《小傳日記》真的脫歐了，好友全謝了！

　　《小傳日記》雖然今日（２４日）唔係黑色星期五，不過對於好多買重米字國「留歐」嘅缸
友嚟講，今日簡直係「災難星期五」喇！今朝未開市之前，缸友都以為留歐派會勝出，香江魚缸
低開後亦好快收復失地，一度倒升逾百點上番二萬一關。
　　點知，形勢突然急轉直下，脫歐派成功反超前，英鎊直插到去１９８５年新低，低見
１﹒３２水平。最終喺下畫１點鐘左右大局已定，脫歐派勝出；官方隨後發表結果，指脫歐支持
率５１﹒９％，決定退出歐盟。首相卡梅倫亦為留歐失敗而請辭。
　　脫歐掀起骨牌效應，東瀛魚缸、歐洲三大股指全軍覆沒。外圍災情嚴重，恆指更加慘不忍睹
，最多暴瀉近千二點見１９６６２。缸友尾市定一定神趁低撈貨，恆指最終跌少一半，收挫
６０９點報２０２５９，國指插２５４點報８５３０。
　　歐脫了，股瀉了，鎊死了，人也謝了的一天，魚缸成交９９８億銀左右。

＊真的脫歐了股鎊唔識笑，大象長和系渣打齊被剿＊

　　米字國公投居然脫歐收場，環球魚缸大跌眼鏡，英鎊急瀉下，大笨象（００００５）最多震
散逾１２巴仙見４４﹒５銀，埋單就仍跣低近７巴仙，收報４７﹒４５銀，係今日最渣藍戰士。
今次真係傷！街坊渣打（０２８８８）亦更加急插逾９巴仙，埋單５７﹒７５銀。
　　有較多歐洲同米字國業務嘅超人系亦身不由己。長江基建（０１０３８）蒸發咗逾半成，報
　６９﹒９銀，電能（００００６）亦唔見咗近半成，報７０銀；一號超人（００００１）最新
話有信心米字國業務繼續會有增長，派完定心丸後仍後退半成，報８７銀，曾創近一年半低位
８５﹒３銀。

＊局勢太混亂圓金同受捧，金股與領匯逆市真風騷＊

　　「黑天鵝」突襲，金價暴漲逾４％，缸友們淆底衝去買金股，招金（０１８１８）踢高逾７
巴仙，報７﹒９５銀，今日試過創逾三年高位８﹒２３銀；街坊紫金（０２８９９）亦好叻仔，
有逾４巴仙斬獲，收報２﹒４５銀。
　　收息股領展（００８２３）股價守得好穩，大跌市仲有得微升唔夠半巴仙，報４９﹒７銀，
今朝早仲試過破頂高見５０﹒８銀添，係今日表現最好藍戰士，真巴閉！
　　避險情緒高漲下，公用股亦夠曬硬淨，煤氣（００００３）有唔夠半個巴仙進帳，報
１３﹒４２銀；中電（００００２）亦唔執輸，微微升起唔夠半個巴仙，報７６﹒１銀；港鐵
（０００６６）亦有打不死精神，軟唔夠半個巴仙，報３７﹒４５銀。

＊脫歐震全球國貨難避免，財仔有動作奈何要捱打＊

　　米字國「脫歐」致全球魚缸地震，滬指已經叫做好啲，但都要唔見逾１巴仙報２８５４點。
神州錢莊亦受重傷，工行（０１３９８）唔見逾３巴仙，收報４﹒３１銀。農行（０１２８８）
及建行（００９３９）就趴低近２巴仙及２巴仙，收報２﹒９銀及４﹒８８銀。
　　財險（０２３２８）諗住揼２５億人仔入股人保（０１３３９）旗下嘅人保健康，缸友唔買
單，財險全日跣低逾７巴仙，收報１２﹒８６銀。人保都質低逾４巴仙，收報２﹒９９銀。街坊
平保（０２３１８）及太保（０２６０１）亦齊齊捱打質低近３巴仙，分別收報３３﹒６銀及
２５﹒１５銀。

＊缸友新焦點深港幾時通？忘卻了脫歐假期更輕鬆＊

　　花旗聯儲局之前議息聲明經常提到，會密切關注環球經濟先決加息時間，米字國今次為全球
經濟投下一個咁大嘅震撼彈，花旗睇怕下月加息機會已經大跌。雖則係咁，本地磚頭仍受米字國
「脫歐」波及，長實（０１１１３）插逾３巴仙，收報４６﹒７５銀。新地（０００１６）及新
世界（０００１７）齊齊瞓低近半巴仙至２巴仙，收報８８﹒５５銀及７﹒４５銀。
　　米字國公投已完，短期焦點剩返「深港通」。生發發（００３８８）今日趴低近２巴仙，收
報１８２﹒７銀，係藍戰士之中叫做跌得少。其他券商跌幅亦叫可以接受，海通證券
（０６８３７）及中國銀河（０６８８１）蒸發近２巴仙至逾３巴仙。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。