RSS訂閱 《笑傲缸湖》到底一間公司點樣先可以叫「大花筒」呢？缸友們可能唔太清楚，但睇下講下
Ｎｅｔｆｌｉｘ，大家就一清二楚啦。最近佢哋寫咗封信畀各位股東，話估預計今年運營同投資
要消耗現金３５億美金（差唔多２７４億港紙）。盈盈計過以香港電視（０１１３７）依家市值
大約３０億港紙計，Ｎｅｔｆｌｉｘ一年燒錢等於於真係買得起９間港視都仲得。
其實，封信係Ｎｅｔｆｌｉｘ連埋第一季財務報告公布。佢哋都知道「燒錢」嘅問題愈嚟愈
嚴重，上年用咗３０億美金，所以之前估今年都係用３０億美金，但點知計一計數，要預多５億
美金！
Ｎｅｔｆｌｉｘ改變咗營運嘅結構之後，今年稅收可能要畀多啲，仲已經計劃投資更多房地
產同其他基建，不過就承諾自由現金流２０２０年會開始有轉變，「仍然期待下年之後，喺會員
人數、收入同營業利潤不斷增長下，每年嘅自由現金流都有所改善。」
雖然Ｎｅｔｆｌｉｘ持續錄得盈利，但自從２０１１年起每年都會出現負現金流。其實佢哋
都知道問題喺邊，就係原創節目同電影持續投資太大，一套自家作品要花幾多錢，可能要到最後
埋數先計到出來。以由墨西哥導演Ａｌｆｏｎｓｏ Ｃｕａｒｏｎ執導嘅《羅馬》，預算都已經
要１５００萬美金，好彩攞到奧斯卡金像獎嘅原創電影獎，叫做省靚Ｎｅｔｆｌｉｘ個招牌。
為咗安心創作原創作品，Ｎｅｔｆｌｉｘ都已經多次發債，依家長期債務已經達１０３億美
金，一年之間上升近六成，今次真係唔知佢可以點收科。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
