《小傳日記》外圍正放晴，香江靜蠅蠅；中移大反擊，聯通也精靈！

　　《小傳日記》花旗國噚晚（２３日）爆升二百幾點，東瀛今日（２４日）又升約百五點，但
香江呢邊就繼續我行我素，喺２３２００點水平浮浮沉沉，全日埋單唔見３０點收２３３０２，
國貨佬見到Ａ仔場尾市都係升唔起收２３０２點，都喺咁易碌低４７點收１０３９１。
　　睇番大隻佬公仔圖，呢幾日都力守企喺廿天線（約２３２３８點）樓上，但始終成交未見配
合，今日又只得約５０２億銀，呢條防線嘅抵禦能力都唔算好強；再加埋企業陸續排隊放榜，暫
時都未見有咩意見驚喜足以刺激大市抽高。至於等到頸都長嘅「滬港通」都仲係得個「等」字，
等到今日中證監例會，又係一個「桔」，仲要加埋期指結算日（３０日）臨近，小心淡友隨時嚟
個突襲，上演「屠牛記」！
　　
＊等呀等呀等何時正式通？浮浮沉沉間貨重不輕鬆＊
　　
　　季績放榜無幾耐，暫時都係壞消息居多。祖國移動（００９４１）業績平平無奇，畀大行連
踩多腳，噚日正式同９０關說再見。不過連跌三日之後，今日終於大反擊，重奪大關，散場啱啱
好收９０銀踢高逾２巴仙，成功終止跌勢，唔畀個勢再弱落去。
　　街坊聯通（００７６２）噚日收市後放榜，第三季業績夠省鏡，盈利增加２７巴仙至近３９
億銀人仔。雖然各大行嘅報告好壞參半，有啲話聯通大勢已去，有啲就話盈利重拾正軌，不過睇
嚟缸友都ＢＵＹ睇好多啲，聯通全日就反彈番逾１巴仙收１１﹒０６銀，同祖國移動拍住做首兩
名最威水藍戰士。可憐中電信（００７２８）下星期二（２８日）先派成績，今日未能夠叨叨光
，乖乖企定定收４﹒６６銀。

＊街坊齊反彈獨漏中電信，ＴＣＬ通訊先升後急插＊
　
　　ＴＣＬ通訊（０２６１８）又係噚日收市後放榜，但命運就截然不同。明明首三季盈利爆升
３７﹒５倍至７億銀，仲升埋全年銷售額增長目標。正當缸友大呻未及入貨之際，ＴＣＬ通訊竟
然反高潮，開市升一升後就掉頭跌番落嚟，由最高位７﹒９３銀計，一度急瀉一成去到７﹒１５
銀添，埋單有收７﹒４銀！原來單計第三季，公司毛利其實係跌咗ＤＤ，而大行擔心集團Ｄ機賣
得太平，會令到出年手機均價再跌多一成，所以齊齊出手削目標價。
　　另邊廂，長汽（０２３３３）就唔爭氣，首九月盈利倒退一成，即刻畀瑞信調低盈利預測，
兼將目標價降至２９銀。份成績咁差，想粉絲唔掟貨都難啦…收市急跌５巴仙收３０﹒８５銀，
成交有成約１０億銀，係全日第六多成交股份！仲連累東風（００４８９）同廣汽
（０２２３８），齊齊碌低近３巴仙，做咗首三名最差國貨佬，慘！
　　
＊長汽業績曳瑞信來踐踏，東風與廣汽要跌齊齊跌＊

　　講開「慘」，就點都唔夠早幾日買咗金山軟件（０３８８８）嘅缸友慘。話說金山由８月中
一直跌到唔識停，難得早幾日有力反彈，仲升破十天、廿天線，梗係吸引到唔缸友撈啦！點知世
事難料，金山噚日收市之後，竟然發盈警！話因為用咗太多錢去宣傳同研究手機遊戲，搞到第三
季營運溢利比舊年差好多。呢個晴天霹靂嘅警號，令好多粉絲心都碎埋，決定狠心分手，金山散
埸時就蒸發咗１２巴仙收１７銀，成交有成７﹒９億銀，今勻真係傷到入肉。
　　講咗咁耐，其實「巨舞霸」建行（００９３９）都放咗榜，不過成績唔太好，不良貸款仲增
加咗，孖屐擔心資產質素有惡化跡象。不過股價就無太大沽壓，只係跟市跌０﹒７巴仙收
５﹒５９銀，真係捏一把汁。

＊金山發盈警粉絲傷透心，股仔開派對買中真興奮＊

　　成班大價股排隊放榜，細股就趁機開Ｐａｒｔｙ！中國基建投資（００６００）無端端炒起
咗逾三成，係升得最勁股份，公司已經出晒不明聲因，話唔知發生咩事，但炒友都決定繼續買貨
，收市報０﹒１８５銀。連埋噚日支大陽燭，兩日已經爆升咗近５７巴仙。
　　寶峰時尚（０１１２１）大股東就計劃賣２３巴仙股權畀獨立第三方，依家都未知成唔成事
，但股價就爆高咗３１巴仙收０﹒５７銀。其他細股閒閒地都有１０至３０％升幅，勁有鑊氣！
　　不過炒時炒，小心炒得開心得滯走唔切。好似瀋陽公用（００７４７）停咗牌差唔多兩個月
，停賽之前嗰排飆升咗１﹒６倍。依家宣布終止兩單配售，復賽後就急瀉最多逾五成，雖然埋單
跌少咗，但都重挫逾２４巴仙收１﹒１１銀。假期愉快！請請！　　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。