《小傳日記》魚缸慘見五連跌，ＱＱ神話已破滅！

　　《小傳日記》魚缸真係咩都有可能發生，今年初股王ＱＱ（００７００）高見４７５﹒７２
銀時，又有邊個會諗到股王亦都有大跌之日呢？噚晚（１５日）花旗國魚缸再次下挫，股王喺亞
洲呢邊公布咗成績表之後，ＡＤＲ嗰邊就率先下跌，連帶中概股亦腳軟軟，氣氛影響埋成成個花
旗國魚缸，道指收報２５１６２點，唔見１３７點；納指收報７７７４點，無咗９６點；標指報
２８１８點，亦腳軟２１點。
　　魚缸夜期隨晚插３５６點，ＡＤＲ比例指數腳軟３７１點，喺全城都預咗ＱＱ今日（１６日
）開市後會大插之下，魚缸今朝低開４５２點報２６８７１點，失守二萬七關兼創約一年新低，
但就已經見咗全日最低位。其後由於ＱＱ有資金撈底，跌幅收窄返，魚缸最後亦跌少咗，是日埋
單唔見２２３點或０﹒８巴仙，報２７１００點，五日連跌共１５０７點或５﹒３巴仙，最終兩
萬七關失而復得。主板成交１２４５﹒３５億銀增多近１２巴仙。
　　國貨就唔見５５點或半個巴仙，報１０４７９點。Ａ場亦好頹，無咗１８點或０﹒７巴仙，
報２７０５點。

＊ＱＱ真盞鬼跌唔落谷底，手遊股擋災跌得好狼胎＊

　　ＱＱ噚日收市公布業績，表現明顯遜預期，一眾缸友係討論區大叫「ＭＯＬＡＭＯＬＡ」，
邊個叫隻「食雞」ＰＵＢＧ又無講幾時盈利化，又無特別講下半年或者下一個季有咩「新遊戲」
出爐，加上最近神州登陸嘅「芒亨」（惡魔獵人）又被人禁咗，嚇到一個二個今朝早係咁出貨。
當大家都以為二萬七不再，ＱＱ要見３００銀嘅時候，班大孖沙一個屈尾十喺３１９銀時掃返上
去，所以今日個魚缸簡直係「來回地獄又折返人間」，ＱＱ最終就跪低３巴仙，報３２５﹒８銀
收場。
　　ＱＱ比想像中跌得少，但所為「黑狗當食，白狗擋災」，手遊股「直插無水花」，博雅互動
（００４３４）瀉逾６巴仙，報１﹒４８銀。雲遊控股（００４８４）唔見近６巴仙，報
７﹒２３銀。另外，其他軟件股都嚇到震，金蝶（００２６８）無咗近７巴仙，報８﹒２８銀。
閱文（００７７２）唔見逾５巴仙，報４９﹒８５銀。美圖（０１３５７）臉色灰黑，跌近４巴
仙，報４﹒７９銀。

＊「靚撈ｖｏ」歸位股價又得米，中電再破頂中燃好硬頸＊

　　股價沉咗極耐嘅「靚撈ｖｏ」聯想集團（００９９２）呢次叻仔啦，所謂「一份業績救全家
」佢就表表者，喺集團「三波戰略」嘅推進之下，令到營收大增１９巴仙至１１９億美金，創下
歷史同期新高。大師兄歸位，股價自然反彈，今日跳起逾３巴仙，報４﹒６銀。連帶大股東聯想
控股（０３３９６）今日都彈起近１巴仙，報２３﹒６５銀。
　　魚缸今日上演二萬七攻防戰，所以唔想冒險嘅缸友都轉揸中電（００００２）避險，刺激股
價今日見新高９４﹒６５銀，收市升逾１巴仙，報９４﹒１銀。但中燃（００３８４）無咁好彩
啦，大行大和就話啦，大陸天然氣補貼策略改變，令到非住宅分銷關稅嘅可能性受到限制，所以
下調目標價至２５﹒７銀兼降Ｇｒａｄｅ至「跑輸孖屐」，今日中燃腳軟逾４巴仙，報
２５﹒９５銀。
　　另外，砵砵車今日都十分弱雞，吉利（００１７５）下個禮拜派成績表，今日見到一年低位
１４﹒６銀，真係慘慘豬，尾市反彈報１５﹒２銀。長汽（０２３３３）微彈１巴仙報４﹒５１
銀。廣汽（０２２３８）唔見近３巴仙報６﹒８５銀。比亞迪（０１２１１）跳起逾１巴仙報
４２﹒５５銀。
　　萬洲（００２８８）有麻煩！因為河南省鄭州市政府發出豬瘟疫區封鎖令，萬洲旗下嘅雙匯
發展（深：０００８９５）要全力配合鄭州政府防疫，令萬洲今日午後突然無咗逾７巴仙，報
６﹒０８銀，係今日表現最差藍戰士！街坊雨潤（０１０６８）亦插水逾５巴仙，報０﹒９銀。

＊５Ｇ準備中運營商慶功，賭股有起色銀河最招積＊

　　時下個個都鐘意篤手機上網，唔通真係個個都想上網咩！阿爺就想大陸同同胞個個都上到網
，實行豪拋６萬億人仔，打造５Ｇ布局。中通服（００５５２）升逾８巴仙，報５﹒７４銀；中
聯通（００７６２）微跌逾１巴仙，報９﹒１４銀，中移動（００９４１）飆近２巴仙，報
７２﹒５銀，勁。
　　另一方面，野村話上星期澳門每日博彩收入合符預期。加上由８月至依家每日博彩收入按年
升１９巴仙，估計８月份博彩收入按年升１５巴仙。所以今日部分賭股終於上到水，銀娛
（０００２７）逆市回升近１巴仙，報５３﹒８銀；金沙（０１９２８）揚近３巴仙，報
３６﹒７銀；永利馬交（０１１２８）飛起近１巴仙，報１８﹒８８銀。澳博（００８８０）同
美高梅（０２２８２）就慘Ｄ，分別無咗近２巴仙同近４巴仙，報８﹒１８銀同１３﹒６８銀。

＊創科飛上天萬裕跌到癲，小米無人追股價日日墜＊

　　創科實業（００６６９）噚日派成績見家長，半年純利按年升成２５巴仙，今日就被人捧到
上天，一朝早高開近６巴仙，仲一度收復晒所有主要平均線，收工都拉到上近１１巴仙，報
４４﹒８５銀。不過唔係個個賺到錢都咁多人鍚，中鋁（０２６００）就慘Ｄ，中期純利多賺
１５巴仙，但就因為佢收入按年跌１０巴仙，股價曾被質低近６巴仙，埋單卻無升跌，報
３﹒０４銀。
　　想當初小米（０１８１０）都好多人追，不過上市唔夠２個月就插出新低，今日微跌報
１６﹒２４銀，低過當日１７蚊招股價超過４巴仙。
　　萬裕科技（００８９４）成績都唔錯，但賺多過上年５５巴仙都挽留唔到缸友，一直插到近
１４巴仙，收報０﹒９３銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。