《笑傲缸湖》騰訊肥牛一車車入屠房！

　　唔講唔覺，原來今日已經係立秋，但出面熱到喊，體溫感分分鐘去到30幾度；另一邊廂，今日牛隻屠房真係好忙，因為突然間一車車牛送入去「受靶」，真係阿彌陀佛囉。

（i Stock圖片)

　　今日個市點解咁刺激？是咁的，原本侵侵（特朗普）迫字節跳動係呢個幾月內賣走TikTok，之後微軟已經睇上，點知半路殺出個程咬金，QQ（00700）話自己都有興趣收購；侵侵有理無理，簽個行政命令禁止ＱＱ同字節跳動進行交易，即係話最後逃生門都閘埋你。

　　不單止咁，侵侵仲出手，封殺QQ喺美國嘅微信業務，仲迫一堆喺美國上市嘅中概股退市。之後就好睇囉，魚缸今日血流成河，QQ更曾大挫一成！「啪．啪．啪」我聽到一隻隻騰訊牛跌低，一隻、兩隻、三隻、仲有一隻，今日中午埋單就啪死咗99隻騰訊牛。

　　可想而知，大戶屠牛屠得幾凶狠，500銀收回價以上嘅牛仔一隻不留，因為今日QQ股股價剛好跌落去499﹒4銀就掉頭，收市報527﹒5，跌5%。啊！鬼馬啊你！另外，恒指牛有112都打埋靶，今日想博反彈嗰班真係眼淚在心裡留。

　　盈盈我近期都係加入淡軍為主，今日靠熊仔執少少咁。所以話，炒股嘅嘢幾時都係順勢炒，等你班好友開心咁耐，立秋之日正係我打邊爐之時，等我去街市買兩斤肥牛賀賀佢！

撰文：任盈盈

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G 

etnet榮獲HKEX Awards 2023 「最佳表現證券數據供應商」大獎► 了解詳情