《小傳日記》佔中未解決，ＰＭＩ降雪；跌穿兩萬三，中移勢太劣！

　　《小傳日記》聽日（１日）就係１０月１號國慶，亦係「十一黃金周」開始，不過同以往唔
同嘅係，除咗無咗煙花匯演之外，街上再唔係人來人往嘅旅客，而係大批示威者。「佔中」提早
展開之後，噚日（２９日）魚缸就喺期指算日宣告一度失守牛熊線，形勢急劇轉差，今日（３０
日）再加埋匯豐中國ＰＭＩ終值要向下修訂，阿爺又抽走２００億人仔，搞到香江魚缸就再響起
警號，開市無耐就跌穿二萬三大關，最多碌低３７４點至２２８５５點，４４隻恆指牛仔即時
「打靶」。
　　雖然下半場收復番ＤＤ失地，但全日都要唔見２９６點收２２９３２，國貨指數就跌１２８
點收１０３１０，成交就差唔多，約有８４７億銀。總結成個９月份，大隻佬由最高位開始碌落
山，曾經蒸發咗最多２５００點，已經嚴重超賣！不過「佔中」一日未完，睇怕都好難扭轉劣勢
，缸友只能耐心等候吧！

＊４４隻牛仔壯烈犧牲了，券商撐ＱＱ奈何升不了＊

　　雖然成個魚缸又有差唔多成千隻股份向下碌，不過有部分有成交，又有升勢嘅強勢股已經率
先走出困局。先講近排畀阿里巴巴搶晒風頭嘅ＱＱ（００７００），連續跌咗六日之後，今日都
曾經繼續頹勢，低見１１３﹒４銀。雖然中金突破出手打氣，直指祖國移動（００９４１）實在
升咗唔少，股價又錯誤反映國策利好消息，建議缸友係時候換馬去ＱＱ度！
　　可能缸友呢排實在太無方向，見到有券商推薦就跟風衝入去，ＱＱ就喺完場前一度倒升番１
巴仙，只可惜力度唔夠，最終都要跌少少收１１５﹒５銀，未能夠擺脫「七連跌」宿命。　
　　仲有另一個資金避難所，就係成功以逾１７億銀賣咗５個商場嘅領匯（００８２３），比估
值足足高咗逾三成！粉絲就當然好滿意，齊齊入市以示支持，領匯梗係開開心心彈高逾２巴仙收
４４﹒７５銀啦。
　　
＊將售唉瘋６電信全失色，領匯賣商場認真夠招積＊

　　頭先中金就叫缸友同祖國移動說再見，估唔到大家真係齊齊掟貨，搞到祖國移動完場前突然
玩高台跳水，喺收市前１０分鐘，沽壓明顯加劇，９０大關亦正式被攻陷，最終完場狠狠插低３
巴仙，收８９﹒７５銀，連５０天線（約９１﹒２７２銀）都穿埋。
　　其實對於祖國電訊股嚟講，今日工信部已經送上一份大禮，正式向蘋果公司發出進網許可證
，而蘋果就即刻公布，話下個月１０號開始預訂新機「唉瘋６」，１７日就會正式上市。消息一
出，中電信（００７２８）本來都逆市彈高少少慶祝吓，不過下半場發軟蹄，結果碌低２巴仙收
場，報４﹒７６銀。街坊聯通（００７６２）就跌得仲甘，收市唔見近３巴仙報１１﹒６銀，認
真「陰功豬」。

＊銀號與地主佔中有所失，珠寶返來了可惜欠紥實＊
　　
　　電訊股有喜訊，不過全部都頭耷耷，香江呢邊就繼續因為佔中，本地錢莊同埋香江地主今朝
都繼續向下跌，中銀香港（０２３８８）同長實（００００１）就一度大跌近４巴仙，分別跌到
去２３﹒８５銀同１２５銀。
　　但估唔到缸友咁快就已經消化咗佔中嘅消息，多隻受影響嘅股份都開始發威！啱啱講完嘅中
銀香港收市時就企番穩，收報２４﹒７５銀，而長實就去番１２７﹒９銀。
　　唔單止咁，就連六福（００５９０）同周大福（０１９２９）都一齊反彈，前者完場倒升番
近４巴仙報２２﹒５５銀，後者低見９﹒５６銀後即抽高近２％，收１０﹒１銀，勁！

＊十一黃金周濠賭卻仍憂，大股與細股低收復低收＊

　　零售股似乎漸漸走出佔中陰霾，呢邊廂嘅濠賭股就繼續向下碌，昔日嘅「十一黃金周」效應
似不復再，銀娛（０００２７）又再創約一年新低見４４﹒５５銀，埋單都要唔見近３巴仙收
４５﹒１銀，金沙（０１９２８）仍然未擺脫到跌穿４０元大關嘅危機，收報４０﹒５銀碌低逾
２巴仙。
　　其他二、三線街坊都唔好得去邊，澳博（００８８０）大跌近４巴仙，仲差唔多以全日最低
位收市，報１４﹒８銀創近兩年低位。永利澳門（０１１２８）同美高梅（０２２８２）亦齊齊
唔見近３巴仙。細細隻嘅凱升（００１０２）傷得仲重，埋單碌低逾５巴仙收３﹒２５銀，慘！
假期愉快！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。