《魚缸博客》博客今日同大家睇下蔚來（０９８６６），今日股價高開超過３％，早段曾經
升超過６％，可能同上海放寬防控措施有關。
上海市政府噚日（２９日）發布《上海市加快經濟恢復和重振行動方案》，提出要大力促進
汽車消費。有內地傳媒引述蔚來汽車相關負責人話，對上海發布嘅重振經濟５０條方案中，鼓勵
置換純電動汽車嘅相關政策感到高興，而上海區域訂單情況一直良好，５月喺上海區域新增訂單
量甚至出現大幅增長。
事實上，阿爺近排都係咁力谷汽車產業，早排就減少徵收部分乘用車稅６００億人仔，對車
股本身已經有利。另外，上海最新新增新冠感染人數降到兩位數，疫情防控措施進一步放寬，據
報Ｔｅｓｌａ喺上海嘅車廠６月產量有望恢復正常，「孖屐」對於車企可以加快生產，從而促進
經濟復甦嘅憧憬相信都會愈嚟愈大，蔚來作為車股其中一員，當然要留意喇。
只不過，蔚來始終仲未有盈利能力，相對比亞迪（０１２１１）無咁穩陣，部署上都係炒
ｒａｎｇｅ為主。當然，蔚來番嚟香港上市無耐，整個趨勢都仲要觀察。不過，股價喺最高位
１９６銀回落到１００﹒８銀之後反彈，近日整固後再上，１０天線已經升穿２０天線，
ＭＡＣＤ牛差仍然平穩，博客認為股價短期會喺１１５銀到１４７銀之間上落，大家可以喺現價
買小小，博佢繼續升落去，如果跌穿１１５銀就止蝕。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】政府宣布垃圾徵費暫緩，未來將繼續推廣回收及減廢，你認為幾時先係垃圾徵費嘅時機？► 立即投票
