近３巴仙，報
３﹒３銀！「港股通」新貴天鴿（０１９８０）仲慘，無咗近９巴仙，報５﹒４６銀。

＊生發發券商今日鬥淒情，歐洲股碌低大象卻精靈＊

　　意粉國憲制改革公投一如所料被否決，總理倫齊決定辭職，因為驚當地錢莊會唔穩定，歐元
兌美元一度跌到舊年３月以嚟最低。思捷環球（００３３０）、新秀麗（０１９１０）趴低１至
２巴仙，報６﹒４同２３﹒６５銀。大象（００００５）就唔理咁多，輕輕行前０﹒３巴仙，報
６１﹒３銀。
　　喺歐洲有唔少業務嘅李超人都有大動作。超人一號（００００１）以近６０億賣飛機租賃業
務畀長實（０１１１３），涉及逾７０架飛機。雖然野村唱好，話收購可以改善長實嘅收入來源
，但長實依然瞓低逾１巴仙，得返５１銀。超人一號就跣低０﹒４巴仙，報９３﹒４銀。兄弟長
建（０１０３８）斥４２０億買澳洲能源商Ｄｕｅｔ，跟住低０﹒３巴仙，收６４﹒４５銀。

＊東瀛開綠燈彈珠機爆上，摩通來祝福濠賭齊齊漲＊

　　上星期五（２日），東瀛眾議院內閣委員會通過可以令賭場合法化嘅「博弈解禁法案」，預
計遲吓正式表決後，最快可以喺臨時國會會期結束日之前通過。消息令到魚缸兩隻東瀛彈珠機公
司爆上。其中一隻Ｎｉｒａｋｕ（０１２４５）仲爆逾１倍，去到１﹒６７銀！最後收市都炒起
咗逾一倍，報１﹒４２銀，穩奪升幅榜第一名！街坊Ｄｙｎａｍ（０６８８９）就炒起３７巴仙
，報１５﹒１８銀。
　　兩年幾前講過對東瀛賭場有興趣嘅永利澳門（０１１２８）乘住消息炒起逾３巴仙，報
１３﹒６２銀。公司同其他街坊一樣都被摩通唱好。銀娛（０００２７）、金沙（０１９２８）
有逾２巴仙落袋，勵駿（０１６８０）就飛起近４巴仙，報１﹒７２銀。

＊萬科銷售跌股價應聲插，ＣＭＯＮ玩回吐膳源升得誇＊

　　萬科（０２２０２）１１月銷售額２９４﹒７億人仔，按月跌近四成，另外中證監主席劉士
余批評話險資「野蠻收購」係挑戰法規，萬科應聲直插７巴仙，報２１﹒７銀。
　　萬亞企業（０８１７３）更慘情，足足瀉走逾５９巴仙，報０﹒０１３銀，仲係今日最差魚
仔。皆因聯交所認為佢冇足夠業務運作支持上市地位，決定展開除牌程序。
　　半新丁膳源（０１６３２）繼續瘋狂之旅，今朝試過仆低逾１６巴仙，之後急急拗腰彈，埋
單斬穫４５巴仙，報１０﹒１８銀，計落比上星期上市招股價２蚊高４倍有多！
　　ＣＭＯＮ（０８２７８）加入魚缸第二日，腳軟軟唔見咗逾９巴仙，收２﹒９８銀，但都仲
係比配售價０﹒２３銀高近１２倍。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。