【樂活銀髮】一文一武 曾智華與李家鼎

　　退休是人生一大課題，但與其過每天吃喝玩樂的退休生活，倒不如將興趣化成新事業，放下「搵食」的包袱，也許會有意外收穫。

　

　　一向武術了得的李家鼎去年首度主持煮食節目，以傳統粵菜為賣點，近日節目播出第二輯，乘勢推出首本食譜賣個滿堂紅，私房菜館即將在下月初開業，加上出席大大小小活動，鼎爺肯定是今個暑假曝光率最高的藝人。事業能再上高峰，全靠他口中苛刻的老頭子對他訓練有素，從小「迫」他下廚，現年屆71的鼎爺不再舞刀弄槍，重拾鑊鏟菜刀，卻迎來更多掘金機會。

　

　　主持電台節目30多年的曾智華，60歲已「被退休」，現主力寫專欄、寫書、做慈善工作，可以毫無後顧之憂，一方面是作為退休公務員，可領長俸保生活無憂，另一方面是因為他年輕時做過倫敦金經紀，見過金融界的黑暗面，又在股壇交過不少學費，最終靠自己勤力鑽研而累積相當經驗，才可以投資有道，跑贏通脹，最近他更出書教人退休投資的心得。

　

　　每個人的財政狀況、志向因人而異，但如果能趁未退休，在安排財政以外，嘗試回想年輕時的自己，有沒有未圓的夢，或者未能盡情發揮的才能，銀髮生活都可以是七彩斑斕。

　

鼎爺投資百萬開私房菜 大罵樓價黐線

　

　　聲大夾惡的功夫佬形象深入民心，轉換場景到廚房，功夫佬變廚房佬，不再惡形惡相，櫻槍、馬鞭換了菜刀、鑊鏟，李家鼎變身為一個慈祥爺爺，似你我他家那個有時長氣，有時又帶點霸氣的爺爺。

　

「人在天堂，錢在銀行就死得。」

　

李家鼎 Steve

　

Profile

　

　•71歲

　•與前妻施明育有兩名兒子李泳漢及李泳豪

　

事業︰

　

　•18歲開始習武

　•20多歲加入電影圈做龍虎武師，兼任演員，同時學習馬術

　•70年代加入無綫，擔任演員、武術及馬術指導，角色大都是惡人

　•2016年主持首輯《阿爺廚房》爆紅

　•2017年主持第二輯《阿爺廚房》、出版首本食譜《鼎爺廚房》、開設私房菜館

　

　　鼎爺小時候是名副其實的「西關大少」，爸爸在廣州西關是地主也是酒樓老闆，但小鼎爺當年都不可以做少爺，被爸爸迫上爐頭，自8歲學煮傳統粵菜，他早前出席書展座談會時說，爸爸每教煮一次新菜式，之後便拋下一句︰「下次有機會煮畀我食。」未幾，爸爸挽住餸菜回家，鼎爺就要煮一次，煮得滿意，爸爸會提點幾句，不滿意的話，「你自己食埋佢」。後來家道中落，鼎爺沒有繼承父業，去了學功夫、學馬術，少有再拿起鑊鏟。

　

　　偶一為之，朋友到家中聚會，鼎爺會親自下廚招呼朋友，但其實在電視圈知道他廚功深厚的人一直不多，但正因為根基打得好，在好友黃淑儀再三推薦下，鼎爺去年終首度在鏡頭前揸起鑊鏟，事前沒有人知道反應將是好是壞，電視台純粹一博，「我的心態無嘢，就是Do My Best，盡量做好我自己」。結果是，鼎爺多年來的「惡爺」形象180度轉變，昔日他在電視劇演壞人，指住電視罵他的太太們，今天視他如廚神追隨，更因此為他帶來接二連三的掘金機會。

　

鼎爺首推食譜就賣斷市，早前他在書展舉辦座談會更坐無虛席，完場後大批Fans排隊簽名合照。

　

生意初哥早有蝕錢準備

　

　　鼎爺七十有一，大仔李泳漢年前結婚生仔，他大可在家中享兒孫福，但煮食節目今年再度添食後，他頻頻亮相出席品牌活動、出任食品代言人、出版食譜、開私房菜館，連去旅行都有鼎爺同行兼即席下廚，曝光率高過很多當紅小生花旦，如他所說︰「做好你自己就係回報，人哋欣賞你、支持你已經是額外回報。」

　

　　鏡頭前鏡頭後他都說，他的廚房功是家中「老頭子」迫出來的，但自己慢慢煮上癮來，拍節目時日企10小時，最開心是見到鏡頭後的工作人員，個個拿住碗筷，導演一聲「Cut」，全部湧上前「消滅」鼎爺的製成品，「TVB的人工是少咗啲，但煮完之後，班兄弟15分鐘掃晒，呢個係最好的回報，有一日整煎封倉魚，最少有兩斤，10分鐘食剩條骨，咪開心，證明你交代到，人哋鍾意，如果（食物）收廠都喺度，就真係匿埋廁所喊都得。」鍾意他的不只有工作人員或觀眾，最實際得到廣告商和投資者的喜愛。鼎爺的私房菜館將在下月3日開張，位處銅鑼灣登龍街，裝修費逾千萬元，背後當然有大老闆，從未做過生意的鼎爺也投資了數百萬元，「我都無咁（做生意）嘅癮，風險大，今次是第一次。」私房菜的賣點是可親睹鼎爺煮餸的整個過程，食客一按掣，磨沙玻璃變透明，鼎爺就在另一邊「煮畀你睇」，至於沒有玻璃的包廂，一樣有屏幕可「現場直播」，當然不少得鼎爺親自上菜，推介及介紹他的拿手好菜。

　

鼎爺早前出席美食展活動，示範用牙線切皮蛋，避免黐刀，台下反應熱烈。

　

　　雖然是生意初哥，但活了70年的人生道理，應用到商場上也是教材，「無得擔心（蝕本），想幾多年回本、幾多年賺錢，多餘的，賺梗係好，萬一無呢？一定要計，一面正一面負，我教仔教人都一樣。」鼎爺說早有輸錢的準備，但新店未開張，未來3個月已預約爆滿，難怪鼎爺眉開眼笑，「煤氣贊助全場爐具，仲要問幾時可以50人包場呀！咁你話，人哋真係畀面。」

　

私樓要攪珠「我係乞兒呀？」

　

　　近來荷包進帳不少，鼎爺也不避忌向傳媒放聲想多買一層樓，與身旁的李師奶住得舒舒服服，但他都說今時今日買樓一點也不容易，「係想買樓，但想歸想，而家啲樓黐線嘅！」他有兩個馬術學生同是高級醫生，夫婦兩人每月收入15萬元，但鼎爺說他們也買不到樓，「首期200萬元，兩個人捱到夠，準備去買了，升到250萬，儲夠250萬，又升到300萬，他們話不如租樓。」鼎爺愈罵愈氣頂，記者在他眼前一呎多，他提高聲浪，手一指，雙眼一瞪，真是有點驚，但記者更想拍掌高呼︰講得好！「（樓價）死慳死抵都抵唔到，屋企有（錢）無得講，但兩公婆捱出來嗰舊錢好辛苦，（樓價）係一路一路海鮮（價）呀！永遠追唔到，以前住公屋被人睇小，而家已經好Happy，講起呢樣，我最憎政府係呢樣，我畀錢買私人樓仲要攪珠（抽籤）呀？我係乞兒呀？壓力測試是接受，但攪珠買樓我係拒絕，我畀錢買仲要乞咁，有無搞錯，你香港政府做咩？」

　

　　鼎爺早年在新界有村屋物業，後來為了兩名兒子讀書，搬出九龍塘居住，現在再住村屋，有地方放置他逾百棵盆栽。鼎爺嗜好多多，他自言是敗家仔一名，興趣多到一隻手也數不完︰騎馬、打獵、盆栽、雀仔、貓狗蛇鼠……「樣樣都可貴可平，視乎個人要求。」你要最好的？「係，雀籠係頂級的，一個要幾十萬元。」時移世易，現在在街上已少見有人揸住籠雀，鼎爺家中現只有6隻雀，但他說很多人已沒有玩，因為坐車不方便，而且有了智能電話，多了娛樂，「整整吓無咗舊時啲老人家玩意。」

　

計劃退休生活不用執著

　

　　興趣多自然花費大，但做娛樂圈的收入不穩，在鏡頭前又不是經常見到他，其實他總是在幕後，一直以來，有收入有生活，三餐溫飽，他心滿意足，「有就食好啲，無就食奀啲，積穀防饑一定要，常將有日思無日，莫待有時念無時，做人要居安思危。」多年來有不少人以為鼎爺一介武夫，一定是「盲字唔識多個」，錯了，西關大少自有其修養，不時拋書包。

　

　　花在興趣上的錢，鼎爺形容是可以花，也可以不花，最重要將收入的三至四成「做子彈」，放在倉庫隨時候命，三分之一花在日常的燈油火蠟水電租，最後三分之一就是飲食及衫褲鞋襪，「適量地用，唔好虐待自己，唔好做錢財奴隸，人在天堂錢在銀行就死得。」他的投資大都在興趣上，股票基金他從不沾手，在娛圈多年，眼見身邊人在一次一次股災之中損手爛腳，甚至一夜之間要賣去3層樓兼走佬，鼎爺不想如此痛苦。

　

鼎爺首次出書就入圍今屆金閱獎，早前他出席活動與葉劉淑儀合照。

　

　　見鼎爺氣如洪鐘、腰骨筆挺，與Fans談笑風生，退休似乎不在他的字典內，「做到做唔郁，我唔會退休，最多打風流工，揀嘢做，一個人無所事事，我覺得冤枉今生。」他又奉勸計劃退休的人不要太執著，因為未來沒有可以預料，想得太好未必好，「諗住去到幾時遇到咩，到時無咁點？可以諗，但唔好鑽牛角尖，個世界無一定的，執著咪自己痛苦，自己同自己過唔去。」

　

認真不求其 拍節目日企10粒鐘

　

　　一集半小時的《阿爺廚房》，平均煮3至4個菜，還要去街市講解不同食材，鏡頭前的鼎爺不停講、不停煮，鏡頭後的準備功夫更多，「今輯要煮90幾個餸，就要諗過百個畀監製揀，一星期拍五日，三日煮嘢兩日外景，或者調轉，一日拍兩集，即是6至7個餸，10點半On call，最遲9點9我就入廠睇住，今日第一個、第二個煮咩，安排好所有配料、食材。」

　

　

　　一日拍攝11小時，放飯時間不足1小時，每次開廠，鼎爺都要企足10小時，又拋鑊，又示範刀功，還不時解答拍檔譚玉瑛的提問，時間緊迫，想齊齊準時收工，又不想拍攝途中弄得雞手鴨腳，拖慢進度，事前要安排妥當，「雖然有人幫我攞啲材料來，攞錯咗唔話得人，你係阿頭都唔講畀人聽點做，錯咗就唔可以怪人，一定要交代清楚，如果你講啲唔講啲，人哋唔係你肚中條蟲，到時有咩差池，只可以怪自己，點解唔交代清楚？」

　

　　鼎爺做事要求高在行內出名，亦因此被指「惡死」，但他對自己同樣高要求。食譜、食材介紹全部出自鼎爺，所以節目和食譜的內容都要他親自設計，拍攝當日同樣早早到場打點，「拍書的時候，食兩個雞尾包、飲杯咖啡就開始，我不鍾意嘆慢板。」至於電視節目開場寫大字、油花四濺的片段，背後全都是鼎爺親身上陣，但他說練武多年，早已放下毛筆，「56年無揸過毛筆，拍攝前都沒有練，呢啲就是功底，真係要多謝我苛刻的老竇。」

　

　　鼎爺說主持節目的壓力遠超電視劇，當演員只要記熟對白，不用埋位時大可安心休息，但主持節目不只要背熟台詞，面對鏡頭讀出便可以，尤其是煮食節目，「拍攝當日要做的事一定要分到清清楚楚，唔係話個節目係咪自己擔的問題，而是接得你的Job，我一定做好自己本份，不可以求求其其。」

　

鼎爺吸金7招

　

【第一招︰電視節目】

　

　

　　鼎爺主持的《阿爺廚房》第一輯在去年12月播出，共有20集，以傳統粵菜為主打，有別過往教太太們煮家常菜式的煮食節目。據鼎爺所說，由他主持煮食節目的構思三度被電視台高層打退堂鼓，但結果大獲好評，鼎爺的形象也因此改變，為他帶來更多工作機會。節目第二輯在今年7月播出，添食至30集，但鼎爺笑言未獲加人工。

　

【第二招︰開私房菜】

　

 

　　鼎爺獲投資逾千萬元，在銅鑼灣登龍街開私房菜館，鼎爺也投資了逾百萬元，於9月3日正式開張，鼎爺將坐鎮菜館親自下廚。菜館未開張，單是朋友預約已排滿3個月，他透露不少是高官名人，日前公開訂位，一日之間再收逾千訂枱查詢。菜館以最低消費形式收費，最便宜的4人枱最低消費為4000元，最貴是可看到鼎爺親自下廚的VIP房，最低消費2萬元，約可坐14至16人。

　

【第三招︰出食譜】

　

　

　　鼎爺在今年7月推出首本食譜《鼎爺廚房》，全書有40多個懷舊廣東菜式，推出後叫好又叫座，成為今屆書展暢銷書第一位，單是出版社萬里機構在書展期間已賣出約6000本，現時在多個網上書店已斷貨，出版社要加印6000本應市，但鼎爺說未有計劃再出新食譜。

　

【第四招︰出席商業活動】

　

　

　　乘著鼎爺的人氣，自去年煮食節目推出後，香港和澳門都有不少品牌、商場邀請他出席活動，示範拿手菜式。

　

　　一次他出席商場活動，他早兩小時到場準備材料，但一面煮一面「彈」爐火不夠猛，事後他解釋是怕煮出來的菜難以交代。

　

【第五招︰廣告代言】

　

　

　　過往少見鼎爺與任何品牌扯上關係，近日他成為一個海味品牌代言人，拍攝平面廣告並出席美食展，即席示範煮鮑魚撈麵，又與現場觀眾交流合照。

　

【第六招︰出月餅】

　

　　鼎爺與烘焙店合作，推出逾一萬盒自家配方奶黃月餅，一盒8件裝售228元，並為產品代言。

　

【第七招︰踏足旅遊】

　

　

　　鼎爺早前獲郵輪公司邀請上船吃喝玩樂，並上載了多幅他玩樂的相片宣傳。早前，他又聯同其他電視台藝人，出席由本地旅行社辦的中山旅行團的晚會，期間鼎爺親自下廚。

　

【與拍賣官看藝術】常玉作品屢創天價，背後其實藏著跌宕起伏的人生► 即睇