《小傳日記》隔晚花旗國又再急急腳回落,其中道指成分股入面,雪佛龍同埃克森美孚都跌
喊晒口,點解?因為侵侵(特朗普)一句話:「我唔太想戰鬥民族(俄羅斯)同OPEC減產。
」一句說話觸動大市神經,搞到紐約期油大瀉逾7巴仙,拖累埋油股發展。道指最終收報
25286點,跌100點,跌近半個巴仙;納指持平收報7200;標普500指數收
2722點,跌4點。
香江魚缸今朝本來好地地,係隔晚夜期同「黑期」高走情況下,恆指都輕微高開81點報
25874,以為可以繼續試試二萬六條線,但係個市Chok過林峯,9點30分一開市就倒
頭下跌再尋底,真係「夾」到無朋友,無論開好開淡都無肉食,中午前牛皮,但係午後跌幅擴大
,最低見過25489點,插水303點,而最終收報25654點,跌138點或逾半個巴仙
,成交793億銀減少近13巴仙。國貨方面收報10405點,跌73點,跌幅逾半個巴仙。
A場方面雖然民航同海南板塊造好,但係整個魚缸依然弱勢,上證最終收報2632點,跌
22點,跌幅近1巴仙。深證收報7908點,跌55點,跌幅逾半個巴仙。
藍戰士方面,QQ(00700)績前無咩點作動,但大行普遍睇淡,所以今日都係跌近1
巴仙,報272﹒2銀。友邦(01299)早前公布嘅第三季業績雖然符合預期,不過股價近
日幾呆下,今日跌近2巴仙,報63﹒5銀。神州移動(00941)無升跌報75﹒1銀。匯
控(00005)漲近1個巴仙報65﹒25銀。生發發(00388)升近半個巴仙報
225﹒6銀。
*人仔升返起內房齊歡喜,野村急唱好澳博銀紙數*
話說近排走弱嘅人仔又略見反彈,今日人民幣中間價報6﹒9402,較上一日升227點
子,資產以人仔計價嘅內房跟勢反彈。碧桂園(02007)漲近1巴仙,報8﹒95銀。中海
外(00688)升1巴仙,報25﹒3銀。世房(00813)升逾1巴仙,報17﹒28銀
。潤地(01109)跌近1巴仙,報27﹒85銀。恆大(03333)升近1巴仙,報
18﹒66銀。雅居樂(03383)漲近3巴仙,報9﹒44銀。
野村噚日出個報告話馬交11月初賭收只係比10月跌5%,所以「暴跌式」嘅講法其實唔
太存在,濠賭佬噚日升完一轉,今日又再發過力。銀娛(00027)同金沙(01928)各
升逾半個巴仙,分別報44﹒4銀及31﹒7銀。永利馬交(01128)微跌兩格報
16﹒06銀。美高梅(02282)升半個巴仙,報11﹒82銀。新濠國際(00200)
急漲近4巴仙,報13﹒56銀。澳博(00880)更有逾5巴仙進帳,報6﹒84銀。
*細摩唱得淡藥佬眼坦坦,經濟未回復車股易中伏?*
砵砵車近來都係走弱,內地經濟指數又咁差,交銀國際又話對神州汽車業展望降至「與大市
同步」,雖然首推吉利(00175),但股價略嫌無力,今日收跌2巴仙,報14﹒86銀。
其他砵砵車反而略見升幅,華晨(01114)漲近3巴仙,報6﹒66銀。長汽
(02333)升逾2巴仙,報4﹒82銀。北汽(01958)升逾半個巴仙,報4﹒4銀。
比亞迪(01211)漲近1巴仙,報53﹒8銀。
康哲藥業(00867)今日被摩通削目標價,由19銀降到12銀,評級由「增持」降至
「中性」,康哲今日大挫近13巴仙,報9﹒16銀。摩通同時亦降石藥(01093)及中生
製藥(01177)目標價,惟維持「增持」評級,前者跌近6巴仙,報17﹒7銀,為最差藍
戰士;後者亦唔見逾4巴仙收7﹒72銀。
其他藥股仍有睇頭,華潤醫藥(03320)升近2巴仙,報12﹒22銀;金斯瑞
(01548)漲逾半個巴仙,報14﹒62銀;上海醫藥(02607)漲逾2巴仙,收
19﹒18銀。
*中資教育佬股價唔老土,旺旺出成績成交逾兩億*
全國政協開咗個雙周協商座談會,提出通過政策叫停出生人數下滑嘅趨勢,奶製品佬普遍走
高,原生態牧業(01431)揚1巴仙,報0﹒177銀。澳優(01717)今日好叻豬,
今日最高見9﹒61銀,全日開開心心飛高逾2巴仙,報9﹒42銀。H&H(01112)就
唔多聽話,自己走低1巴仙,報47﹒65銀。中資教育佬今日都笑哈哈,楓葉教育
(01317)彈近4巴仙,報4﹒42銀。宇華教育(06169)跟升1巴仙,報3﹒8銀
。惟獨民生教育(01569)唔happy,全日跌2巴仙,報1﹒45銀。
祖國10月份社會消費品零售額的增速意外地slow-down至8﹒6巴仙,無哂連續
兩個月加速增長嘅霸氣。內需大佬們今日都向上走高,旺旺(00151)噚日出成績,瑞銀升
佢「他屐」至4﹒7銀,評級「掟貨」。麥格理亦「十卜」佢,「他屐」由6﹒4銀升至7﹒7
銀,維持「跑贏孖屐」評級,全日升1巴仙,報5﹒74銀,全日成交逾2億銀。統一
(00220)揚近2巴仙,報7﹒36銀。潤啤(00291)跳起,升2巴仙,報
28﹒05銀。青島啤酒(00168)就一個人飲悶酒,跌超過1巴仙,報31﹒25銀。
*油價跌跌跌油佬升勢歇,人仔升升升鐵鳥股價醒*
全球都擔心石油需求減弱同供應過剩,加上侵侵話唔想俄佬同OPEC減產,意味住佢想要
低油價,噚晚對沖基金終於嚟了沽貨,逾98萬份合約易手,所以油價當然唔好睇喇,紐約期油
曾大跌8巴仙,而布油都唔見7巴仙,兩份期油合約已經由10月高位回落近三成,聽到呢到魚
缸三桶石油佬當然跟跌,其中中海油(00883)跌得最勁,唔見5巴仙,以近全日低位
12﹒7銀收市;中石油(00857)同樣以近全日低位收5﹒67銀,跌4巴仙;中石化
(00386)同昆侖能源(00135)齊齊唔見多過2巴仙,分別報6﹒51銀同9﹒25
銀。
人仔中間價回升,加上油價急挫,三隻靠人仔概念搵食嘅中資鐵鳥當然樂歡欣,南航
(01055)同國航(00753)最開心,齊齊升多過4巴仙,分別報5﹒2銀同7﹒69
銀;東航(00670)漲近2巴仙,報4﹒97銀。另一隻本地鐵鳥屐飛(00293)自從
外洩資料醜聞之後終於一脫頹勢,今日最高見過11﹒12銀,全日踢高2巴仙,報10﹒9銀
。請請!
《編者按》本欄搜羅即日熱門傳聞,惟消息未經證實,《經濟通》亦不保證內容之準確性
本文只供參考之用,並不構成要約、招攬或邀請、誘使、任何不論種類或形式
之申述或訂立任何建議及推薦,讀者務請運用個人獨立思考能力自行作出投資
決定,如因相關建議招致損失,概與《經濟通》、編者及作者無涉。
【與拍賣官看藝術】常玉作品屢創天價,背後其實藏著跌宕起伏的人生► 即睇