RSS訂閱 呢兩日最多人講一定係佳源國際（０２７６８），因為尋日（１７日）股份洗倉曾跌過九成，由１３銀洗到落１﹒４銀。
各位缸友都應該久經訓練，面對如此誘惑，好多噚日都開始「勇敢」地撈底，而且噚日見到好多掛買盤都係外資投行，今日都應該有唔少人食胡賺到笑。
我哋又理性咁分析下。佳源國際主要做內地房地產開發，２０１８年半年度運營業額約４１﹒２９億人仔，按年升４２％；股份係２０１６年３月份上市，定價２﹒４８銀；公司ｃａｓｈ ｆｌｏｗ截至２０１７年尾有６７億人仔。以業績表現計，其實佢算係一隻發展中嘅細價內房股，一路業績都無問題。
噚日因佢個債券到期引發股價急挫，以佢個現金流計算應該唔會無數找。加上呢種不問價出貨嘅跌法，點睇都似係有個別股東股份抵押股份到期後砍倉，而且唔係個別單一事件，係三幾間細價內房一齊洗，可想而知呢位老兄可能係行內權威人士且資金鏈斷裂。
股價被急洗，有中環人傳出，本身呢隻股已經被幾個大股東收乾晒街貨嘅水，只要有一個人頂唔順就會出貨肯定會急洗，而點解要收乾水推高股價，主要係因為方便融資，都係行內金融財技。
就咁睇，其實公司業績或者業務都無出事，過往又無乜點出現過舞高弄低玩財技，只係個別股東出貨引發股價大挫，所以本身隻股係有實力有價值。噚日成交量有３﹒５億股左右，而今日一個早上成交量都已經３億股，睇到掛買賣盤都係散戶居多，如果你相信投資價值法，可以現價入小小搭下順風車，因為都見過低位，再洗多次機會唔大，值博率都叫高。
但因為唔知有幾多貨被低價放出，所以買入後要嚴格操控止賺止蝕，止蝕以１５％為基準；如果向上升見到轉勢就好出貨食胡，畢竟都係搭順風車，當小注買下大細心態都幾唔錯！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
