《小傳日記》連夾兩日迎結算，淡友嚇到失分寸！

　　《小傳日記》有時魚缸旺起上嚟真係㩒都㩒唔住，花旗國嗰邊，大型企業成績表都出乎意料
省鏡，刺激三大指數噚晚（２８日）抽升１至２巴仙，道指再次重上萬七關，氣勢如虹。
　　食住外圍強勢，加埋憧憬阿爺有機會降準，Ａ仔場都乘勝追擊，噚日收復完二千三關後，今
日（２９日）再踢高１﹒５巴仙收２３７３，帶挈香江都衝高２９９點收２３８１９；唔單止上
返「佔中」前嘅水平，差ＤＤ就連百天線（約２３８９９）都突破埋，而國指亦跟升１７５點收
１０７２４。難得個市連升兩日，缸友都放心入貨，全日成交急升近１８巴仙至７９６億。
　　孖屐正昅實美聯儲局喺香江時間聽日（３０日）凌晨公布議息結果，相信無咩大驚喜，為期
兩年嘅買債計劃將會功成身退，並維持低息環境。反而聽日結算日，喺好友兩連勝嘅強勢下，睇
嚟淡友今晚都好難有覺好瞓。

＊外圍巴巴閉Ａ仔冀降準，聯儲聲明前香江向上衝＊

　　要數今日最開心嘅股份，就梗係之前畀大行踩到落地底嘅濠賭股啦！雖然孖屐都一致唱淡今
個月博彩收入要碌低約兩成，不過濠賭粉絲都已經聽到無晒感覺。就喺呢個時候，竟然見到摩通
雪中送暖，出報告話對成個亞太區博彩業仲好樂觀，仲特別看好濠江前景，建議缸友首選兩大龍
頭銀娛（０００２７）同金沙（０１９２８）添。
　　難得有大行護航，兩大龍頭即時生猛晒，銀娛由頭升到落尾，差唔多以全日最高位收市，抽
高逾６巴仙報５０﹒７銀，向住５０天線進發。金沙都唔失禮，一樣升得咁靚仔，埋單有５巴仙
落袋收４６﹒９５銀，兩者成交都高達１３至１４億銀。
　　其他街坊永利（０１１２８）雖然第三季少賺逾８巴仙，但都叨到光跟升近５巴仙，美高梅
（０２２８２）就彈高逾５巴仙收２４﹒３銀。

＊濠賭返來了摩通來護航，平保業績靚炒高做好漢＊

　　噚日已經留意到班「燕梳」成員喺放榜前預先抽高慶祝，果然平保（０２３１８）份成績鬼
死咁省鏡，第三季竟然多賺九成，今日一開市就衝高咗上去，散場彈高近３巴仙收６２﹒７銀。
大佬國壽（０２６２８）都無令人失望，首三季多賺逾１６巴仙勝預期，瑞銀幫手叫買入下，收
市都升逾２巴仙收２２﹒８５銀。
　　另一邊廂，比亞迪（０１２１１）都馬力十足，今日放榜前又衝高５巴仙收５３﹒９５銀。
除咗炒業績之外，「迪仔」又再次受阿爺寵幸，先係廣州對新能源車購置最高補貼去到車價六成
，繼而工信部公告，第二批免購置稅新能源車公布，「迪仔」又有好多車款都入圍，好消息一籮
籮，想唔升都難啦！
　　　　
＊迪迪仔高呼爺爺我愛你！１６６增產缸友即埋鑊＊

　　細價股嗰邊就當然唔會悶場啦，新時代能源（００１６６）宣布阿根廷六口油井維修完成後
，平均每日產量將會增加３２巴仙。班炒友就好似執到金一樣咁開心，「嘭嘭聲」咁衝入去掃貨
，結果埋單飛升３７巴仙收０﹒３７銀。
　　聯合光伏（００６８６）都一樣鑊氣十足，中場休息嗰陣，宣布完成出售太陽能硅電池商權
益之後，就當堂叉滿電咁，以２﹒７億銀大成交炒高１０巴仙收１蚊，再一次成功同「毫子家族
」說再見。仲有半新丁綠葉製藥（０２１８６），上星期四（２３日）畀有「金手指」之稱嘅惠
理基金增持之後，今日就爆升近８巴仙收１１﹒１８銀，仲一度成功創埋１１﹒３４銀上市新高
添！
　　　　
＊股仔急上落扣好安全帶，買主席氣站新奧被質低＊

　　講完咁多開心嘅「飛升故仔」之後，都要關心一吓受重傷嘅股仔。中國微電子
（００１３９）其實由月中左右開始急插落嚟，當時都有０﹒９銀左右，但日前主席黃皓突然掟
咗５００萬股，均價約０﹒３１９銀，雖然只係１６０萬左右貨仔，但實在太挫士氣，結果今日
以近５﹒５億銀大成交蒸發咗１８巴仙收０﹒１７６銀。過去九個交易日，股價大拿拿唔見咗八
成，傷！
　　至於比較低調嘅新奧能源（０２６８８），今年走勢都無咩特別，一路都係５０至６０銀區
間上上落落。點知噚日收市後，宣布用２億美金向主席買美加燃氣加氣站，粉絲似乎對單刁唔多
高興，齊齊掟貨以示不滿，散場以逾近９億銀成交，重挫逾９巴仙收４９﹒２５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。