RSS訂閱 今日大市炒上，升幅榜前列位置有一隻最吸引鑊鏟友，佢就係凱升
（００１０２）。凱升可以話係一登龍門，事關去年營業額連買間中價樓都唔夠嘅公司，竟然可以去經營賭場。單一大股東何猶龍，利用凱升同新濠（００２００）收購俄羅斯位於東北三省旁嘅一個娛樂度假區項目，將會經營２５張貴賓檯、４０張中場檯同８００台角子機。
呢單收購熟口熟面，事關同想當年和叔呂志和將賭場注入嘉華建材、即係今時今日嘅銀娛（０００２７）一樣。銀娛當年賭場未開，股價長年喺單位數水平游走，仲試過跌到得返２、３蚊，而今時今日做埋藍籌股，股價講緊係當年低位嘅１０個開。
凱升似乎想做銀娛第二，條件亦都係唔差，事關俄羅斯得四個博彩專區，凱升買到嘅貨位於海參崴，極近東北三省，就算係北京嘅賭客，去凱升個場都近過去馬交。
剩返嘅問題就得一個，究竟同胞去俄羅斯會唔會愈來愈方便呢？依家仲要申請簽證，聽聞申請時間都唔係咁快。如果好似有港澳自由行咁方便，呢陣東風一吹，凱升可以乘風破浪！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
