《小傳日記》藍戰添新貴，吉利巴巴閉；中資輪流升，壽仔好好揮！

　　《小傳日記》花旗魚缸近排沒有最高，只有更高，喺油價上漲及憧憬侵侵經濟計劃有驚喜下
，三大股指再創收市新高；當中道指上星期五晚（１０日）收升９６點報２０２６９。大行「細
摩」更預言，侵侵政策可能令油價短期內升１０至１２蚊美金添呀！
　　外圍喜氣洋洋，香江「金雞」亦好強。雖然魚缸唔係話大幅爆高，但中字輩各板塊輪住炒，
內險、內銀、電力股、有色金屬股全部有份。與此同時，上星期五大隻佬指數宣布執位，基金今
日梗係要ｔａｋｅ　ａｃｔｉｏｎ，結果魚缸成交旺到不得了，全日埋單有近９０８億銀，恆指
收漲１３６點報２３７１０，連升四日兼創四個月高位。上證收升０﹒６巴仙報３２１６，國指
表現更勝一籌，急漲１３２點報１０２５７，創逾一年高位。

＊利豐被叮叮梗係唔多醒，吉利成新貴踩油夠精靈＊

　　藍戰士重新執位，市值接近２９０億銀嘅利豐（００４９４）被叮叮，真係慘慘豬；由３月
６日起，就要除下藍戰皇冠。利豐埋單唔見逾２巴仙，報３﹒３４銀。至於黑馬成為藍戰新貴嘅
吉利（００１７５），就踩行油門，衝前近７巴仙收報１０﹒７８銀。勁！
　　國貨方面亦都執咗位，郵儲銀行（０１６５８）將會成為國貨一員，而青啤（００１６８）
就要告別啦！前者倒跌１巴仙，後者反而微升０﹒３巴仙。恆生ＡＨ指數成份股就由６３隻減到
６０隻，不過被剔走嘅中集集團（０２０３９）就反而飛起近６巴仙。

＊母債乖仔償母子同惆悵，電盈沽電訊你傷我更傷＊

　　香港電訊（０６８２３）陰公豬，被媽媽電盈（００００８）折讓逾８巴仙掟貨，足足沽咗
約１１巴仙貨。完成之後，電盈持股就得番近５２巴仙，今次套現超過８５億銀，除咗用嚟企業
用途以外，仲要用嚟還債，唔怪之得香港電訊要急插逾７巴仙收１０﹒２６銀，電盈都唔見近６
巴仙收４﹒５７銀，今次真係母債子償喇！
　　中遠海控（０１９１９）阿媽中遠海運集團就有好帶挈，宣布同綠地（００３３７）阿媽全
面展開戰略合作，仲計劃搞碼頭基金，綠地阿媽就做基石投資者。消息刺激中遠海控出海揚帆近
１１巴仙收３﹒７７銀，勁！
　　
＊中遠海控飆有色亦落鑊，內險炒不停壽仔甚靚仔＊

　　內險股繼續炒不停，平保（０２３１８）、人民保險（０１３３９）齊齊衝前逾１巴仙，報
４２﹒２同３﹒２５銀。新華保險（０１３３６）更加跳高近２巴仙，報４０﹒９銀。國壽
（０２６２８）喺恆指嘅比重將會增加，亦急急彈高逾３巴仙，報２４﹒４５銀，創過逾一年高
２４﹒６５銀，仲係全日最叻藍戰士！
　　神州有色金屬期貨都發力爆上，帶挈大冶有色（００６６１）、中多金屬（０２１３３）落
鑊飆高８至９巴仙，收０﹒１５７同０﹒２７銀。洛陽鉬業（０３９９３）都跟住踢高近４巴仙
，埋單２﹒６銀。

＊大行來護航電力發光芒，煤電新能源缸邊鬥領放＊

　　大摩話，因應電價可能上調、燃煤使用率同煤價穩定，燃煤發電行業好快會再見光明。潤電
（００８３６）最被睇好，結果行前２巴仙，報１３﹒９４銀。大唐發電（００９９１）都斬穫
近４巴仙，收２﹒１９銀。華能國際（００９０２）目標升到５﹒５銀，應聲飛起６巴仙，報
５﹒３５銀。
　　華能新能源（００９５８）上個月完成總發電量增長２９巴仙，獲中金維持評級籲買，全日
企高逾８巴仙，收報２﹒７２銀。
　　另一邊視廂，舜宇（０２３８２）獲麥格理大幅上升目標價至８０銀，若以前收市價計算，
潛在升幅高達７３巴仙，難怪今日彈起逾６巴仙收４９﹒１５喇。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。