《小傳日記》歐洲立立亂，全球失分寸；內房齊捱沽，重貨怎打算？

　　《小傳日記》呢排個市真係好難玩，基本上花旗國同祖國魚缸係好係壞，香江都未必跟足。
難得缸友好快就消化咗剎停投資移民嘅消息，點知噚晚（１５日）瑞士央行竟然出其不意宣布「
脫歐」－同歐元脫勾，兼減息半厘，瑞郎同金價升到「嘭嘭聲」，但就拖累當地魚缸急插水；而
花旗國都唔見約百點，連跌五日。另邊廂，孖屐憧憬歐央行下周「放水」救經濟，三大歐洲指數
齊齊踢高１至逾２巴仙，真係亂到不得了！
　　外圍水深火熱，雖然Ａ仔一於少理，照樣炒阿爺繼續出手救市消息，一度重上三千四關，收
升逾１巴仙報３３７６點，但都幫唔到香江壯士氣，又回吐番２４７點收２４１０３，國貨佬指
數收跌１１３點報１２０７６，全日成交約９４９億左右。

＊瑞士突脫勾歐元多煩憂，Ａ仔好少理連日高高收＊

　　瑞士央行噚日嚟一招取消上限，即刻令瑞郎爆升，匯市齊齊嘩然，沽空瑞郎嘅交易商當然就
損失巨大啦，鍾意去瑞士滑雪嘅朋友都好唔開心，缸友更擔心名貴鐘表佬會因為瑞郎急升，令到
來貨成本貴咗影響生意。
　　亨得利（０３３８９）今日就跣低逾５巴仙報１﹒４銀；先施（００４４４）本來都升少少
，不過後來無升跌；東方表行（００３９８）就唔見近３巴仙報１﹒３８銀，仲曾經低見四年半
新低添。
　　股匯市風頭火勢，孖屐資金就轉去黃金避險，刺激金價亦都創四個月新高；但唔知係咪驚金
貴少咗人買金飾，周大福（０１９２９）跟市碌低２巴仙，報９﹒８５銀，六福
（００５９０）跌至２９銀，周生生（００１１６）好少少，可以逆市企穩，收升２０﹒３銀。

＊表行與金行同樣要捱沽，中海外被質街坊無辜辜＊

　　祖國磚頭呢排都好頭痕，日日都有唔同壞消息爆出。估唔到，龍頭祖國海外（００６８８）
竟然都中招，被指深圳附屬項目被鎖定。連龍頭都「出事」，又點會唔嚇到缸友腳都震埋！祖國
海外股價今朝即刻插低近７巴仙至２３﹒５銀。公司中午發澄清通告，話該項目被鎖定只係一般
管理，而唔係違規，仲話唔會影響業務，缸友先放心入番市，結果埋單只係唔見３巴仙，收
２４﹒５５銀。反而街坊萬科企業（０２２０２）同潤地（０１１０９）就跌得仲多，碌低４至
５巴仙。
　　不過，萬達商業（０３６９９）就逆市抽高近４巴仙收４８﹒１銀，勁！皆因資產管理公司
出手增持，而另外萬達集團主席王健林之前講過，將會喺聽日（１７日）宣布轉型計劃，唔通會
有好消息？！

＊阿爺錫到暈內險夠發奮，新保被減持照樣樂透心＊

　　噚日祖國一班「揸Ｆｉｔ人」開完會先講完話要改革機關機構單位人員嘅養老體制，搞到成
班保險佬升咗唔少；今日有更多細節喺市場滲出，好似會建立「職業年金」制度，５年後個規模
仲去到過萬億咁多。嘩，阿爺突然間送咁大粒糖比班保險佬，真係開心死！就連畀投資者減持咗
近６億貨嘅新保（０１３３６），今日都最多升４﹒７５個巴升至４５﹒２５銀，創咗上市新高
，雖然最後升收窄至３巴仙報４４﹒６５銀，但已經好巴閉。
　　班街坊都唔執輸架，平保（０２３１８）又再抽高１﹒９巴仙收報８８﹒３銀。國壽
（０２６２８）就一度高見３２銀！雖然兩個保險佬無新保咁巴閉創上市新高，但表現已經好好
。阿爺咁出力派糖，點都要嗒下嘅，可以伺位入貨。

＊大大價股份今天同受壓，巴記來唱淡車仔後波格＊

　　早排戰鬥力十足嘅大隻佬ＱＱ（００７００）今日就係咁捱打，左一拳右一拳，跌咗４巴仙
收１２１﹒９銀，慘！長期捱打嘅銀娛（０００２７），畀巴克萊唱淡，加上野村話大衝集團可
能閞閉部分貴賓廳，搞到銀娛又跌穿４０銀水平，碌低逾４巴仙收３８﹒３５銀。　
　　生發發（００３８８）就被高佬削目標至１９６銀，但都算企穩收１７７﹒４銀。仲係收市
後宣布研究引入市調機制，同計劃再推收市競價時段。小傳即刻回想起當年大象（００００５）
喺收市後競價時段，驚見３３蚊嘅情景…而今日大象都就因為美銀同花旗業績唔好，搞到跌到去
６９﹒８銀，收報７０﹒２銀。
　　除咗班大隻佬壓打，砵砵車都唔係幾好過。巴克萊唱淡長汽（０２３３３）同東風
（００４８９）話佢地擴張得快過頭，需求無咁多，利潤同毛利率都會減少。缸友聽到都心怕怕
，搞到分別跌４﹒９個巴仙同３﹒７個巴仙，慘。假期愉快，請請！　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。