經典電影《鐵達尼號》Jack同Rose嘅故事深入民心,令套戲成為飆破10億美金票房大關。米字國就有旅行社想食呢條水,推出浪漫旅程畀《鐵》迷,不過就唔係人人都付擔得起啦!
探子消息回報,一間米字國嘅旅行社「藍色大理石」(Blue Marble)打算推出一個「潛水到鐵達尼」旅程,承惠10﹒5萬鎊,即大約100萬港紙!旅程預期2018年5月開始,到時旅客可以潛往鐵達尼號殘骸,一睹呢艘有「百年船齡」嘅巨船真貌。
之前有研究稱,有一種「極端細菌」,有機會消滅呢隻沉船殘骸,所以呢,唔少富豪爭住報名,據指呢個團目前已經額滿啦。個行程有八日,從紐芬蘭、楓葉國開船,一直潛行喺大西洋表面以下兩英里處,旅客可以喺一個由特製鈦同碳纖維製成嘅潛水器入面休息。唔想淨係睇船?無問題!個旅程仲包括咗3個潛水日,可以連續潛水三個鐘,同海底生物暢遊。
雖然《鐵達尼號》嘅故事好浪漫,但呢種要花費百萬銀「倒錢落海」式來發思古之幽情,真係唔係個個人有呢種「食力」。《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情