RSS訂閱 外圍局勢持續緊張，「侵侵」揚言如果北韓再威脅花旗國，就會有激烈回應，但「肥仔金」一樣冇有怕，更加話會研究攻擊關島。孖屐嚇到腳軟軟，花旗國道指跌３３點結束連續９日破頂嘅走勢，香江魚缸３連升過後，今朝（９日）都曾借機回吐逾二百點。
ＭＳＣＩ明晟將會喺１０日（香江時間翌日清晨）公布新一輪季檢結果。記得５月果一次，摩指出「彈弓手」，原本獲納入中國指數嘅美圖（０１３５７），因為未過禁售期、流通量不足，第２日即被踢番出嚟。
不過，除咗董事長蔡文勝、ＣＥＯ吳潭源禁售期長達１２個月之外，上市前投資者（當時持股合共近四成）禁售期已經喺６月屆滿。換言之，美圖今次應該坐定粒六「入摩」！美圖之前
３日已偷步累漲近１８巴仙，有力順勢再挑戰４月高位１４﹒３４銀，缸友可以小注一博。
美圖將於２４日放榜，望住上兩年夾埋蝕成８５億人仔嘅往績，有憂慮可以理解，但公司近期動作多多，先同ｆａｃｅｂｏｏｋ合作推ＡＲ相機特效，後同Ｇｏｏｇｌｅ合作導入廣告平台，美圖有上億活躍用戶，若然真係好似董事長預計咁，明年全面進入盈利狀態，潛力一啲都唔細。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
