《古臣周記》「孖屐」繼續聚焦中美貿易戰,「侵侵」上個星期話中美貿談有成效,仲話關
稅可以延期,刺激魚缸最高試過上二萬九呢個大關,但部分公司嘅業績走樣,缸友想買貨都唔太
放心。
不過,缸友又唔使怕會有大調整,因為全國政協及人大會議(「兩會」)將會喺下星期開幕
,而且MSCI將喺3月1日公布係咪擴大A股權重嘅結果,所以A股最近表現都十分強勢,對
魚缸嚟講短期要跌都唔係咁易。
*兩會期間升幅機率大,中資券商股及A股ETF受捧*
全國政協鐵定喺3月3日起舉行,全國人大3月5日開幕。往年兩會前後一啲環保相關嘅魚
毛都會炒高,不過今年就見到例外,反而一啲中資券商佬,同A股ETF就有唔錯嘅升幅。其實
,A場近來表現十分理想,上證1月份到依加已經反彈超過11巴仙,星期一同星期二(25至
26日)深滬兩地嘅魚缸,單日成交過萬億人仔,亦創2016年4月以嚟近3年新高。
根據過往數據睇到,2000年之後上證喺兩會之前十個交易日同五個交易日,上漲機率都
有逾六成,後20個交易日漲幅更加有七成以上,夾埋MSCI擴大A股權重嘅結果公布在即,
外資已經偷步炒起A股。有統計指,今年淨流入A股嘅北向資金,已突破1000億元人仔,首
兩個月嘅單月淨流入規模,分別係滬深港通開通以來最多同第四多。而且,場外融資死灰復燃,
當中10倍槓桿係最基本,自然成為中資券商佬,同A股ETF上升嘅誘因。
講返兩會,現時雖然未有具體措施釋出,不過阿臣都有一啲方向可以同缸友分享吓,之前拍
板通過嘅科創板應該會公布更多具體細節;而上年兩會曾經講過要抗癌藥品要降到零關稅,喺利
民生嘅大前提之下,對醫藥股嘅監控應該唔會放鬆,可能仲有機會擴大「帶量採購」嘅範圍,所
以醫藥板塊可能唔掂會比較好。
另外,粵港澳大灣區、5G發展同降稅減費嘅具體措施,預計兩會都會接觸到,所以缸友都
要留意吓啊。
*賣出新創建賺近三千元,繼續持有潤電*
上個星期,大象(00005)公布業績表現遜「孖屐」預期,而且亦做唔到
「positive jaws」(收入增幅高於支出)嘅策略目標,全年支出增幅高於收入
1﹒2巴仙,再加上各大錢莊,好似渣打(02888)嘅業績都麻麻,喺脫歐前景未明朗下,
現時似乎唔沾手大象比較好。
講返個倉,阿臣揀嘅潤電(00836)意外被剔除恆指,股價穿15銀關口,不過阿臣想
睇多幾日,先考慮沽貨定入多手。另一隻新創建(00659)噚日出咗業績表現麻麻,阿臣見
到噚日已經急急腳喺20﹒1嘅時間放手,好彩帳面上仍然有賺。
踏入三月業績期,古臣先拎住「茄殊」睇吓邊隻魚毛吸引再作考慮。
表列截至2月27日(11:00am止)投資組合表現:
股份 股數 平均買入價 現價 總值
----------------------------------------
港股:
華潤電力 2000股 15﹒90元 14﹒94元 29880元
----------------------------------------
一周買入╱賣出股份
----------------------------------------
股份 每股作價 數量 計及手續費後金額 盈╱虧
(不計手續費)
----------------------------------------
賣出:
新創建 20﹒10元 1000股 套現20060元 2860元
----------------------------------------
股票市值 : 29880元
剩餘現金 : 125310元
組合淨值 : 155190元
組合本月收益表現: + 3﹒1%(截至上月底止組合淨值:150490元)
組合累計收益表現: +47﹒8%(本金105000元計)(2016年8月開倉)
*數據截至今日11:00am
etnet榮獲HKEX Awards 2023 「最佳表現證券數據供應商」大獎► 了解詳情