《小傳日記》ＱＱ平保向上攻，聖誕齊齊追匯豐！

　　《小傳日記》花旗魚缸上星期五（８日）開Ｐａｒｔｙ，道指跳高１１７點慶祝就業數據強
勁，兼預先歡迎「息魔」喺香江時間今個星期四（１４日）再次降臨。
　　香江呢邊，上周急跌，到周五又大幅反彈。新嘅一個星期開始，股王ＱＱ（００７００）今
朝（１１日）開市嗰陣仲係未瞓醒，搞到魚缸只係微微高開５點，好彩之後有券商送上祝福，成
功發威上番４００大關；仲有大象（００００５）都夾高挑戰８０銀；平保（０２３１８）又飛
起近４巴仙祝賀Ａ場重上３３００。三大重磅藍戰合力，恆指強勢抽高３２５點報２８９６５，
一口氣收復５０天線（約２８７８７）及１０天線（約２８９６７），勁！國指都叨Ａ場光，衝
高１４２點報１１４３１。
　　魚缸有返Ｄ力氣，但成交就未見太大增長，全日約有１０９２億銀。
　
＊大上大落間唔慣都要慣，上周跌得急兩天大反彈＊
　
　　ＱＱ自從上星期三（６日）低見３６５﹒２銀後，終於扭轉弱勢，連升兩日之後，今日喺招
商證券目標５００銀之後，就承勢衝破４００大關，收漲近３巴仙報４０５﹒４銀，仲重奪返廿
天線添！ＱＱ好，連帶囝囝閱文（００７７２）亦繼續省鏡，曾重上９０元，收８８﹒０５元，
或５％。而小ＱＱ好，又連帶眾安（０６０６０）同易鑫（０２８５８）亦有睇頭，反彈４％同
７％。
　　正所謂「聖誕鐘，買匯豐」，加上預先慶祝花旗息魔降臨，憧憬淨息差有機會擴大，缸友都
齊齊衝入去掃高大象，等破８０大關，難怪成功跳起近２巴仙報７８﹒３銀，距離大關愈來愈近
喇。
　　濠賭佬都開心迎接聖誕，皆因德銀瑞信齊齊唱好。永利澳門（０１１２８）獲瑞信大升目標
逾５成至２９銀，當堂開心飛起近６巴仙收２４﹒３５銀；金沙（０１９２８）同銀娛
（０００２７）都分別強勢踢起逾３巴仙及近２巴仙！
　
＊媽咪越四百小Ｑ有睇頭，大行齊唱好賭仔高高收＊
　
　　大市上周急調整，今日又大幅反彈。事實上，大市未見到雞犬亂升嘅瘋狂升勢出現，缸友操
作都穩打穩紥；今日見部分資金就落咗去追醫藥佬。金斯瑞（０１５４８）就由於新藥研究申請
獲得政府當局受理，消息刺激之下拋起近２０巴仙，報１２﹒５６銀，入圍升幅榜頭十名之一
。
　　賓架德銀就首選中生製藥（０１１７７），畀咗個「掃貨」評級佢，他屐１３銀，令股價彈
高近６巴仙，報１１﹒８２銀。德銀亦都睇好環球醫療（０２６６６），評級為「掃貨」，他屐
９﹒４銀，股價亦有近５巴仙進帳，報７﹒４３銀；打算設立合資自貢市老年病醫院嘅復星醫藥
（０２１９６）亦跳起近４巴仙，報４２﹒０５銀。
　
＊聖誕買匯豐八十在眼前，高佬畀個讚中車兜返轉＊
　
　　神州鐵路基建佬今年都未認真升過，不過高盛就叫買中車（０１７６６）同中車時代
（０３８９８），仲將前者評級由３７銀升到５７銀，而後者評級由５﹒７銀升到９﹒５銀。兩
者今日一朝早就已經彈起近５巴仙，報７﹒５４銀同埋３巴仙，報４５銀。
　　特步（０１３６８）發盈警，預料全年淨利按年唔見約２５巴仙至３５巴仙，公司就被富瑞
劈他屐，由３﹒１銀降到２﹒４銀，評級亦都壓低咗變成「跑輸孖屐」，結果股價唔見４巴仙，
報２﹒８３銀。街坊大阿哥安踏（０２０２０）亦都腳軟１巴仙，報３３﹒０５銀。
　
＊特步發盈警富瑞踩多腳，Ｆ８與東駿缸邊好躍雀＊
　
　　魚缸再向上跳起之際，神州農產品（００１４９）又腳仔軟１３﹒６４％，報０﹒０７６元
，仲一度低見０﹒０６銀見上市新低添，成為今日最弱嘅魚仔。
　　另一邊廂，康宏（０１０１９）宣布人事調動，因為公司主席王利民被ＩＣＡＣ拉咗，委任
陳志雲臨時主席，暫時仲未復賽。同為「謎網５０」嘅育兒網絡（０８３６１）同君陽
（００３９７）就一度滑落２９巴仙同１１巴仙，不過埋單前者都有２巴仙升幅報１﹒０２銀、
後者唔見近６巴仙，報０﹒４銀。
　　不過個別創板魚仔都喺升幅榜度榜上有名，最勁魚仔Ｆ８（０８３４７）飛起３６巴仙，報
０﹒４５５銀、東駿（０８３８３）就飛上２４巴仙，報２﹒２２銀。請請！　　
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。