《小傳日記》魚缸又到期結日，淡軍奮力猛沽，最終成功再次隊穿１５０００大關，收市前
結果都係上唔返，正式宣告失守萬五，淡軍又贏一仗。
全日隻隻股都跌，睇到人無曬心機。不過今日有隻逆市奇葩就勁升１２巴仙，講緊就係隻維
他奶（００３４５）。維他奶噚日出盈喜，預期截至９月底中期純利介乎１﹒４至１﹒５億銀，
而舊年同期就係３２８０﹒４萬銀，即係賺多成３﹒２６倍！不過份盈喜都均真，講明有大約
５９２０萬銀都係來自政府嘅疫情補貼，如果唔計補貼，即係大概賺多８０８０萬銀，都賺多成
１﹒４６倍！
盈喜入面就提到，賺多嘅主要原因係因為神州業務嘅淨利潤大幅增加，取得「令人鼓舞嘅收
入增長」同埋穩健的盈利能力。不過維他奶打入神州市場都唔容易，２０１８年嗰陣就曾經有翻
版事件出現，一個包裝超似維他檸檬茶咁樣嘅翻版就出現喺上面孖屐，連個ｌｏｇｏ都十足十嘅
「維他牛」，當時都掀起一輪網絡熱話，而「維他牛」老闆都曾經直認包裝係有「參考」維他檸
檬茶，仲聲大大叫維他奶不如收購來解決紛爭。
雖然近年都唔係好知後續係點，不過如今睇到維他奶預告神州開發得唔錯，相信都無被「維
他牛」嘅老翻風波影響到，不過如果要再進一步挑戰蒙牛（０２３１９）或者農夫山泉
（０９６３３）嘅飲品市場地位就係後話喇，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動
