按盤價 
《小傳日記》匯報今日（４日）魚缸戰果前，小傳先祝各位缸友，中秋節快樂，人月兩團圓
！不過，缸內一Ｄ放假氣氛都無，大家仲係好「忙碌」。噚日（３日）放完國慶假返來，就先享
受阿爺送上的「預告降準」，今日好友繼續食住個勢，除咗繼續掃祖國錢莊同股王ＱＱ
（００７００）外，另一火力集中晒喺「三馬概念」眾安（０６０６０）身上，揸住無放嘅就真
係肥仔喇！。
恆指今朝承接噚日個勢高開１３８點後，一口氣衝高最多３４８點，去到２８５２１點高位
，距離２０１５年４月嘅大時代高位２８５８８只差ＤＤ咋！雖然埋單時縮咗水，但都有２０５
點進帳收２８３７９，連升三個Ｔｒａｄｉｎｇ Ｄａｙｓ。Ａ場下星期一（９日）先復市；但
國指都威水，再踢起９１點報１１３９７，讚！
突如其來嘅旺市，缸友入貨都豪爽Ｄ，假期前全日成交都仲有８６１億銀左右。
＊月滿照中秋眾安特別圓，上周被震走今天心也酸＊
入缸第四日嘅眾安在綫相當巴閉，最新山頂位已經去到８０﹒５銀，埋單升咗近兩成，報
８０﹒３５銀，以招股價５９﹒７銀計，眾安累升咗近三成半。魚缸真奇妙，上個星期眾安至搞
到粉絲們好失望，話咁快又夾到飛起……其他保險街坊表現唔算突出，一哥平保（０２３１８）
升咗超過１巴仙，報６３﹒１銀。
神州錢莊大佬人行喺上個禮拜六突然話出年要降準，即係話出年神州錢莊可以用嘅錢多咗，
加加埋埋就為成個「孖屐」釋放出幾千億人仔嘅流動性。由於今次降準幾乎對所有錢莊都有著數
，加上事出突然，神州錢莊佬噚日表現都相當省鏡，貢獻魚缸三百幾點，今日表現雖然冇噚日咁
勁，但都繼續撐起個市，工行（０１３９８）噚日爆升咗近８巴仙，今日曾破頂見６﹒４８銀，
埋單升咗近兩巴仙，報６﹒３７銀，成交大嗱嗱有成３８億；建行噚日升咗近６巴仙，今日唔上
唔落，升咗唔夠１巴仙，報６﹒８８銀。
＊大行炒Ｄ乜昅實經濟通，匯證來祝福神華好輕鬆＊
呢排炒Ｄ乜？發覺好睇大行唱好Ｄ乜，想知最新資料？可以睇實《經濟通訊社》嘅【大行炒
Ｄ乜】！每朝９點前出街，睇定落盤啱啱好！好似噚日出嘅砵砵車吉利（００１７５），獲大摩
將目標價由１５蚊升到３０蚊，噚日炒高１２巴仙之後今日再衝前近半成，報２５﹒９銀，係第
２叻藍戰士；國貨佬比亞迪（０１２１１），早排已經被賜「紅底股」厚望，噚日就獲中信建投
將目標價由５３蚊大升到去８２蚊，今日踩油駛前近８巴仙，報７８﹒９銀。新晨動力
（０１１４８）獲阿媽華晨（０１１１４）注入發動機裝配線資產，阿仔跳高近２３巴仙，阿媽
就行前唔夠半個巴仙。
早前獲匯證升目標價嘅神華（０１０８８）今日繼續發力，抽高６巴仙，報１９﹒８６銀；
劇飛（００２９３）最新獲瑞銀升佢「他屐」同埋評級，最終飛高２巴仙，收報１２﹒１６銀。
＊內銀續有勢車仔更威威，丘鈦返來了昂納唔失禮＊
唔少手機設備佬上個月都一臉頹廢，丘鈦科技（０１４７８）喺九月份跣低咗近２３巴仙，
一到十月總算重振雄風，噚日升咗近８巴仙，順便升穿埋條廿天線（１４﹒７５９銀）。今日繼
續強勢，仲要跑贏所有街坊，彈高咗近７巴仙，報１６﹒２銀。高偉電子（０１４１５）喺上月
初高見５﹒７８銀兼創兩年幾新高後就形成咗一條「好靚」嘅下降軌，今日雖然升咗超過半成，
報３﹒６７銀兼收復１０天（３﹒５０２銀）同５０天線（３﹒６０５銀），但同兩年山頂位比
較，仍然跌咗近３７巴仙。
部分５Ｇ概念街坊落鑊，今日終於輪到昂納科技（００８７７）發威，全日一馬當先爆升咗
近１７巴仙，報６﹒１１銀，成交高達２﹒１６億銀添；ＱＱ今日畀瑞信唱好，「他屐」４１６
蚊，以今日收市價３４９﹒４銀計，即係話有成近兩成潛在升幅，而今日亦都再次破頂，最新山
頂位已經去到３５１蚊，埋單就升咗唔夠一巴仙。
＊股王輕踏前股仔禾雀飛，內房似回勇缸邊鬥破頂＊
雲博產業（０８０５０）呢期好猛料，連升３日累漲八成半之後，今日再飆近２﹒３倍，報
１﹒９７銀，由毫子股變成蚊型股！半新丁ＴＯＭＯ（０８４６３）亦都炒起超過３２巴仙，報
０﹒８６銀，係今日最威兩條魚仔。
內地磚頭今日表現唔錯，恆大（０３３３３）踢高近４巴仙，報３０﹒７５銀，試過高見
３１﹒１銀破頂；Ｋｅｅｐ住掃恆大嘅華置（００１２７）亦有近２巴仙進帳，報１４﹒０４銀
。融創中國（０１９１８）亦都高見４０﹒３５銀破頂，全日就彈起近７巴仙，報４０銀；給你
一個五星級的家嘅碧桂園（０２００７）都炒高逾７巴仙，報１３﹒４銀。假期愉快！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【與拍賣官看藝術】常玉作品屢創天價，背後其實藏著跌宕起伏的人生► 即睇
