按盤價 
《魚缸博客》喺２０２３年最後一個交易日，恒指走勢窄幅，若然收喺１７０００附近，恒
指同舊年１２月３０日比較，至今累積跌咗１４％，以非正式統計，應該係全球表現最差股指！
不過，有樣嘢就創咗歷史新高，就係上市公司回購股份，金額超過１２２０億港銀，梗係啦，股
價跌到咁殘，如果上市公司認為自身盈利能力無問題，當然乘機回購，然後註銷，已發行股數減
少，自然提升每股盈利同埋增加獲派息金額，對股價有支持作用。
頭三大回購金額最多嘅上市公司依次係騰訊（００７００）、友邦（０１２９９）同滙控
（００００５），回購金額分別約為４６４億、２８０億同２０９億港銀。今朝港股吽吽哋，三
大重磅股都無咩大變動。
今日再講吓航運股，皆因紅海問題仲未完全解決，據最新行業數據，由於受到襲擊威脅，經
常穿越紅海同蘇彝士運河的貨櫃船，有一半已經避開呢條航線。２９９艘合計運力達４３０萬個
貨櫃嘅貨輪已經或計劃改變航線，同一周前相比增加咗大約１倍，相當於全球運力１８％。研究
公司Ｆｌｅｘｐｏｒｔ話，比起利用蘇彝士運河作為歐亞貨運航道，改道非洲所需時間長咗
２５％，成本亦會更高，原油、食品同各類消費價格可能隨之上升。
不過，今朝航運股表現一般，最大隻嘅東方海外（００３１６）最高只係升到１０９﹒６銀
，執筆時倒跌緊幾毫子。從日線圖睇，東方海外喺１３０銀形成大雙頂，相信唔容易突破，你見
到派息大減就知啦。年尾最後一個交易日成交例縮，仲要博命嗰啲就真係坎坷喇。太平洋航運
（０２３４３）上星期就衝過上２﹒６７銀，暫時守喺２﹒５銀以上，跌緊兩仙，２銀似乎係一
個強支持。航運可以留意，但紅海問題對航運股嘅刺激作用，絕對唔會係兩年前嘅翻版！
《編者按》本欄搜羅即市傳聞，惟消息未經證實，《經濟通》亦不保證內容之準確性。
《說說心理話》與你分享應對性騷擾三部曲，減輕心理陰影創傷、提升自我肯定方法 ► 即睇
