《小傳日記》企鵝大象齊創低位，魚缸三連跌好失威！

　　《小傳日記》花旗國總統侵侵（特朗普）呢幾日都來勢洶洶，話過會喺公眾諮詢期結束後，
即係噚日（６日），就會向神州２０００億美金嘅進口商品徵收關稅，所以過去幾日，唔少缸友
都被侵侵嚇餐飽，單係過去兩日魚缸已經蒸發咗成千點，噚日仲要開始失守二萬七關。
　　大部分缸友都以為侵侵會正式「扑鎚」再向神州徵關稅，魚缸今朝（７日）繼續一片愁雲慘
霧，低開７８點，雖神州錢莊之後一度跟隨Ａ場跳彈床，魚缸亦一度最多反彈２２１點，高見
２７１９６點，但成也錢莊，敗也錢莊，滬指喺中午埋單前突然失守二千七關，神州錢莊亦跟住
搭沉船，搞到香江魚缸倒插３０５點，低見２６６６９點，穿咗噚日逾一年低位２６８１８點。
　　下晝過後，缸友開始覺得侵侵嘅徵稅計劃到最後或者都係得個桔，開始低撈一Ｄ重磅藍戰士
，魚缸跌勢逐步收窄，仲一度重上二萬七關，可惜到最後都係要腳軟碌低１點，報２６９７３點
，連跌咗三日蒸發咗９９９點或近４巴仙。魚缸成交只有１１０５﹒３億銀，較噚日大跌市多咗
超過５個巴仙。
　　國貨方面就跣低１９點，報１０５５９點，Ａ場符碌上返二千七，升１０點或近半巴仙，報
２７０２點。
　　
＊企鵝好苦命中移夠硬淨，賭股又受壓銀娛遭下殺＊

　　藍戰士方面，ＱＱ（００７００）呢幾日因為阿爺要嚴管網遊而搞到不停插水，今日最多唔
見咗近２巴仙，低見３０９﹒６銀，創逾一年新低，但有唔少缸友撈底推高返個價，全日升返近
１巴仙，報３１６﹒８銀。中移動（００９４１）又成為避風港，彈起唔夠１巴仙，報
７５﹒６５銀。大象（００００５）又再創超過一年新低啦，低見６６﹒７５銀，埋單唔見咗近
半巴仙，報６７﹒２銀。
　　賭佬今日心情差，事關里昂下調咗佢地嘅增長預測至１５﹒６巴仙，表示佢地第二季成績唔
靚，加上「孖屐」風險高，不過都對佢地嘅前景有信心。銀娛（０００２７）受佢祝福兼賜咗個
「買入」評級同埋６８﹒６６銀「他屐」，不過佢全日都要仆低，最低見５１﹒２銀，無哂
Ｍｏｏｄ，跌近４巴仙報５２蚊，仲要係最差藍戰士！
　　美高梅（０２２８２）同新濠（００２００）都走唔甩，全日碌低超過３巴仙及近５巴仙，
報１３﹒４２銀同１７﹒１６銀；金沙（０１９２８）報３４﹒５５銀，跌超過３巴仙；另外，
澳博（００８８０）報７﹒８３銀，跌超過４巴仙。

＊恆指要換馬東亞無有怕，金斯瑞被納股價有人撐＊

　　下個禮拜嘅大事件莫過於恆指即將換馬，而向指數有３４年歷史嘅東亞（０００２３）都要
「Ｓａｙｏｒａｒａ，忍著淚說一聲Ｇｏｏｄｂｙｅ」，正所謂「寶寶心裡苦，但寶寶不說」，
李國寶早前都話「我當然Ｆｅｅｌ　Ｒｅｇｒｅｔ」，但其實自從消息傳出後，東亞股價都有小
小炒作，因為缸友估緊基金出貨後，「寶寶」會唔會出手渣返小小貨，所以東亞今日都漲近４巴
仙，報２９﹒１５銀。此外，招商局港口（００１４４）都被人踢出，但臨尾都攞返個彩，成為
全日最勁藍戰士，收市抽高近５巴仙，報１５﹒２６銀。
　　當然啦，有人辭官歸故里，就有人漏夜趕科場，申洲（０２３１３）同中生製藥
（０１１７７）下個禮拜就升格做恆指新貴，但今日股價有小小唔生性，申洲全日瀉逾１巴仙，
報９６﹒９５銀。中生製藥挫逾２巴仙，收報９﹒２４銀。
　　講完恆指，當然都要講下恆生綜合大中型股指數，入面亮點包括被納入嘅碧桂園服務
（０６０９８）同金斯瑞（０１５４８），兩者今日「飛高高」，前者漲逾２巴仙，報
１３﹒５２銀。金斯瑞升約半巴仙，報１５﹒８銀。不過，都有陰公豬被人踢出，當中包括中船
防務（００３１７）同神州聖牧（０１４３２），兩者今日收市跪低逾２巴仙同近３巴仙，收報
６銀及０﹒３６銀。

＊蘋果出新機瑞聲卻傷悲，油跌人仔漲航空股上揚＊　
　　
　　蘋果會喺下星期四（１３日）香江時間凌晨三點舉行發布會，過往唔少手機佬都會喺發布會
前，炒蘋果概念，不過今年就好似唔Ｗｏｒｋ，手機佬今日個別發展，瑞聲（０２０１８）喺今
日除淨派０﹒４銀息之後，就跌２巴仙，收報８２﹒７銀，而比亞迪電子（００２８５）繼噚日
走低４巴仙之後，今日就反彈近８巴仙，報９﹒１５銀；丘鈦（０１４７８）同樣跟住反彈，收
５﹒１８銀，升７巴仙；而神州鏡頭一哥舜宇（０２３８２）就報９３﹒５銀，升近２巴仙。
　　油價回軟，加上人仔中間價兩連升，中金公司表示，今年只有機場同鐵路行業表現，會跑贏
大市，認為運輸類股嘅估值好有吸引力，股價或者會有上升驚喜，喺多個利好因素下，帶動一眾
鐵鳥全日齊齊上揚，國航（００７５３）報７﹒１７銀，升半個巴仙；東航（００６７０）南航
（０１０５５）同樣升２個巴仙，分別收報４﹒９８銀同報４﹒９６銀。

＊內需佬走高全日好風騷，缸友一窩蜂蒙牛展雄風＊

　　成為缸友避風港嘅內需大佬們全日好Ｈａｐｐｙ。旺旺（００１５１）今日好叻仔，全日走
高近２巴仙，報６﹒２６銀。旺旺老死蒙牛（０２３１９）全日跳高高，缸友們都好Ｂｕｙ佢，
全日開開心心收升近４巴仙，報２３﹒２５銀；恆安（０１０４４）喺國指比重將上升，全日多
得缸友鼎力支持，最後彈起近３巴仙，報７１﹒３銀；潤啤（００２９１）今日無飲醉酒，全日
升超過２巴仙，報３３﹒１銀袋袋平安。
　　物管佬中海物業（０２６６９）同埋綠城服務（０２８６９）都齊齊跳起Ｙｅａｈ，彈高超
過５巴仙同３巴仙，前者報２﹒２６銀，後者收報６﹒２銀咁囉！彩生活（０１７７８）跳起超
過３巴仙，報４﹒６６元。周末愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。