《小傳日記》阿爺倡存保，錢莊即造好；油價碌呀碌，鐵鳥齊飛舞！

　　《小傳日記》望住Ａ仔場日日係咁升，噚日（２７日）破完２６００關之後，今日（２８日
）阿爺就話研究出年搞存款保障制度，成班祖國錢莊即時衝晒上太空，將Ａ仔場進一步推高至
２６８２點升２巴仙，連升七日，認真不得了！
　　再望番香江呢邊，本來好淡雙方喺二萬四關鬥得難分難解；但見Ａ仔場個勢太勁，Ａ股
ＥＴＦ孖寶安碩Ａ５０（０２８２３）同南方Ａ５０（０２８２２）大升４巴仙，再創逾５２周
新高，好友一度食住個勢重奪主導權。可惜最終都打敗仗，大隻佬埋單都要跌１６點收
２３９８７；國貨佬嗰邊，唔使問都估到有幾威，祖國金融股全部都升上太空，國貨佬梗係贏到
開巷喇，大升１３１點或１﹒２巴仙，收１１１４５。
　　小傳今日接兩隻Ａ５０柯打接到手軟；而全日成交則增加至９０２億銀左右，夠晒旺場！

＊本地薑唔辣國貨威到盡，銀號齊起哄愈細愈美麗＊
　
　　阿爺開會研究部署出年１月份推出存款保障制度，希望可以減低對祖國錢莊嘅利潤衝擊。瑞
信、德銀都覺得，呢個制度可以為錢莊改革奠下重要基石，雖然難免會減低盈利，但係起碼可以
減輕系統風險，長遠嚟講對錢莊係好事！
　　德銀就話，今次呢個制度對小型銀行更有利，因為可以用較低成本去吸引每戶達５０萬人仔
嘅資金。唔知係咪因為咁，信行（００９９８）（滬：６０１９９８）Ａ、Ｈ股都升到唔識停，
係最威水錢莊，Ａ股漲停板之外，Ｈ股都大升近９巴仙收５﹒７７銀，勁！交行（０３３２８）
、民行（０１９８８）同招行（０３９６８）都有４至逾６巴仙進帳。大大隻嘅國有銀行一向都
比較安全，但中行（０３９８８）亦有近４巴仙進帳，收報４銀就，全城Ｈａｐｐｙ。　
　　
＊油王不減產油價認真慘，頁岩氣一族同樣撻到散＊

　　另一邊廂，油價已經跌唔少，孖屐一心希望外國一眾賣油班主減產，油價就有望止跌回升。
點知嚟個晴天霹靂，油組最終唔減產，油價應聲急瀉，布蘭特原油噚日急挫多達６﹒５美金，美
國原油都一樣跌得好甘，兩者都錄得２０１１年以嚟最大單日跌幅。正因為咁，一班油佬就梗係
跌到一仆一碌，做上游業務嘅中海油（００８８３）就最傷，今日急插近６巴仙，報１１﹒３４
銀，係最差表現大隻佬。中石油（００８５７）同囝囝昆侖（００１３５）就母子同情，一齊碌
低約３巴仙，分別成為第二同第三差股份。
　　而班頁岩氣相關囝囝都難逃厄運，中海油服（０２８８３）跣低逾６巴仙，仲一度低見
１３﹒４８銀，逾一年幾新低。噚日尾市拗腰嘅安東油田（０３３３７）就打回原形，踢低逾６
巴仙，報２﹒０３銀。細細粒嘅巨濤（０３３０３）、宏華（００１９６）就仲慘，急瀉９至逾
１２巴仙。
　
＊飛機與行船一於用平油，你追我又趕愈升勢愈有＊
　
　　不過同一樣消息，對唔同板塊嘅股份可以有唔同嘅作用。嗰邊賣油佬跌到趴喺度，呢邊班飛
機仔就加速衝上雲霄。是關油價一減，航空成本大降，對班飛機仔嚟講實在係天大嘅喜訊。國泰
（００２９３）飛起咗５巴仙，報１７﹒０８銀；東航（００６７０）、國航（００７５３）同
南航（０１０５５）就分別飛高咗６至逾８巴仙，有個愉快旅程喇。
　　除咗喺天上飛嘅可以受惠，做行船嘅當然都一樣受惠。成本低加上貨運量有望回升，中海發
展（０１１３８）今日就踢高近６巴仙，報５﹒０４銀；中國遠洋（０１９１９）、中海集運
（０２８６６）都袋咗４至６巴仙，分別報３﹒８１銀同２﹒２８銀。

＊忽見大陰燭萬洲受重創，兩新丁登場抽中有點傷＊
　
　　今日魚缸「旺股唔旺市」，上面咁多焦點板塊，至少都搵到大升大跌嘅原因，可憐嘅巨無霸
萬洲（００２８８），無端端由頭跌到落尾，仲一度瀉到去４﹒４７銀上市新低，埋單都要唔見
逾９巴仙收４﹒５９銀，成交高達６﹒５億銀，公仔圖出現成支大陰燭，睇嚟想反擊都唔係咁易
了…
　　兩隻新丁東瀛遊（０６８８２）同楓葉教育（０１３１７）都無運行，就算招股反應有幾熱
爆，今日都吸引唔到缸友眼球。個個走勢去焦點股度掃貨，結果東瀛遊最終都要潛水收場，收市
報１﹒３６銀，低招股價２巴仙，楓葉教育即使逃過潛水嘅命運，但都唔係好得去邊，收
２﹒８９銀，只係僅僅高招股價０﹒３巴仙咋。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。