《小傳日記》魚缸四連陰，跌市成交增；一年新低見，熊踪影顯現？

　　《小傳日記》土耳其觸發全球嘅金融動盪，當地政府出手救市，所以土耳其里拉得以反彈，
外圍孖屐嘅情緒亦平伏些少。道指隔晚最多升１５１點，埋單飛起１１２點，連同標指、納指收
都飛起約半個巴仙。不過，魚缸ＡＤＲ升得６５點，加上今日ＱＱ股王（００７００）放榜前，
一開波已經唔見２巴仙，拖累魚缸窄幅低開２８點，之後喺股王同其他藍戰士拖累之下愈跌愈深
，跌幅最多擴至５０３點，低見２７２４９點創約一年低位，而由歷史高位計回落近１９巴仙，
距離跌兩成見技術性熊市又行近一步。魚缸全日埋單無咗４２９點或１﹒６巴仙，報２７３２３
點，連跌四日兼四連陰，四日以嚟一共唔見４﹒５巴仙或１２８３點。今日主板成交
１１１４﹒９６億銀增多近９巴仙。
　　國貨就跪低約２巴仙或２０９點，報１０５３５點，Ａ場腳仔亦軟，今日唔見５７點或２巴
仙，報２７２３點。

＊金蝶急插水鐵塔難抬舉，ＱＱ派業績缸友憂戚戚＊

　　ＱＱ今日收市之後就派成績表，可能因為受隨祖國凍結網絡遊戲版號審批嘅消息影響，加上
佢份功課《魔物獵人：世界》畀用家舉報，高佬對佢期望改觀，「他屐」由５４６銀降至５０８
銀，但維持返佢嘅ｂｕｙ入評級咁。咁多消息影響下，ＱＱ今朝飛得唔喺太穩定，最高只見
３４４銀，最低插到去３３５銀，見近一年低位，全日碌低超過近４巴仙，報３３６銀，連跌四
日唔見一成。ＱＱ囝囝閱文（００７７２）今日亦穿招親價５５銀，唔見逾５巴仙，報５２﹒６
銀。
　　金蝶（００２６８）股價最近畀缸友捧高，前日仲一度創歷史高位１１﹒３４銀，聽聞喺受
雲端服務「雲蒼穹」消息嘅影響喎！但喺兩日光景唔同晒，科網佬由天跌落地，可憐金蝶連見兩
支大陰燭，全日急插水，元氣大傷收場，挫１２巴仙，報８﹒９銀。
　　上星期三（８日）上場嘅祖國鐵塔（００７８８）今日都同金蝶落得同一下埸，創上市新低
１﹒２３銀收，跌３巴仙，較上市價１﹒２６銀「潛水」２巴仙。其實，今朝鐵塔有大戶真金白
銀畀１﹒４２億銀「十卜」佢架，連高佬早前都出嚟明撐佢，用１８億銀總共增持咗３﹒２３巴
仙股本，家荷包就袋住１８﹒５３巴仙祖國鐵塔嘅股份啦。鐵塔今日一跌，真係水瓜打夠唔見一
截。

＊醫藥佬跌低歌禮潛谷底，科網股捱沽有貨都辛苦＊

　　唔知係咪呢排天口熱，醫藥佬鍾意海底世界，個個都向下潛水。神州中藥（００５７０）全
日唔見逾７巴仙，報５﹒３６銀，康哲藥業（００８６７）腳軟近６巴仙，報１２﹒８２銀；白
雲山（００８７４）無咗近８巴仙，報２９銀；石藥（０１０９３）亦質低逾３巴仙，報
１８﹒６４銀。雖然四環（００４６０）噚日因為抗腫瘤創新專利藥進入神州ＩＩ期臨床試驗，
漲破５０天線，但今日就回吐逾７巴仙，報１﹒６５銀。不過最慘豬都係歌禮（０１６７２），
跣低逾１４巴仙，報８﹒１５銀，仲創上市新低，較８月招親價１４銀潛水近４２巴仙。　　
　　受到股王ＱＱ影響，其他網絡遊戲佬都無運行，天鴿互動（０１９８０）唔見逾２巴仙，報
４﹒８１銀，重回今年２月低位；遊萊互動（０２０２２）跌低近２巴仙，報１﹒０５銀；博雅
互動（００４３４）無咗近２巴仙，報１﹒５８銀；雲遊控股（００４８４）就倒升穩報
７﹒６９銀。

＊東方明珠漲教育佬慌張，大和解唔透光國無得唞＊

　　東方明珠石油（００６３２）闊別孖屐２日，今日話收到公司股東兼要約人通知，打算全面
收購，復賽後一直暴漲，曾經飛升約２倍，居升幅榜首位，收工前飛起近８７巴仙，報
０﹒１４２銀。呢顆明珠升到停唔到，另一邊有魚仔就跌到停唔到。光大國際（００２５７）噚
日宣布供股後急瀉，今日繼續唔見逾５巴仙，報６﹒５５銀。大和就覺得佢好似女人咁難明，明
明目前集團擁有資金２００億銀，唔明點解集團要大折讓供股集資，所以就將他屐降到７﹒２銀
，評級降至持有。
　　教育佬仲未翻得到身，雖然天立（０１７７３）同中教控股（００８３９）等都有澄清，話
阿爺目前相關文件正在諮詢階段，新政策未實施，不過仍然比唔到信心缸友。上個月１２日上市
嘅天立教育就繼續無咗近１８巴仙，報１﹒６７銀；當初以２﹒６６銀掛牌，依家「潛水」近四
成。中教控股就唔見逾６巴仙，報９﹒３２銀。楓葉教育（０１３１７）同成實外教育
（０１５６５）分別插水近１５巴仙同２巴仙，報４銀、４﹒５銀；民生教育（０１５６９）跌
低近８巴仙，報１﹒２３銀收工。

＊安踏急回升成交唔冷清，賭仔落哂形小米同悲鳴＊

　　神州波鞋一哥安踏（０２０２０）噚日（１４日）食午飯果陣啱啱派咗成績表，成績一度獲
得缸友認可，可惜佢地好快散水走人，噚日嘔返一成出嚟。野村都覺得佢唔抵幫，將一哥嘅「他
屐」下調至３８﹒４銀，認為佢地嘅營運利潤率將會繼續受壓，不過一哥好爭氣，話未來會重視
收購，全日跳高逾６巴仙，報３８﹒７５銀。
　　雖然早前野村表示上星期濠江每日收入８﹒７９億澳門幣符合預期，不過今日賭神們全部落
哂形，悶悶不樂咁。其中美高梅（０２２８２）、銀娛（０００２７）分別無咗約４至５巴仙分
別收報１４﹒１８銀及５３﹒３銀。
　　野村預計萬洲（００２８８）今年同下年嘅盈利會下跌，所以對佢嘅期望亦分別下調１０巴
仙同１１巴仙，「他屐」得返１０﹒４銀，不過維持ｂｕｙ入評級，力爭上游嘅佢今日飛魚上身
，升逾８巴仙，報６﹒５７銀。
　　小米（０１８１０）今日失守跌穿招股價１７銀，Ｂｅｒｎｓｔｅｉｎ預料小米下年每股盈
利會下跌２７巴仙，不過都畀咗同「孖屐」同步嘅評級佢，「他屐」１７﹒５銀，埋單跌近５巴
仙報１６﹒３銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。