《魚缸博客》嚟到上半年最後一個交易日,亦係七一回歸前嘅最後交易日,魚缸早段走勢比
較平淡,係商湯(00020)畀個大浪冚得厲害,曾經跌超過五成,低見2﹒91創上市新低
,到底搞邊科?
商湯發公告,執行主席同執行董事徐立、執行董事王曉剛及徐冰,以及集團若干管理層成員
承諾,喺今年12月29日之前,唔會出售公司喺2016年11月1日採納嘅首次公開發售前
受限制股份單位計劃下已歸屬嘅B類股份,以表達對集團長期價值同前景嘅信心。
本來管理層自願延長限售期半年係好消息,但啱啱遇著剛剛,商湯舊年底以每股3﹒85銀
上市,今日正係半年禁售期屆滿嘅日子,大股東湯曉鷗向旗下公司合夥人分派近19億股,相信
有揸住重貨嘅投資者趁今日禁售期屆滿,不問價急急沽貨,以至股價洗倉式下跌。
睇番日線圖,商湯股價喺6月初到中旬喺5﹒21到6﹒3銀橫行整固,走勢未算好差,今
日急跌只係因為禁售期屆滿引發嘅沽盤增加,同集團基本面無關。博客覺得呢浸大幅調整,係短
線撈底嘅好時機,反彈目標先留意50天線5﹒1銀。我相信呢隻AI股未來會受惠「元宇宙」
嘅發展趨勢,但亦不得不防佢喺中美角力中受到影響,唔知會唔會被制裁,呢個會係中長線股價
可唔可以繼續上升嘅關鍵。
《編者按》本欄搜羅即市傳聞,惟消息未經證實,《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情