RSS訂閱 花旗國魚缸噚晚（１９日）係威係勢，標普同納指齊齊破頂，香江魚缸今朝都高開９８點，朝早再創兩年高位。
內地錢莊上禮拜升過一浸之後今個星期又平靜番Ｄ，德銀就出嚟唱好錢莊股，話對錢莊睇法轉向正面，主要係因為阿爺大搞供給側改革，令工業企業盈利好睇番Ｄ，同埋內地磚頭風險降溫番，德銀因此睇到資產質量同埋邊際利潤有逐步改善跡象，仲升埋農行（０１２８８）同埋交行（０３３２８）評級去到「買貨」。
呢個星期資金都係炒科技股，見ＱＱ（００７００）同瑞聲（０２０１８）今朝又破頂就知，兩間錢莊今朝暫時都無咩升跌，雖然目前個市升到兩年高位，但內銀估值仲係算平，普遍
ＰＥ只有５至６倍，股息率都仲有半成左右，炒完科技股有可能再番炒內銀，就算唔識升收住
５巴仙息都爽呀。宏觀Ｄ睇，祖國ＧＤＰ未有放緩，相信內地營商環境都仲係ＯＫ，壞帳問題有可能改善都唔出奇，未有貨嘅一於買番多少等半年業績期啦！首選都係建行（００９３９）同中行（０３９８８）等四大錢莊。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
