《魚缸博客》嗶哩嗶哩（０９６２６）噚日公布中期業績，虧損約４２﹒８９億人民幣，比
舊年同期虧損約２０億人民幣有所擴大。期內，月均活躍用戶增加２９％到３﹒０６億，創新高
。收入按年升９％到４９﹒１億人民幣，但按季就倒退３％，表現麻麻哋。
另外，部分業務有增長。增值服務營業額增加約２９％到２１億人民幣、廣告營業額升約
１０％到１１﹒６億人民幣，「電商及其他」嘅營業額升約４％到６億人民幣。不過，主要嘅移
動遊戲業務嘅營業額跌１５﹒２％到１０﹒５億人民幣，集團解釋主要因為上半年無乜推出受歡
迎嘅新獨家發行遊戲。
隔晚嗶哩嗶哩喺美股已經跌超過１５％，睇到市場明顯唔ｂｕｙ呢份成績表。噚日嗶哩嗶哩
喺港股逆市升３﹒１２％，今日就低開１４﹒８５％，早段跌幅一度擴大到超過１７％，跌穿６
月開展嘅橫行區底１７１﹒５銀，相信嚟緊幾日會繼續向下走，並試番５月１０日前低位
１４５﹒３銀。
集團嘅遊戲業務畀唔到市場信心，即使近幾次都獲批遊戲版號，但嚟緊嘅遊戲仲受唔受歡迎
，都仲要觀察下。仲有，嗶哩嗶哩仍然要面臨退市風險，部署上繼續炒波幅先。無貨嘅朋友可以
等股價回到１４５銀左右吸納，喺１７０銀左右食胡。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動
