《小傳日記》缸邊唞唞再闖關，創板魚毛有點煩！

　　《小傳日記》花旗魚缸個別發展，道指連續第９日創收市新高，收升３２點至２０７７５點
，但標普指數就有Ｄ回吐收２３６２點。外圍暫時總算風調雨順，無驚無險，繼續整固；除咗有
業績支撐吓外，孖屐都仲等緊侵侵發表經濟政策細節。
　　香江魚缸都差唔多，自從升返上去二萬四關後，就開始進入整固階段，懶理缸外天氣轉冷。
天文台已經發出寒冷天氣驚告，預測未來兩三日天氣寒冷，聽日（２４日）市區最低氣溫約１２
度左右，新界會再低一、兩度。
　　回說大市，今朝（２３日）恆指低開７９點後就窄幅上落，無太大變動。恆指收市象徵式唔
見８７點報２４１１４；國指就微軟１６點，報１０５２１。格局仍然係炒股唔炒市，資金市下
，全日成交都有８１８億銀左右。
　　目前缸友焦點都落喺，舊年９月９號２４３６４呢個重大阻力位，如果好友成功攻破，下一
站二萬五好快達到喇。

＊缸外濕又凍缸內見整固，大象再回購收市輕踏前＊

　　大笨象（００００５）噚晚喺倫敦開始第二輪回購，斥資２７７４﹒７萬英鎊回購
４１１﹒３萬股，而佢宣派嘅末期息２１美仙就喺今日除淨。雖然惠譽預期，大象今年盈利前景
疲弱，佢全日依然行前０﹒４巴仙，報６４﹒０５銀。小象（０００１１）卻要跣低逾１巴仙，
報１６１﹒９銀。
　　新世界發展（０００１７）噚日放榜之後，獲一眾「賓架」唱好，高盛將目標升至１０﹒１
銀，瑞信都調高「他屐」至１２﹒２銀，結果佢彈高逾３巴仙，收１０﹒１銀。
　　安踏（０２０２０）舊年賺２３﹒８６億人仔多近１７巴仙，又獲美銀美林升目標至
２６﹒５銀，話成績符合預期，但都要趴低近４巴仙，得返２３﹒４５銀。

＊大行來祝福新世界風騷，業績符預期安踏價卻糟＊

　　香江證監會ｔａｋｅ　ａｃｔｉｏｎ打擊創業板炒風，噚日上場嘅駿傑（０８１８８）中午
後就被勒令停牌。公司發通告指，係因為證監認為股份交易無達致公開市場，依家正處理緊問題
，同為恢賽尋求意見。用同一間上市包銷商太平基業證券嘅利駿（０８３６０）噚日已經急插逾
四成，今朝試過反擊逾１０巴仙，但好快就調頭再插過，結果埋單又蒸發逾８巴仙收０﹒２７５
銀。太平基業證券媽咪ＰＦ　Ｇｒｏｕｐ（０８２２１）今日亦要跌近６巴仙收３﹒３銀。
　　同係創業板嘅中國三三傳媒（０８０８７）就被洗倉創新低，８５００萬銀大成交跣低四成
收０﹒０８２銀，係最差表現個股。但暫時未知係咩原因，不過揸住創板魚毛嘅缸友，要小心Ｄ
喇。

＊創板大上落扣好安全帶，名錄正更新藥股齊抽升＊

　　內地更新咗醫保目錄，１﹒５萬億人仔藥品市場格局可能會洗洗牌，好幾隻醫藥股午後都突
然炒高，成交都多咗唔少，當中最勁係三生製藥（０１５３０），一口氣突破咗１０天、２０天
、５０天同埋２５０天線，相當勁，全日飛起１９巴仙，報９﹒１１銀，成交高達６﹒８億。
　　街坊石藥（０１０９３）亦都好巴閉，曾經高見１０﹒２銀破頂，最終就衝前２巴仙，報
９﹒６９銀。
　　聽日派成績表嘅共享經濟（０１１７８）偷步炒高近１１巴仙，收報０﹒２４７銀，曾經創
年半高位；中國生物製藥（０１１７７）今日亦都創過一年高位，收升近４巴仙，埋單６﹒９７
銀。

＊中移逆市跌落後又如何？賭仔甚靚仔銀娛都話好＊

　　近日大市雖然幾旺，但落後開嘅中移動（００９４１）仍然無厘神氣，今日雖然錄２億幾銀
市前大手，但都幫唔到佢表現，結果今日要腳軟１巴仙，收報８６﹒３５銀。
　　中國信達（０１３５９）獲中金升目標價超過三成，話佢會受惠商品價格上漲同埋房地產價
格見底回升等等，仲納入埋確信買入評級添，最終跳高近６巴仙，報３﹒１４銀。
　　賭仔今日都好生性，逆風跑前，銀娛（０００２７）有近２巴仙進帳，報３６﹒８５銀，係
第二勁藍戰士；金沙（０１９２８）都彈起超過１巴仙，報３２﹒２５銀。請請！
　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。