《小傳日記》丁蟹出場了！降準救不了？！

　　《小傳日記》過去嘅周末，用「過山車」嚟形容缸友嘅心情，相信一Ｄ都唔誇張。先喺上星
期五（１７日）收市之後，突然爆出阿爺打擊兩融，搞到夜期急插七百點，嚇到成手貨嘅缸友腳
都震埋。就連香江財爺都寫Ｂｌｏｇ，話今晚即將重播嘅《大時代》，可以提醒小股民要留意股
市風險，兼估計今日（２０日）大市很有可能裂口低開。點知劇情峰迴路轉，阿爺突然急急澄清
，話根本無新招打壓股市，叫孖屐唔好亂估，之後仲失驚無神送大禮，大力降準１大厘！
　　短短幾日，好壞消息一次過湧晒出嚟，缸友都大叫「唔識玩呀…」結果，今日大市一開波就
衝高百幾點，阿爺先勝一籌，點知「丁蟹效應」下半場先發揮，Ａ場急急收跌近２巴仙，搞到香
江多隻大隻佬齊齊走鬼，股王ＱＱ（００７００）、生發發（００３８８）、中資金融股等都碌
低晒，搞到魚缸曾經急插近７００點穿兩萬七，驚！雖然埋單跌少ＤＤ，但都插低５５８點收
２７０９４，十天線都被攻陷，係自上個月１７號以來，首次失守。國貨指數跌得仲慘，急瀉
４２５點收１４１１１。
　　最緊要係，大跌市下，全日主板成交都有２１１０億銀左右，反映資金都走得幾急，共有約
１４００隻股份「舉白旗」，「丁蟹效應」呢個魔咒，真係不得了？！查實４月開始個市升成三
千點，用咩借口來次大回吐亦好正常！

＊混亂大時代好淡在交鋒，痛失十天線魔咒逃不了？＊

　　阿爺大戰「丁蟹」上半場球來球往，點知下半場「丁蟹」一面倒搶攻，搞到魚缸差啲都打爛
埋。廣東省副省長話就嚟會有「深港通」嘅好消息，但都阻止唔到生發發嘅跌勢，埋單唔見咗近
４巴仙，收報２７２﹒６銀，盤中仲曾經穿咗２７０蚊，得番２６７﹒８銀添。
　　班券商仲陰公豬，上禮拜五中證監又話要規範兩融，話唔畀任何形式嘅傘形信託，銀證
（０６８８１）係成班中隻佬入面跌得最甘，唔見咗７巴仙有多，收報１１﹒７８銀。廣發
（０１７７６）、中信証券（０６０３０）同海通證券（０６８３７）都走低５至７巴仙。其他
港資券商都跟住走軟，海通國際（００６６５）跌得最厲害，急插咗一成，收報８﹒９銀。

＊生發發ＱＱ愈大愈曳曳，傳規範再融券商即閉翳＊

　　祖國錢莊降準１個百分點，農業相關錢莊降得仲多。今次放水放成１﹒２萬至１﹒３萬億人
仔！有大行仲話除咗增加流動性，仲可以幫到祖國錢莊拉闊淨息差，瑞信估今次降準可以提高祖
國錢莊純利１﹒６巴仙，但都係阻止唔到錢莊跟市跌嘅命運。雖然今朝祖國錢莊走勢係唔錯，但
可惜都係敵唔過大市走勢，祖國四大錢莊建行（００９３９）、工行（０１３９８）、中行
（０３９８８）同埋農行（０１２８８）跌幅介乎半個巴仙至２巴仙。
　　另一批中資金融股內險亦都跟住Ａ仔走下坡，財險（０２３２８）最傷，唔見咗近６巴仙。
人保（０１３３９）首季壽險保費收入按年多近１７巴仙，但股價都係挫半成。藍戰士國壽
（０２６２８）同埋平保（０２３１８）亦都雙雙插低４巴仙。　　　

＊內銀有頭威午後大走樣，保險齊遇壓財仔最愁傷＊

　　香江魚缸午後插水，近期熱炒股急見回吐！當中南車（０１７６６）同北車（０６１９９）
跌得好淒，兩架火車雙雙都創過新高，但午後倒跌超過一成，真恐怖！收市分別挫１１巴仙及近
１３巴仙，各報１７﹒７銀及１８﹒６銀。其他「一帶一路」股都唔係好傷，中鐵建
（０１１８６）、中交建（０１８００）同埋中國中鐵（００３９０）跌幅都係介乎３巴仙至４
巴仙。
　　仲有另一批午後都擒擒青「走鬼」，就係核電股，中廣核礦業（０１１６４）插得比較甘，
足足無咗一成，雖然係咁，但都仲係高過復活節前個價０﹒７銀高近５３巴仙。哈爾濱電氣
（０１１３３）同埋東方電氣（０１０７２）都跌到一仆一碌，齊齊唔見咗８巴仙。

＊南車與北車衝高後炒車，核電頁岩氣全線大洩氣＊

　　國際油價由高位回落，昆侖能源（００１３５）慘成孖屐套現對象，全日唔見咗７﹒１巴仙
，收報９﹒０１銀，為全日表現最差嘅藍戰士。中石油（００８５７）都唔好得去邊，係跌幅第
二大藍戰士，踢低６﹒１巴仙，收報９﹒９７銀。同油股唇齒相依嘅頁岩氣股，今日走勢慘不忍
睹，巨濤（０３３０３）重挫近１２％，收報１﹒５銀；百勤油服（０２１７８）都跌逾１０巴
仙。
　　有祖國傳媒上禮拜報道話，四大航運央企會整合，不過多隻牽涉在內嘅上市公司今日都相繼
出嚟否認。其中中海發展（０１１３８）跌６巴仙，收報７﹒１３銀。中海集運（０２８６６）
同中遠洋（０１９１９）分別跌３﹒７巴仙、４﹒５巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。