《小傳日記》ＱＱ氣派盡顯現，無奈魚缸未脫險！

　　《小傳日記》等到頸都長，股王ＱＱ（００７００）噚日（１６日）收市後終於派發成績表
，完美地話畀全世界知，乜嘢叫做「真．皇者」！ＱＱ成績靚到暈，噚晚ＡＤＲ已經率先闖上高
峰，帶動今朝（１７日）香江魚缸開心踢起超過二百點慶祝，最高仲去到２７６２４點收復返十
天線（約２７４３７）。
　　只可惜魚缸突然嚟個反高潮，其他重磅藍戰無力，ＡＩＡ（０１２９９）、大象
（００００５）同埋祖國內銀都舉白旗，ＱＱ靚爆亦難救大市狂瀾，恆指一度調頭插低１０６點
添！好彩，收市後放榜嘅平保（０２３１８）發力升逾２巴仙頂住，恆指跌幅略為收窄。
　　高開低收嘅一日，恆指跌６４點收２７３４４，十天線得而復失；國指就微跌１６點報
１０８０１。
　　ＱＱ派成績表咁大件事，缸友又點忍到手唔Ｔｒａｄｅ呢？！魚缸全日成交急升至９６４億
銀！
　
＊盤數勝預期ＱＱ靚到爆，大行齊唱好最牛越四百＊
　
　　ＱＱ雖然經歷過《王者榮耀》被打擊，但最終都係由《王者》為公司帶來好多收入。ＱＱ噚
日放榜，仲超乎孖屐預期。公司第二季多賺七成，中期多賺６４巴仙，好多大行都唱好，當中摩
通仲睇４０５銀，股價唔升就奇啦！今日踢起２巴仙，報３２９﹒４銀，盤中更高見３４１銀破
頂。
　　劇飛（００２９３）中期轉虧，蝕逾２０億銀，業績仍然受到燃油對沖虧損所拖累。雖然花
旗睇淡仲降埋「他屐」，不過劇飛仍一度飛起逾６巴仙冠絕藍戰士，不過後勁不繼，最終埋就得
返１巴仙進帳，報１１﹒８銀。
　　創科（００６６９）中期純利升１６巴仙至２億銀美金，派息亦增加，摩通維持「他屐」不
變，股價衝上一成，報３８﹒５５銀。安踏（０２０２０）獲多間大行升目標價，讚中期業績交
到貨，公司都當仁不讓，盡情飛起近６巴仙，報３１﹒１銀，高見３１﹒３銀破頂，真係勁！
　
＊劇飛勁虧損逆市輕輕飛，細摩來祝福創科認真肥＊
　
　　恆指公司噚日收市之後公布季檢結果，萬洲（００２８８）爆冷加入藍戰士大家族，萬洲今
朝開賽冇耐就爆上近６巴仙，創歷史新高８﹒４５銀，埋單都有近３巴仙落袋，報８﹒２銀。大
熱舜宇（０２３８２）染藍夢成空，心都碎晒，收市趴低近３巴仙，報１０７﹒２銀。
　　而恆生港股通指數就決定加入３４條魚仔，幸運兒民生教育（０１５６９）即刻飆高逾２２
巴仙慶祝，收１﹒２７銀，叻盡魚缸；有份嘅祖國東方（００５８１）、太平洋航運
（０２３４３）都跟住彈高１３同逾１１巴仙，報４﹒９４同１﹒８７銀。有１３隻魚毛唔好彩
被叮叮，當中德普科技（０３８２３）碌低近９巴仙，收０﹒０８３銀。
　
＊萬洲成新貴山頂兜返轉，舜宇夢成空今天腳軟軟＊
　
　　花旗國聯儲局發表７月會議記要，有部分委員話近期通脹數據幾疲弱，覺得要謹慎啲，暫時
唔好再加息住。不過，一眾本地磚頭佬冇咩反應，長實（０１１１３）、會德豐（０００２０）
跌１至２巴仙，報６７﹒８５同５７﹒８５銀。太古Ａ（０００１９）中期多賺１﹒４倍，依然
瞓低近２巴仙，報７８﹒５銀；太古地產（０１９７２）多賺１﹒８倍，亦腳軟軟逾１巴仙，得
返２６﹒７５銀。
　　聯通（００７６２）中期盈利升６９巴仙，不過因為阿媽混改方案已經獲得阿爺批覆，原定
今日復出缸湖要取消。國壽（０２６２８）會參與祖國聯通混改，但仍然跣低近１巴仙，報
２３﹒４５銀；中車（０１７６６）澄清未參與Ａ場聯通新股認購，亦軟唔夠半巴仙，報
６﹒９９銀。
　
＊鋁鋼掀炒風升得夠痛快，沽空盯上了天鴿急停牌＊
　
　　雖然阿爺公布，新西蘭對神州螺紋鋼及熱軋卷板，發起反傾銷反補貼調查，不過鋁鋼材股仍
然掀起炒風。馬鋼（００３２３）、俄鋁（００４８６）同五礦資源（０１２０８）分別有３巴
仙至５巴仙落袋，報３﹒８５銀、５﹒４１銀同３﹒５８銀。
　　天鴿（０１９８０）被沽空機構Ｅｍｅｒｓｏｎ狙擊，腳軟近８巴仙後停牌。隻股停牌前報
５﹒６９元，成交約８２３萬股。Ｅｍｅｒｓｏｎ話天鴿互動為咗可以喺２０１４年中上市，偽
造營運同財務數據，誇大用戶數量。報告仲話，根本不值得對天鴿作出估值分析，認為長遠而言
，公司最終將被除牌。公司話將會發澄清公告，依家已搵緊法律意見，有貨缸友真係自求多福啦
！請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。