《小傳日記》大象績前跳隻舞，魚缸再創五月高

　　《小傳日記》花旗國魚缸連升第７日，香江魚缸今朝（２０日）承接升勢下高開３２點，加
上Ａ場造好，香江魚缸乘勝追擊，由多位大隻佬支持下恆指升幅有所擴大，最多曾經踢高１６８
點好好意頭，高見２４２０２點，創咗５個月高位。全日就有１１２點進帳，收報２４１４６點
。
　　Ａ場升起超過１巴仙好好氣氛，報３２３９點；國貨佬亦衝前８５點，報１０４４５點。而
今日主板成交有７８１億銀，少過上周五（１７日）９巴仙。
　　香江前特首煲呔曾被裁定一項公職人員行為失當罪成，案件押後至星期三（２２日）判決。
煲呔不准保釋，即時還柙。
　　星期三除左要昅實煲呔之外，仲有新一份財政預算案。

＊煲呔曾還柙星期三判刑，恆指續造好成交有點靜＊

　　錢莊股今日向左走向右走，東亞（０００２３）成績表唔靚仔，雖然大摩同高盛都升佢目標
價，但都繼續畀「沽貨」評級，缸友們好聽話咁質低佢近１巴仙，收報３２﹒８銀。渣打
（０２８８８）仲慘；摩通降低評級去到「中性」，但升目標價，今日亦唔見４巴仙，報
７３﹒９５銀。
　　大笨象（００００５）聽日（２１日）派成績表缸友再憧憬有回購行動，今日跳定舞先，瑞
信估佢全年經調整稅前盈利４９億美金，午後交投變得活躍，全日跳起１巴仙，報６９銀；阿仔
恆生（０００１１）亦都係聽日出業績，但就腳軟唔夠半巴仙，收報１６３﹒１銀。

＊大行升目標東亞仍低收，大象炒回購渣打卻甚愁＊

　　早前報道指高鑫零售（０６８０８）會同蘇寧、阿里巴巴以及ＱＱ（００７００）合作，但
公司澄清話唔關阿里同ＱＱ事；另外公布上年多賺逾半成至近２６億人仔，可惜都係要跪低
１３巴仙，收報７﹒５５銀；阿里今日舉行新零售發布會，個別百貨股炒起，聯華超市
（００９８０）彈起近８巴仙，埋單３﹒４７銀；北京京客隆（００８１４）亦有半成進帳，報
１﹒７７銀。
　　另一方面，晨鳴紙業（０１８１２）上年多賺１倍去到近２１億人仔，每十股派６蚊，今日
跑前近７巴仙，報１０﹒０２銀，高見１０﹒１８銀破頂，勁！

＊高鑫腳仔軟街坊甚靚仔，晨鳴業績俏今天好好揮＊

　　蒙牛（０２３１９）獲匯證唱好升級籲買，目標更上調至１９﹒２銀。全日彈高３巴仙，報
１５﹒５４銀，仲係最打得藍戰士。
　　旺旺（００１５１）就唔多好彩，匯證將評級降到「減持」，「他屐」削至４﹒５銀，結果
瞓低逾２巴仙，報５﹒３７銀。
　　金沙（０１９２８）舊年賺１２﹒２億美金，跌１６巴仙。德銀話雖然份業績１月一早已經
公布咗，估值風險回報吸引，所以繼續叫「買」，但因為資產折舊上升，降目標至４３﹒５銀。
金沙腳軟軟近１巴仙，得返３２﹒１銀。

＊牛牛與旺旺升跌因匯證？鐵鳥齊高飛汽車勢更醒＊

　　阿爺前排推出「民用航空發展十三五規劃」，期望民航旅客運輸量年均增長逾一成。南航
（０１０５５）又獲中金升目標至６蚊，改叫「買入」，應聲飛前近３巴仙，報５﹒０４銀。鐵
鳥街坊國航（００７５３）目標都提高到７銀，衝前逾２巴仙，報５﹒８９銀。
　　地下一眾砵砵車都有好消息。阿爺將會研究調整新能源車嘅補貼政策，包括提高企業同產品
嘅進入門檻，促進發展。長汽（０２３３３）即刻駛前逾６巴仙，收９﹒３６銀，係最勁國貨佬
。比亞迪（０１２１１）、吉利（００１７５）齊齊行前近３及４巴仙，埋單４４﹒９同
１１﹒１４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。