先施馬景煊：兩年內扭轉頹勢

　
　　轉型的代價，先施(00244)好清楚，半年內豪花過億開三店，令去年中期虧損擴大，早前發盈警，預告全年盈轉虧。不過，副主席兼行政總裁馬景煊接受《經濟通通訊社》專訪時強調：「無後悔，有信心兩年內扭虧。」
　

馬景煊︰有信心兩年內扭虧

　　
銅鑼灣店生意未達標
　
　　「新店試業足足五個月，生意仲未達標。」先施銅鑼灣波斯富街新店佔地超過兩萬呎，原定去年底開幕，結果一拖再拖，到上周四(10日)才正式開幕，現場所見外牆尚未修葺好，人流欠奉。
　

銅鑼灣店剛拆下掤架，但外牆尚未修葺好。

　　
　　馬景煊亦坦言，今年零售市道差過去年：「港股好波動，呢排Chok上Chok落，零售業好似探熱針，股市跌果時啲人買嘢都手緊啲。」意味著今年生意難見顯著好轉。
　
　　他解釋截至今年2月底止年度將錄大幅虧損，是由於三間新店簽訂8至10年長租約，租金大升加上前期投入，逾億元資本開支要花數年攤分。
　
中環店明年或收支平衡
　
　　好彩有好消息，「中環新店pick up得最快，舊旗艦店客人買開有感情，員工亦銜接得最好，有機會明年就收支平衡。旺角新旗艦店生意、人流都有好轉。」
　
　　他話鋒一轉：「我仲有殺手鐧，先施瘋狂大減價！」趁著下半年零售旺季，先施旗下七間百貨全線有推廣活動促銷，「絕對可以帶動今年整體客流量升雙位數，第時收入增長會追到貴租，兩年內扭虧應該無問題。」
　
先施創先河，QR code賣家品
　
　　面對租金不斷加，先施仍有計！馬景煊說明，旺角新世紀廣場店因業主決定劏細鋪，面積大減三分二，大型家電要搬走。他忽發奇想，決定下月起在店內放置QR code牆，陳列近100款貴價家品，「最貴嘅係一萬蚊個電飯煲，可以喺其他分店調貨，就算我哋唔齊貨，都可以幫個客代訂，又慳位又慳租又唔洗壓住啲貨。好flexible。」若反應理想，先施下一步會開網店，再考慮包辦送貨物流。
　
　　114年歷史的先施，見證著香港零售百貨的興衰，成功抵禦過一田、崇光競爭，近日阿信屋(00759)等新血亦踩過界開設家品店，怕不怕地位不保？馬景煊收起笑臉突然嚴肅：「先施從來唔怕競爭，唔怕貨比貨，百年老店可以再做多一百年！」
　
先施豪擲百萬拍大學生真人騷，最觸目竟然是馬太？
　
　　千億新抱徐子淇、金牌經理人黃柏高、理工大學校長唐偉章都為先施撐場，就知集團今次落重本，副主席兼行政總裁馬景煊接受《經濟通通訊社》專訪表示：「洗咗7位數拍真人騷，唔輸得。」
　
大學生韓國競技
　

一班理工大學生遠赴韓國挑選最新時裝。

　　
　　先施為撇甩「百年老餅」包袱，破天荒與理工大學合作，贊助脫穎而出的紡織及製衣學系學生飛到韓國首爾擔當買手。上周四，先施銅鑼灣新店開幕，播放電視台真人騷trailer，三組共12位大學生，在明洞、梨大搜索最新服裝、在東大門馬路上型格行catwalk，配襯搖滾背景音樂、絢爛真摰笑容，相當熱血。
　

先施銅鑼灣新分店己預留一成當眼位置出售韓服

　　
　　馬景煊隨即敲響韓國鼓，「3、2、1，Fashion　Seoul大激戰總決賽正式開始！」參賽者選購的貨品下月中於店內發售，並以銷售額、利潤及網上投票決一高下。
　
　　「個idea係我哋諗出黎，再同電視台傾，點知一拍即合。」他說這輯真人騷花費逾百萬元，幸得花旗銀行等金融機構支援「帶嚟幾多直接生意好難計，但係要做畀你哋睇，先施真係變緊，要你哋改觀！」
　
韓圜升值無阻先施賣韓貨
　
　　比賽萌生，反映先施銳意年輕化，力拓韓流服飾：「旺角瓊華店是我哋第一間賣韓國衫嘅舖頭，初步反應好好，後生客人多咗差唔多一成。」銅鑼灣先施亦已預留一成舖位放置韓國女裝。
　
　　不過，就在開幕禮當天，韓圜繼續升值，1美元最高兌1031.5韓圜，再創六年新高。但他一於少理：「韓服平均定價最貴咪500幾蚊，平過以往主打嘅歐洲服裝一半有多，韓圜點升都好，啲貨仍然好平，會keep住入貨。」
　
星光熠熠
　
　　「今日我唔講嘢啦。」徐子淇穿著Stella　McCartney早春粉紅裙款清新撐場，單是擠出招牌酒窩笑容，足以吸引全場目光。親赴韓國參與拍攝的薛凱琪，則穿著5吋高踭鞋及黑色背心高叉裙鬥豔。不過，最觸目的竟然是馬景煊太太，身穿一襲鮮紅傘裙配閃爍鑽戒手鏈，展露主人家風範。
　
　　在場男生亦不讓女士專美，馬景煊：「你做咩化妝呀？」男大學生：「靚囉！」「咁貪靚，駛唔駛呀？」「你有無化妝？」「今日無喎，我用真面目見人，夠晒靚啦。」
　

文：彭麗芳　攝：Dennis

【你點睇】本港主要銀行跟隨美聯儲減息，你對樓市前景有否信心？► 立即投票