《笑傲缸湖》小米會否再創奇跡，突破「２秒清貨」紀錄？

　　《笑傲缸湖》小米「餓銷」策略成功，終助爬過「星星星」頭，喺最近搶佔祖國手機孖屐嘅
龍頭寶座。最為人津津樂道嘅，係佢每當喺網上火速沽清貨品後，即大字標題「Ｘ秒沽清」，何
其威水。
　　呢招係咪人人都受？又未必，因小米早前喺寶島宣傳極速沽清２﹒８萬部手機，被寶島公平
交易委員會斥有所失實，罰款６０萬台幣。小米有無被嚇驚而收斂？睇怕就無啦，事關佢剛以相
同手法，力攻印度孖屐。
　　話說小米上周二（２９日）喺印度作首次網上首賣，只需５秒，就將２萬部手機全數沽清，
成為一時佳話。見孖屐咁渴巿，小米再喺噚日（５日）推多１﹒５萬部機應巿，但點知公布創下
「２秒」嘅神話。依據人均語速每秒四字計算，２秒鐘僅夠講兩句「四字成語」，會否真係有１
﹒５萬個巴打喺２秒內能完成訂購手續？
　　小米以渲染嘅語句作宣傳，並非首次，就好似佢哋上個月嘅發表會，官方指有２億人睇直播
，但被巴打踢爆直播期間網站並無異動，據稱實際只有十數萬人而已。講真，若突然有２億嘅瀏
覽壓力，強如蘋果嘅伺服器都ｄｏｗｎ機啦，可想而知小米嘅吹水能力有幾高明。
　　小米喺印度嘅火熱，可否再下一城、突破紀錄呢？唔知有無「負秒數沽清」嘅奇跡。Ａｎｙ
ｗａｙｓ，聽聞印度都無公平交易委員會，睇嚟就算點宣傳，都唔使驚被罰。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。