《小傳日記》中資輪流開Ｐａｒｔｙ，國指破關好Ｈａｐｐｙ！

　　《小傳日記》花旗魚缸噚晚無咩特別，只係窄幅上落，對香江無太大指標作用。噚日
（８日）靠生發發（００３８８）同祖國磚頭反擊嘅香江魚缸，今朝（９日）就繼續高開４８點
，喺祖國錢莊接捧推高下，恆指一度高見２３６４５點，再創逾３個月高位。
　　近排「中字輩」日日排隊飛升，有消息話，其實係有神秘資金入市，而呢筆天文數字，正正
就係舊年阿爺唔畀企業拎出外「濕平」嘅錢喎！係真係假，不得而知，但有一點好肯定，就係今
日國指已經跑贏恆指成條街，急漲１１９點或１﹒２巴仙收１００７５，而恆指就只得４０點或
０﹒２巴仙落袋報２３５２５。
　　最緊要係，成交畀噚日更多，足足增加近８巴仙至逾９５９億銀，創三個月高位喇！唔通
「牛仔」開始甦醒？！

＊資金滾滾來成交日日升，有個叻媽媽中遠海至勁＊

　　中遠海控（０１９１９）阿媽組建財產保險公司獲批開業，成為第一間航運業自保公司，認
真威威；唔單止咁樣，富瑞亦出手唱好今年貨櫃運費回升，仲推薦買中遠海控同埋東方海外
（００３１６），難怪中遠海控揚帆出海，飆前逾１１巴仙收３﹒３１銀，後者就喺岸邊玩水，
只升近３巴仙收４３﹒１５銀。反而街坊中遠海發（０２８６６）就叨光衝前６巴仙添！
　　「一帶一路」股靜咗一排，終於有番幹勁喇！話說有分析指，阿爺力推公共私營合作模式
（ＰＰＰ），基建股一定受惠，中交建（０１８００）仲獲凱基升目標至１１﹒２銀，維持買入
評級，股價即彈起逾４巴仙收９﹒９９銀。兄弟中國鐵建（０１１８６）、中鐵（００３９０）
各有逾３及２巴仙進帳。

＊一帶加一路基建有錢途，青啤多人爭飲勝再跳高＊
　
　　青啤（００１６８）股權爭團戰愈來愈激烈，又多位強勁買家加入！自從朝日集團想賣出手
上嘅兩成青啤股權之後，潤啤（００２９１）係眾多傳聞入面，呼聲最高；但最新消息指，嘉士
伯有意加入戰團，已經搵咗顧問公司畀意見咁話。青啤即時開心彈起近６巴仙收３６銀；潤啤就
未認輸，埋單衝高近２巴仙收１７﹒３６銀。
　　ＴＶＢ（００５１１）可能染紅？！噚晚ＴＶＢ發通告指，收到第三方傳奇影業及娛樂集團
主動建議，收購公司近三成股權。ＴＶＢ就話唔知潛在買家係乜水，但係孖屐揣測呢位神秘買家
係有「中資」背景。份通告仲寫明，如果今次賣得成，ＴＶＢ就一定唔可以實行早排公布嘅巨額
回購計劃。究竟賣唔賣得成就有待公布，但今日ＴＶＢ股價就跳起逾３巴仙收３０﹒６銀。
　　有線（０１０９７）亦消息多多，有傳話賣盤接近尾聲，買家亦係中資企業。另邊廂，佢哋
旗下嘅奇妙電視，將於５月３０日登場。之不過，消息多還多，但個價收市只能原地踏步。

＊電視起風雲中資欲染指，有線原地踏無線喜孜孜＊

　　一聽到阿爺話要大力推動傳統建築材料去產能、加快升級換代，一班水泥佬即刻開哂
Ｐａｒｔｙ，西部水泥（０２２３３）、中建材（０３３２３）齊齊跳起近４同逾１巴仙，報
１﹒０７同５﹒２８銀。大阿哥安徽海螺（００９１４）飛起逾４巴仙，收２６﹒９５銀，仲曾
經創逾年半高２７﹒４５銀！金隅（０２００９）都好威水，噚日斬穫逾６巴仙，今日再接再厲
，衝前逾４巴仙，埋單３﹒３銀，亦見過３﹒３５銀為近一年半高。

＊水泥互追趕紛創一年高，魔笛見餘威內房續風騷＊

　　大摩「摩笛」吹響以後，內房就聞歌起舞跳個不停，不過大和提醒大家，神州房地產今年會
回復正常銷售，好難好似上年咁有阿爺支持而出現強勁增長。大和睇好啲有良好管理嘅磚頭佬，
首選係潤地（０１１０９）同中海外（００６８８），佢兩個再彈高近５同近２巴仙，報
２１﹒７５同２４﹒５銀。
　　大象（００００５）Ａ系美元優先股打算派息０﹒３８７５美元，又有傳佢諗住收購財富管
理業務資產，結果卻腳軟不足１巴仙，得返６６﹒２銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。