《小傳日記》創科（００６６９）噚日再受到沽空機構狙擊，股價大跌近５巴仙。今次狙擊
創科嘅都係佢：Ｊｅｈｏｓｈａｐｈａｔ Ｒｅｓｅａｒｃｈ，上次話創科「誇大利潤」，今次
就話「有規模地欺詐客戶」喎。
Ｊｅｈｏｓｈａｐｈａｔ Ｒｅｓｅａｒｃｈ提到，創科大規模嘅欺詐大客戶「家得寶」
（Ｈｏｍｅ Ｄｅｐｏｔ）至少有４年時間，包括將只可以喺家得寶獨家發售、完整無缺嘅產品
，貼上「瑕疵品」標籤，改喺創科實業旗下嘅特賣場銷售，甚至形容呢個特賣場已經成為創科嘅
「垃圾場」。沽空機構相信，呢個騙局通晒天之後，會令創科營業收入減少大約３分之１。
創科回應指控嘅時候提到，舊年公司嘅工廠直銷店網絡喺網上同店內總營業額少過１億美金
，佔公司同期超過１３０億美金總營業額少過１％。公司又指，沽空機構目標係打擊股東對公司
同管理層信心，因而從公司股價下跌中得益，有關指控包含多種偏頗、斷章取義、唔準確同唔完
整嘅陳述，會保留追究權利。
面對沽空機構嘅狙擊，有啲大行都繼續撐創科！大和指，創科旗下特賣場銷售貢獻佔比只有
約１％，沽空機構嘅質疑「屬過分誇張」。大和相信，呢份沽空報告對創科同家得寶長期關係無
產生任何影響。另一間大行花旗就話，創科股價處於一年低位，公司２０２３年預測市盈率係
１４倍，估值幾有吸引力，係一個幾好嘅重新入市機會。
創科發表聲明澄清，今日股價即刻反彈，曾經升超過６巴仙。不過，
Ｊｅｈｏｓｈａｐｈａｔ Ｒｅｓｅａｒｃｈ狙擊完一次，仲有第二次，呢兩刀對創科股價仍然
有一定殺傷力，唔知Ｊｅｈｏｓｈａｐｈａｔ會就咁收手，定係窮追猛打呢？請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】本港水費近30年不變，水務署表示有需要調整，以改善經營狀況，你認為加水費可否接受？► 立即投票
