《小傳日記》貿易戰蔓延，中興慘中箭；魚缸三萬危，ＱＱ被質低！

　　《小傳日記》港匯仍然低殘，金管局第六度出手接貨，走資殺埋身，已經連跌三日嘅香江魚
缸今日（１７日）繼續捱沽，就算噚晚（１６日）花旗國反彈２１２點收２４５７３慶祝季績省
鏡，今朝祖國宣布首季ＧＤＰ增長６﹒８巴仙略勝預期，都阻止唔到大戶當魚缸係ＡＴＭ（提款
機），股王ＱＱ（００７００）尾市仲做埋淡友點心，一度質低２巴仙至３９５銀，創近四個月
低位，埋單仍要跌逾１巴仙收３９７﹒２銀，傷透唔少粉絲心。
　　仲有花旗國又挑機，禁制中興（００７６３），中美貿易戰又升溫，嚇到手機設備孖寶舜宇
（０２３８２）同埋瑞聲（０２０１８）腳都軟晒。魚缸喺好壞消息夾攻下，全日走勢Ｃｈｏｋ
到暈，一陣又試過最多抽升１６２點，一陣又插番３０２點。
　　總結全日賽果，三萬關又再響起警號，恆指收跌２５２點報３００６２。Ａ場跌逾１巴仙收
３０６６點，國指就唔見１０７點報１１９００。全日成交１１７２億銀。

＊花旗國針對中興心都碎，街坊要唞唞舜宇低低收＊

　　花旗國出手禁制中興，禁止當地７年內向中興賣零件，而中興生產設備中估計約三成零件都
係由花旗國企業提供，今次畀佢搞一搞，孖屐都關注會唔會嚴重打擊到公司。而中興醒醒目目地
就開市前停賽，券商都出嚟唱淡，其中富瑞直頭睇淡到將他屐劈到去１５﹒７２銀。睇嚟中興即
使復賽，股價都要捱打一輪。
　　受消息影響，連帶科技同業都被波及，缸友急急腳將手機設備佬沽走，舜宇最傷，大拿拿唔
見近６巴仙，報１４７銀，係最慘藍戰士；另一藍戰士瑞聲都唔好得幾多，碌低近５巴仙收
１３４﹒２銀；街坊長飛光纖（０６８６９）、丘鈦科技（０１４７８）分別唔見３巴仙至４巴
仙，收３５﹒７５銀及１０﹒６８銀，慘！

＊港銀炒加息東亞最得戚，小象變飛象長實士氣強＊

　　港匯仲未擺脫弱勢，金管局已經第六度出手，花旗國魚缸尾市買入近５８億銀港幣，累計已
經買咗共１９０億港幣左右，周三（１８日）銀行體系結餘亦降到去約１６０７億。走資警號仲
未停止，港元拆息再全線上升。憧憬加息之下，香江銀行繼續成為追捧對象，另一方面，大摩奏
起魔笛唱好，話Ｈｉｂｏｒ上升對港銀有利，建議重點增持小象（０００１１）！小象即時搖身
一變做「小飛象」，飛起近２巴仙收１９２﹒３銀，距離今年２月創下嘅１９４﹒４銀歷史新高
只差一步，勁。其他街坊中，東亞（０００２３）就仲叻，衝前逾２巴仙收３３銀，做埋最威水
藍戰添。
　　至於獲法興微升目標至８９﹒９６銀嘅大象（００００５）就重得滯飛唔起，收市跌近１巴
仙收７５﹒４５銀。
　　大摩亦提到，除非１個月Ｈｉｂｏｒ升得好急，否則香江磚頭佬短期風險有限。長和系主席
李嘉誠及李澤鉅已經連續四日，共斥逾６億銀增持長實（０１１１３），難怪逆市升近１巴仙報
６６﹒８銀！不過其他街坊就普遍跟市碌低喇。

＊賭股有運行美高梅翻生，大行送祝福永利向下碌＊

　　海南省改革，噚日嚇到缸友爭先掟走濠賭佬。今日摩通出嚟派定心丸，繼續叫增持美高梅
（０２２８２），將目標價由２３銀升到去２５銀，距離噚日收市價仲有逾兩成水位，缸友即時
重拾信心掃貨，美高梅埋單成功反彈近５巴仙收２１﹒４５銀。
　　唔單止摩通唱好，中金都睇好馬交賭收，將今明兩年收入增長預測，由原來的１７巴仙及８
巴仙，上調至１９巴仙及１１巴仙。金沙（０１９２８）更獲維持目標５４﹒８銀，距離噚日
４３﹒７銀收市價仲有逾２５巴仙水位，難怪金沙跳起逾１巴仙收４４﹒３５銀，永利馬交
（０１１２８）雖然都獲中金送上祝福，可惜高處不勝寒，今日升到去３１﹒３５銀創逾４年高
後就碌番落嚟，收市倒跌逾２巴仙報２９﹒５５銀。

＊傳股東配股宏信要捱沽，毛記大反擊賓仕也招積＊
　　
　　遠東宏信（０３３６０）傳股東正尋求以每股７﹒９銀，出售共１﹒９７２億股股份，較前
收市價折讓近６巴仙。公司今朝錄多手共２﹒３億股市前交易，每股造７﹒９銀，涉資
１８﹒１７億銀。最終股份唔見逾６巴仙，報７﹒８４銀。
　　毛記葵涌（０１７１６）掛牌當日牙擦擦，點知最近連跌六日足足唔見３１巴仙，今朝仲曾
低見２﹒０５銀上市新低，不過之後突然來個反彈，畀個Ｓｕｒｐｒｉｓｅ缸友，全日爆升２２
巴仙收２﹒６銀。賓仕（０１７０５）今日亦彈高逾９巴仙，報２﹒０９銀，較１元招股價仍高
出１倍。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。