按盤價 
《魚缸博客》大市冇咩好講，恒指今朝高開２７點，萬六點係咪守得穩唔知。就算外圍炒緊
聯儲局加息周期結束，甚至喺明年減息，同港股都冇咩關係，皆因恒指同美股嘅正相關性早喺十
幾年前已經大幅降低，同上證綜合指數嘅正相關性就最高。
上證指數星期二再穿３０００點關口，雖然話恒指當日都「跟」跌３１８點，但望番圖，查
實恒指走勢仲衰過上證，因為上證仲守住１０月２３日個低位２９２３，但恒指已經跌到舊年
１１月初以來最低。冇大型基金入市，恒指唔使望會大升，依家日升日跌，基本上都係散戶炒即
日鮮所致，冇咩分析性可言。
今日講吓隻康師傅（００３２２）。點解講呢隻？第一係因為佢派息高，雖然只係派末期息
同特息，但依家預期周息率都有近７﹒３厘，而且係年年派。第二，集團截至今年６月３０日止
嘅中期收益，較舊年同期增加７﹒０４％至逾４０９億人仔，股東應佔溢利較去年同期大升
３０﹒６６％至逾１６﹒３７億人仔，攤薄後每股溢利仍然增加６﹒８分至２９﹒０４分人仔。
走勢上，康師傅喺今年３月１７日高見１４﹒０２５銀後轉跌，但中途嘅反彈都有５毫至超
過１蚊幅度，近期低位係星期三（６日）嘅９﹒１銀，直線咁計應該都可以升到９﹒６至
１０﹒１銀，從形態上睇，短期主要反彈阻力就大約係１０﹒５銀，企穩先有機會進一步上升，
依家整體投資氣氛好差，反而令到呢類派息穩定嘅股份，因為股價下跌而變成高息股，都可以話
屬於另類避險選擇！另外，２０２０年新冠疫情爆發初期嘅低位係７﹒８６１銀，比現價
９﹒３４銀只係低咗１﹒４８銀，照計唔應該會穿，現價買入收息，算係攻守兼備。（ｐｃ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】政府宣布10項短期控煙措施，你是否支持？「火車頭」問題未有規管，你接唔接受？► 立即投票
