《小傳日記》魚缸尾市見頭暈，ＱＱ績前小翻身！

　　《小傳日記》花旗魚缸日日係咁升，不知不覺已經連升七日，噚晚（１５日）喺科技股領軍
之下，加上油價急漲，帶動道指尾市由跌轉升，收漲５４點報１８９２３，距離萬九大關不遠矣
，更連續第四日創收市新高添！
　　香江呢邊就繼續受人仔九連貶困擾，而今日收市後放榜嘅ＱＱ（００７００）一度帶領恆指
向前衝最多１７５點，一掃近日頹勢！可惜收市前無力，成班中字輩又跌多咗，最終恆指升幅全
銷，埋單倒跌４３點報２２２８０，國指跣低３５點報９３６２。
　　魚缸企唔穩，缸友唯有一心寄望「深港通」開車沖喜，但試過咁多次「狼來了」後，大家都
怕怕。就算今日又再傳出２１號開車，都唔敢輕舉妄動，全日成交都只得近６５９億銀。

＊美股七連漲人仔九連貶，升升跌跌間魚缸差一線＊

　　ＱＱ將會喺今日收市後放榜，由於之前ＱＱ被大鱷質低，所以今次業績表現更受矚目，孖屐
預測ＱＱ第三季表現繼續驕人，今日就復仇彈高２巴仙，報１９６﹒９銀，撫慰廣大粉絲嘅心靈
。
　　缸湖傳聞大笨象（００００５）、摩通同法蘭西農業信貸銀行，涉嫌操控歐元同業拆息面臨
監管機構責罰，可能又要罰錢喇！呢排升唔停嘅大笨象難免有少少失落，好彩跌幅唔夠１巴仙，
報６１﹒４５銀。
　　孖屐盛傳大花筒樂視面臨資金流危機，結果老闆賈躍亭要向同窗朋友求助，獲得６億美金融
資，真係要唱番首《友誼萬歲》！樂視旗下酷派（０２３６９）興奮收復３巴仙，報１﹒０３銀
，而作為樂視嘅手機零件生產商，瑞聲（０２０１８）都鬆一口氣，飛上近３巴仙，報
７０﹒１銀。至於敏華（０１９９９）今日公布業績，順便澄清無投資樂視，同樣跑前近６巴仙
，報５﹒２９銀。

＊大象回回氣最怕又罰款，中海外換帥全系要捱沽＊

　　中海外系出現人事震動，中海外（００６８８）主席兼總裁郝建民突然辭任，公司無交代離
開嘅原因，而且郝建民係近幾年可以話全系嘅靈魂人物，曾主導多次併購行動，咁大嘅人事變動
無理由唔事先吹吹風。細摩覺得事有蹊蹺，缸友亦都好關心，中海外跣低超過３巴仙，報２２銀
；分拆出嚟嘅中海物業（０２６６９）插水超過６巴仙，報１﹒４５銀；中海宏洋
（０００８１）更無咗逾８巴仙，剩低２﹒８銀。
　　各懷鬼胎嘅油組減產會議又見曙光，產油國開始互相接觸，令油價大升近６巴仙，油股乘勢
復仇，中海油（００８８３）彈高近２巴仙，報９﹒７３銀，中石油（００８５７）跨前近１巴
仙，報５﹒２１銀。油服股心情好，中海油服（０２８８３）行前逾１巴仙。

＊油價急反彈油股輕踏前，航運有錢途海上鬥衝線＊

　　波羅的海乾散貨指數（ＢＤＩ）連升９日，噚日再漲１９點至１０８４創一年高。中海集運
（０２８６６）揚帆衝前逾１巴仙，報１﹒７銀；太平洋航運（０２３４３）更加駛前近６巴仙
，報１﹒３銀。中遠洋（０１９１９）上個月吞吐量增加近半成，亦跟住行前近４巴仙，收
２﹒９３銀。
　　神州又傳嚟消息，同之前嘅講法一樣話「深港通」會喺下周一（２１日）正式通車，細細粒
嘅平安證券（００２３１）一度興奮跳高近１９巴仙，但唔夠力，埋單只飆近６巴仙，報
０﹒０９５銀。生發發（００３８８）唔識郁冇升跌，報２０３﹒４銀。中信証券
（０６０３０）更腳軟近１巴仙，埋單１７﹒６６銀。

＊精優發盈喜個價即彈起，雲裳衣威威濠賭亦歡喜＊

　　精優藥業（００８５８）發盈喜，話因為換股債投資衍生工具嘅公平值虧損減少，中期業績
由虧轉盈，即刻應聲飛起２０巴仙，報０﹒３銀。
　　雲裳衣（０８１２７）下星期二（２２日）開始將每手買賣單位由２萬股改為１０００股，
今日大發神威，爆炸式升起近２１巴仙，報１３﹒９８銀破頂。
　　另一邊廂，半新丁節能元件（０８２３１）就繼續散水，直插２５巴仙，得返０﹒６銀，但
依然比上個月７日上市配售價０﹒２銀高２倍。
　　馬交特首崔世安話，有信心出年經濟會回復正增長，又維持出年賭收２０００億澳門元嘅預
測。銀娛（０００２７）、永利（０１１２８）斬穫逾１同近３巴仙，報３３﹒５同１２﹒１６
銀。美高梅（０２２８２）最叻，踢高近４巴仙，收１５﹒１４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。