RSS訂閱 《笑傲缸湖》現今安卓（Ａｎｄｒｏｉｄ）手機雖然稱霸全球手機「孖屐」半壁江山，龍頭
三星，以及近年急速崛起嘅一眾神州手機品牌，但佢地嘅安全性始終一直惹人詬病，而一向懶開
盈盈，幾乎所有錢銀交易都十分依賴高科技，如果盈盈部手機萬一被人入侵咗，就真係兩袖清風
咯。為咗自己嘅荷包安全著想，盈盈一直始終如一，只會用蘋果嘅產品，即使買起上嚟相當肉赤
﹒﹒﹒﹒﹒
盈盈今日無聊用吓手機，又被我發現到有關安卓手機安全性嘅問題。係人都知，而家唔少手
機都可以靠你個靚仔靚女樣嚟開鎖，懶開有條路嘅盈盈當然亦會用呢個功能啦，前排花旗國媒體
福布斯《Ｆｏｒｂｅｓ》一個記者哥哥就做咗個測試，用另一個一模一樣嘅自己嚟解鎖部電話。
盈盈講嘅咪就係而家咩都複制到嘅３Ｄ打印技術囉，呢位哥哥去咗米字國一間工作室，裡面
大嗱嗱有５０個鏡頭，喺唔同嘅角度去影個位哥哥嘅靚仔樣，然之後就將個圖像放入編輯軟件進
行分析，並用３Ｄ打印技術，用石膏按照個樣?造出一個一模一樣嘅假人頭，總共承惠３００英
鎊，即近３０００港紙。
記者哥哥之後就拎起個假人頭，用嚟解鎖「唉瘋Ｘ」、三星ｎｏｔｅ ８、三星Ｓ９、
ＬＧ Ｇ７ ＴｈｉｎＱ同ＯｎｅＰｌｕｓ６，結果只有「唉瘋Ｘ」最「醒目」冇被個假人頭呃
到，其他手機統統中晒招！事實上，同樣嚟自泡菜國嘅三星同ＬＧ，如果閣下用自己嘅尊容進行
解鎖時都會彈出警告，話有關解鎖方式安全可靠性低。相反，嚟自神州嘅ＯｎｅＰｌｕｓ６就連
一個警告都冇。而「唉瘋Ｘ」因為會製作用戶面容嘅３Ｄ地圖，所以就算係雙胞胎都能夠準確分
辨！
蘋果最新出嘅「唉瘋」雖然被唔少缸友話貴兼冇咩新意，但勝在蘋果喺保護用戶個人資料方
面花咗唔少心機，真係值得盈盈對佢從一而終架。
《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
