《小傳日記》真係成也侵侵，敗也侵侵！花旗魚缸可以曾經升破二萬一關，都係全靠憧憬經
濟政策有驚喜。點知而家驚多過喜，因為缸友擔心侵侵難以全面兌現減稅承諾，同埋國會就快對
醫保議案進行投票，不明朗因素堆埋一齊，道指噚晚大插２３７點或逾１巴仙，收２０６６８，
係５個月以來最傷嘅一次。另一邊廂，美元指數亦跌穿１００，係２月７號以來第一次！
外圍大地震，香江魚缸難逃震傷厄運，恆指一開市就裂口低開２５６點，之後愈跌愈深，最
多唔見３８６點至２４２０７，雖然埋單跌少咗ＤＤ，但都痛失２７２點或１﹒１巴仙報
２４３２０，四連升斷纜；國指喺中字輩舉白旗拖累下，亦跣低１８７點或１﹒８巴仙收報
１０４５６。
突如其來嘅恐慌，嚇到缸友急急沽貨，全日魚缸成交又上返千億銀，有１０３５億。
收市之後，長和（００００１）即派成績表，全年賺約３３０億增６巴仙，派息１﹒９４５
銀，好過預期。上星期曾因為腸胃炎入院嘅李超人，今日都堅持出席業績會。鏡頭所見，超人精
神奕奕，好勁呀！
＊安踏想濕平粉絲唔高興，獲大行垂青華晨跌轉升＊
體育健兒安踏（０２０２０）以先舊後新方式折讓８巴仙配股，淨籌近３８億可能用嚟「濕
平」，今朝開市前亦見到配股上板，結果全日跪低８巴仙，報２１﹒６５銀，係今日第３多成交
個股。
砵砵車華晨（０１１１４）今日由跌轉升，相當強勢，原來係因為獲匯證同埋中金升目標價
，匯證更加由１２﹒８銀升到１６﹒１銀，全日衝前４巴仙，報１３﹒２４銀。街坊吉利
（００１７５）仲巴閉，中午宣布全年多賺１﹒３倍勝預期，股價即拗腰彈起近６巴仙收
１１﹒９８銀，表現冠藍戰！
愛特麗皮革（０８０９３）控股股東打算折讓９巴仙配股，雖然成交得９３６萬銀，最終都
炒起３９巴仙，報１﹒５３銀。
新丁民生教育（０１５６９）今朝高開近４巴仙後升幅擴大，首掛收報１﹒５１銀，高過招
股價（１﹒３８銀）超過９巴仙，唔計手續費每手賺２６０銀。恭喜曬！
＊電能業績曳長建亦走低，金軟盈轉虧逆市照發威＊
電能（００００６）舊年純利逾６４億，跌１７巴仙，派息２﹒０２銀，雖然獲瑞信升目標
至７８﹒５銀，全日依然趴低近２巴仙，報６７銀。兄弟長建（０１０３８）成績亦麻麻，上年
賺逾９６億少近１４巴仙，雖然末期息增加到１﹒６３銀都好，一樣跣低逾１巴仙，收
６１﹒７５銀。
華能國際（００９０２）更慘情，上年純利逾８５億人仔，大跌近３８巴仙，瑞信維持「跑
輸孖屐」評級，結果瞓低逾５巴仙，得返５﹒４５銀，係最差表現國貨佬。
金山軟件（０３８８８）去年盈轉虧２﹒７１億人仔，不過有麥格理力撐話要升「他屐」，
加上佢出年可能將ＷＰＳ分拆喺深圳創業板上市；全日跳高近９巴仙，報２０﹒８５銀。
＊賓架齊唱淡恆安嘆淒慘，債市被睇實內險打個突＊
中移動（００９４１）聽日（２３日）就放榜，之前德國佬竟然話，如果中移派特息嘅話，
最多每股派４０銀！係！大家無睇錯，佢哋真係估話４０蚊！不過，唔知係咪吹得太大，缸友反
而唔多信。之不過，喺大跌市中中移動好穩陣，報９０﹒３５銀。
恆安（０１０４４）績後被多間「賓架」唱淡，麥格理話擔心佢原材料成本上升嘅壓力，降
級至「中性」，富瑞就削目標至７５銀，佢今日再碌低近５巴仙，收６０銀。
有傳阿爺打算加大力度監管債券孖屐，一眾內險嚇到鼻哥窿都無肉，聽日派成績嘅壽仔
（０２６２８）同埋中國太平（００９６６）跣低３至４巴仙，報２４﹒３同１９﹒７４銀；而
收市後揭盅嘅平保（０２３１８）都碌跌逾２巴仙，收４３﹒２５銀。
＊業績勝預期潤地照跪地，恆地十送一跌市好好揮＊
兩大內地磚頭藍戰士中海外（００６８８）同埋潤地（０１１０９）都喺中午派成績表，中
海外就多賺７巴仙去到３７０億好過預期，但股價就碌低近２巴仙，報２４﹒３５銀。潤地份成
績表都唔錯，上年盈利多咗一成去到１９５億，同樣係勁過預期；魚缸氣氛唔多好之下，只有跟
大圍唔見近２巴仙，報２２﹒０５銀。
合景泰富（０１８１３）就唔同啦，派特別息之餘仲獲瑞信大升目標價２７巴仙，最後逆市
彈高４巴仙，報５﹒８８銀。
本地磚頭恆地（０００１２）都好威水，賺多咗３巴仙去到２１９億，仲十送一紅股，缸友
都好受落，多間大行都唱好，曾經逆風跳起近４巴仙，最終仍然有１巴仙進帳，收報４８﹒０５
銀，係第二叻仔藍戰士。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
