RSS訂閱 《笑傲缸湖》盈盈有個喺花旗國嘅姊妹，啱啱喺ｗｈａｔｓａｐｐ度話我知，佢差ｄ炒車，
因為噚晚開完ＯＴ揸車返屋企經過Ｍ記（麥當勞），見到個Ｍ字調轉咗嚟擺，初頭以為自己係唔
係老眼昏花，明明晏晝經過嘅時候好正常，但望真Ｄ個「Ｍ」字真係變咗「Ｗ」字，正當盈盈呢
位姊妹一邊望一邊喺度諗，邊個咁大整蠱，將個Ｍ字反轉嘅時候，就差少少撞埋前面棵樹度。
盈盈聽到除咗嚇一跳外，都同呢位姊妹一樣喺度諗，做乜Ｍ記要咁無聊調轉個Ｍ字，盈盈
於是ＧＯＯＧＬＥ一下，原來今日（８日）係「國際婦女節」，而Ｍ記為咗慶祝呢個節日，就決
定將個Ｍ字調轉變成Ｗ字，即係代表「ＷＯＭＥＮ」咁解喎。
除咗花旗國某幾間店舖反轉個Ｍ字外，就連Ｍ記個網站亦都將Ｍ字反轉以響應「國際婦女節
」，仲有唔少網民將Ｍ記個英文名改做「ｗｃｄｏｎａｌｄ」。Ｍ記就發聲明話，反轉個Ｍ字，
係為咗紀念全球各地女性嘅卓越成就咁話喎，仲好自豪咁話我地每十個餐廳經理入面，就有６個
係女人。不過，盈盈喺呢一刻只係好好奇，究竟係點樣將個Ｍ字調轉。
盈盈就覺得Ｍ記簡直係行銷高手，之前推出木蘭醬個陣時搞到全花旗國唔少Ｍ記都打晒蛇餅
，今次只不過將個Ｍ字調轉，唔少人都好似發現新大陸咁影相放上社交媒體，變相幫Ｍ記做宣傳
，Ｍ記喺ＩＧ（Ｉｎｓｔａｇｒａｍ）嘅粉絲數量更加係出現急增，相信嚟緊可以刺激佢籌備咗
四年，而喺五月推出嘅新鮮牛肉漢堡銷量。
講返「國際婦女節」，盈盈最羡慕嘅都係俄羅斯人，因為喺呢一日，俄羅斯嘅女仔都會收到
唔少花，而最重要嘅係，佢地有得放假，而盈盈就要繼續開工…。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
