《古臣周記－古臣》土國危機，嚇散全球

　　《古臣周記》港股星期一（１３日）大插，當時由於特朗普出手提高對土耳其鋼鋁稅收，消
息令土耳其里拉大跌，震散全球市場。同一日教育股受內地政府監管教育業，成個板塊被狂沽，
熊氣甚濃。

＊土耳其里拉大插水，惟恐經濟爆煲＊

　　土耳其作為近年高增長嘅經濟體，其經濟如果出現重大問題，就足以掀起一連串影響，危及
其他國家及地區。土耳其嘅經濟靠外債支撐起，外債佔當地生產總值（ＧＤＰ）超過５０巴仙，
如果幣值一直下跌，加上又無足夠外匯儲備去救經濟，土耳其將會陷入無錢還債嘅局面，國際貨
幣基金組織（ＩＭＦ）或者需要向其伸出援手，土國要緊縮開支，經濟有排唔好。
　　土耳其７月通脹達１６％，顯示經濟極度過熱，但總統埃爾多安（Ｅｒｄｏｇａｎ）又偏好
低利率政策，令到當地利率不能夠提高，增加返土耳其里拉嘅資金需求，土耳其里拉幣值最終不
能靠市場機制調節而提升，進一步令該國經濟危機雪上加霜。
　　面對住呢種情況，港股亦有可能再跌深一層，後市宜守不宜攻。

＊倉位具防守力，短期續受騰訊拖累＊

　　手上倉位防守力都算強，寶勝（０３８１３）似乎會於１﹒５銀水平橫行一排，粵海投資
（００２７０）就好似不受大市影響，於１３銀有強力支持。領展（００８２３）近日變動唔大
，而且公司繼續不停回購，亦為股東帶來信心，暫時可以繼續持有。
　　短期拖累倉位嘅就只有騰訊（００７００）。騰訊今日放榜，市場預計公司次季表現唔多得
，預計純利增長１７巴仙，而公司亦會面臨多個挑戰，所以市場開始將公司估值下調。現時市場
主要擔心《絕地求生》受限韓令影響而遲遲未能變現，最終令公司第二季收入放慢。另一方面，
隨住外圍Ｆａｃｅｂｏｏｋ、Ｔｗｉｔｔｅｒ用戶增長乏力，成個科網業都有可能面臨估值下調
，現時騰訊雲業務同支付業務規模仲未追得上手遊業務，投資者有可能因為咁樣而繼續沽出騰訊
。
　　阿臣ＱＱ得一手，現時帳面蝕仲乎５至１０巴仙，於是亦唔止蝕住。但未有貨嘅朋友，就唔
建議現價追入，睇埋市場點樣解讀份業績再算啦。

　　表列截至８月１５日（１１：１５ａｍ止）投資組合表現：

　　股份　　　　　　股數　　　　　平均買入價　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　騰訊　　　　　１００股　　３６２﹒００元　　　３３５﹒６０元　　　３３５６０元
　　寶勝　　　１００００股　　　　１﹒５６元　　　　　１﹒４９元　　　１４９００元
　　粵海投資　　２０００股　　　１３﹒００元　　　　１３﹒１２元　　　２６２４０元
　　領展　　　　　５００股　　　７５﹒３５元　　　　７６﹒５５元　　　３８２７５元
　　－－－－－－－－－－－－－－－－－－－－－－－－－－－－－－－－－－－－－－－－

　　股票市值　　　　　　：　１１２９７５元
　　剩餘現金　　　　　　：　　３９８０３元
　　組合淨值　　　　　　：　１５２７７８元

　　組合本月收益表現：　－　　２﹒５％（截至上月底止組合淨值：１５６７６３元）
　　組合累計收益表現：　＋　４５﹒５％（本金１０５０００元計）（２０１６年８月開倉）

　　＊數據截至今日１１：１５ａｍ