《小傳日記》東航無咗餐後茶卻送餐後包，唔通咁樣可以吸客？

　　昨日（21日）星航一班由倫敦飛往新加坡嘅班機，因為中途遇到強氣流，飛機被迫急降曼谷機場，事件中造成2死30多傷。筆者幾日前亦從倫敦回港，聽落都心有餘悸！
　　筆者今次去英國探朋友，選擇坐東航(00670)經上海轉機。本來筆者對內地航空公司印象不差，點知今次卻大跌眼鏡。由於路途遙遠，來回四程，加上兩程長途，合共食足六餐。因此，今次對東航印象，應該由飛機餐講起。
　　話說筆者食過兩餐之後，就在上海前往倫敦嘅途中，筆者半夜肚餓，空中服務員指著機艙上一大包仍然微暖嘅小餐包，問筆者要唔要。嗰刻，筆者先想起原來飛機餐一般配備小餐包。咁點解我食咗兩個飛機餐，到嗰一刻先想起？原來筆者之前食完就小睡，啲小餐包並無跟飛機餐一齊上，而係等到大家食完個飛機餐，甚至已經收走餐具後，先攞出來，叫乘客乾啃。
　　以前，食完飛機餐後，航空公司會提供餐後茶水或咖啡。而家東航無左餐後茶，反而將餐包後送。筆者愚昧，唔通而家航空公司唔興提供餐後茶，改以「餐後包」待客？
　　喺回程嘅飛機上，同機有唔少外國乘客。筆者直覺認為，內地旅遊業復甦啦，吸引咁多旅客來玩。但當筆者去轉機時，卻發現呢班外國人好多都係同道中人-轉機客。有啲飛東京，有啲飛仁川，有啲甚至飛曼谷。大家喺轉機通道上排隊過關檢查登機牌同護照時，卻又多出一個非正式人手檢查登機牌，唔通怕大家行錯路？由於人手只有一個，加上轉機乘客眾多，進度緩慢。結果，好快就出現長長人龍。忽然，聽見嗰位女關員向已經入去排隊檢查護照嘅乘客叫嚷：「那是商務艙隊，不是經濟艙隊！」筆者愕然，原來檢查護照都分商務同經濟艙。睇嚟，內地確實已經同世界接咗軌。
　　只係，經濟艙條隊，有好幾部自動檢查機，並有兩個關員從旁協助，因此過關尚算順利。反觀商務艙條隊，雖然人數少，但只有一個人手檢查站，因此進度緩慢。睇住經濟艙嘅人一個個入閘，商務艙乘客不滿嘅情緒溢於言表。
　　入到候機室，只得幾家咖啡店開住，兩家睇落比較高檔次嘅中菜館可能因為時間尚早仲未開門，只得一家自稱賣越南菜嘅小餐廳。最多人買嘅係一款叫做「牛特別」嘅河粉，入面啲料係切半牛丸，小段牛筋。超薄牛肉，幾絲牛百葉，以及芽菜等配料，呢個一啲都唔特別嘅「牛特別」，盛惠78元人仔。價格比起香港機場嘅豬排麵賣64港元，倫敦吉域機場嘅早晨套餐（三文治+乳酪或其他小吃+飲料）約49港元，仲要貴。
　　咁嘅配套點樣同區內其他機場競爭力？另外，機場裏面嘅免稅店絕大部分是「日上」壟斷咁滯。唔怪至拍烏蠅，事關間間都係同一個招牌，畀人一種感覺，分店遍布候機室，點吸引人去買？所以無論係東航定係浦東機場要具備競爭力，仲有好多嘢要執。請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。