《小傳日記》輕吻兩萬三，見好立即收；半新丁重創，大象掉頭走！

　　《小傳日記》缸友憧憬歐洲央行今晚宣布會延長放水谷經濟，噚晚（７日）花旗魚缸率先偷
步炒高，道指瘋升近２巴仙至１９５４９點，再創新高好勁呀！
　　外圍氣勢咁勁，香江魚缸今朝梗係食住個勢，恆指開場就衝前２２６點，重上二萬三。只可
惜Ａ場呆呆滯滯，就連進出口數據有睇頭（上個月美金計出口增０﹒１巴仙，係８個月來首次止
跌回升，進口亦增６﹒７巴仙，遠好過預期）都推唔郁；再加上大象（００００５）無宣布再有
回購行動，搞到倒跌收場，而戰友ＡＩＡ（０１２９９）亦受壞消息困擾，跌近２巴仙。結果恆
指得番６０點進帳報２２８６１；國指就升６７點，收９８９６。
　　雖然二萬三得而復失，但魚缸其實旺場咗，成交急增１８巴仙至７３５億銀左右。缸友悶咗
咁耐，都忍唔住要出手喇！

＊回購停一停大象眉頭縐，長實續回購粉絲笑笑口＊

　　大象自８月開始回購咗咁耐，終於停一停手！唔通近日獲得大摩「轉軚」叫「掃貨」，大象
見已經升到高價錢，就唔再回購？抑或已經買夠？無咗回購刺激，加上被罰３３００萬歐元，結
果今日升到去６７﹒２５銀後調頭，最後跪低唔夠１巴仙收６５﹒３５銀。另一邊廂，傳花旗即
將搞掂對渣打（０２８８８）涉嫌違反制裁法嘅調查，但股價仍飛起近１巴仙，報６５﹒９銀。
　　長實（０１１１３）噚日亦用逾５億銀回購１０１８萬股，涉資５﹒２億銀，股價飛起近２
巴仙，報５２銀。　　
　　銀聯限制跨境支付，野村話對ＡＩＡ嘅影響未完反映晒，缸友解讀係股價仲有得跌。另外，
由於保監處新指引出年會生效，有風話友邦將會停賣兩款產品。今日（８日）公司唔見近２巴仙
，報４４﹒２５銀，成為最弱藍戰士。

＊野村來踐踏ＡＩＡ即撻，進昇失尾陣半新丁急插＊

　　建築新丁進昇（０１５８１）今日首日掛牌，招股價０﹒６銀，一開波就高開逾３３巴仙報
０﹒８銀，唔計手續費，每手賺１０００蚊。不過，進昇升勢維持唔到，升幅縮鬼晒，最後收報
０﹒６５銀，只比招股價高８巴仙！
　　噚日狂炒嘅半新丁，除咗隻盟科（０１６２９）今日仲有近１９巴仙進帳之外，其他都急插
水。ＣＭＯＮ（０８２７８）跌幅最多，成為今日嘅跌幅王，唔見近３９巴仙，報０﹒２４９銀
，但仲係高過配售價０﹒２３銀逾８巴仙。膳源（０１６３２）亦無咗近３７巴仙，報
１０﹒８４銀。金匯教育（０８１６０）傷勢輕啲，「只係」無咗近１８巴仙，報０﹒３銀，無
前幾名咁傷！

＊農村也４Ｇ電信即抽上，內房有苗頭今天齊齊漲＊

　　內地「十三五」規劃要加快高速寬帶網絡建設，同埋農村以及偏遠地區４Ｇ網絡覆蓋，消息
刺激聯通（００７６２）漲近２巴仙，報９﹒５銀；噚晚ＡＤＲ升近兩巴仙嘅中移動
（００９４１）就行前半個巴仙，報８４﹒５銀；中電信（００７２８）就衝前近２巴仙，報
３﹒７７銀。
　　內房今日表現都唔錯，當中融創中國（０１９１８）好威水，跳高６巴仙，報６﹒３８銀，
繼續慶祝早幾日公布上月合同銷售額飆近兩倍至２２５億人仔嘅消息吧！藍戰士中海外
（００６８８）月內第二次換ＣＥＯ，由龍湖地產（００９６０）前執董顏建國接任，中海外走
高近２巴仙，埋單２２﹒４銀，龍湖地產更有４巴仙進帳。

＊信義買靚地炒高來慶祝，兗州煤踢上有瑞信祝福＊

　　信義玻璃（００８６８）２１億銀購前海商業用地，公司打算用嚟起兩幢辦公大樓做總部，
今日炒起６巴仙，報６﹒０９銀。
　　中鐵建（０１１８６）打算發３４﹒５億人幣換股債，今日跣低近半成，報１０﹒５銀，係
表現最差國貨佬。
　　金風科技（０２２０８）同蘋果公司（Ａｐｐｌｅ）合作風電項目，仲轉讓埋幾間風電附屬
股權畀蘋果，結果金風科技彈高近半成，報１２﹒５銀。
　　瑞信睇好煤價，順手升埋兗州煤（０１１７１）評級同目標價至「跑贏大市」以及７﹒３銀
，股價飛起近８巴仙，報６銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。